Read Hadiyya Kobi'llishshi Kitaaba 17 Bible Online

Kobi'llishshi Kitaaba 17 - Hadiyya bible

Kobi'llishshi Kitaaba 17

¹Joranchi yoo minenne er maadda itimmiinsi; xummi yoo minenne gogaalli tima itimmi e'llookko.

²Moollanni beet sholle'aalli ihulas qoor agishshi gassookko; moollanni beet abbaayyuwwinne maqirem uulla baxxamookko.

³Worqii birii gii'l woronne bukkamaa firoohaannisam Waa'i mannika wodano saarayyookko.

⁴Jor manni baaxiilaa'nneka woshsha macceessamo; qophphanaan mannim hantaaraa'nneka woshsha aa'llamo.

⁵Buxichcho gadookkok ixxo qooccu Waa'a duumukkaannisa xigamookko; mulli mannanne afu hawwonne liiramookkokim guzumo'amoo'n gatooyyo.

⁶Oos oos lob anno'ina adilla'n mare'isa; oosikim lombi anno'o.

⁷Qawwi manchi er woshsha wocooyyo; ee'isam manna gassoo manchina qophphano wocimmi hasisooyyo.

⁸Maqanxi uwwu manchina gennkko'i mu'uxxisa; maru beyyonne hundannem sawwita xabbaa'ookko.

⁹Iitto hasoo manchi ixxo hawwodu manchina haafookko; ihukkaarem hawwojja dabaransaa wocoo manchi iitti manna joransookko.

¹⁰Qawwi mancho xibbi kore aphphisakkamaare losoohaanniinsi qoossoo manchi mat amma'n sogitaninne losookkok lophphookko.

¹¹Jor manchi xale'e boqqooma hasookko; ee bikkina mogaalli asse'amaanchi ixxena asse'amookko.

¹²Qawwoo'm baxo baxoo qawwi manchinne exximmiinsi wotalla hoorakko'i tibbekkichchinne edamimmi e'llookko.

¹³Eroommi bikkenne jora dabaroo manchi miniinsi jor luwwi qee'llooyyo.

¹⁴Jorancha asheerimmi qoqqobamu wo'o toroshimmisa; ee bikkina joranchi qoxxoo'n at fitancha ure.

¹⁵Baaxiilaancho muccuraa yimmii muccur manchom baaxiilaanchoo yimmii lamim Waa'i illagenne shigigaa'oohane.

¹⁶Qawwi manchi qoorooma bitaa'eena lachbee'i bikkina ixxi anganne bir hee'uta'nnim maham awwaadooyyo.

¹⁷Beshichchi hundi ammanem ixxi beshichcho iittookko; abbaayyim qaramookkok hawwi ammaninatte.

¹⁸Qoossimmi bee'i manchi mulli manchika badano miqeena hide'aa lubbato aagookko.

¹⁹Baaxiilo iittoo manchi fitancha iittookko; qeeraa'l goocisa ixxi gaga iimiimaa'oo manchi odim bichcha ixxi gaganne eebaqqookko.

²⁰Boqqi wodan yoo manchina makkooyyo; wocu woshsha lagoo manchim joranne ubookko.

²¹Qawwa qaru manchi kichche'ookko; gawwi beet annim liiramooyyo.

²²Liiramaakkoo wodan er qaraare; ihukkaarem tii'l kichchechchi miqe iiqookko.

²³Baaxiilaanchi manchi oogato boqqiseena maaxaqqanne maqanxa aa'ookko.

²⁴Qoossimmi yoo manchi baxoo baxo hundam qooroominne baxookko; ihukkaarem qawwi maanchi dut kollonne tiiro binnaa'ookko.

²⁵Qawwi beet ixxi annina kichchechcha; ixxo qatto'i amanam qaraaraalli gaabbimma eebookko.

²⁶Muccur mancho guzumo'immi danaamoyyo; er manchom ixxi eroommi bikkenne guzumo'immi danaamoyyo.

²⁷Lachchi yoo manchi lobakata wocooyyo; qoossimmi yoo manchikim tiir gaaga'aakkoohane.

²⁸Qawwi manchi cawwuta'n qoor mancho labookko; wocoo'n cawwukkaarem qoorisa xigamamookko.