Read Hadiyya Kobi'llishshi Kitaaba 19 Bible Online

Kobi'llishshi Kitaaba 19 - Hadiyya bible

Kobi'llishshi Kitaaba 19

¹Qophphano wocoo qawwi manchiinsi miiqakkam luwwi bee'i buxichchi e'llookko.

²Lachchi bee'i qoxallan awwaadooyyo; gaaggaabaa taakke'oo manchi googo huushamookko.

³Manni ixxi qawwoominne hawwodamookko; ihukkaarem ixxi tiironne Waa'inne qaraarookko.

⁴Goddaan mannina iitti manni dutookko; ihukkaarem buxichchiinsi yoo iitti manchim qee'llookko.

⁵Qophphano naqqasoo manchi guzumo'amookko; qophphano wocoo manchim guzumo'amoo'n gatooyyo.

⁶Lobakat manni biijaalli manchina besh iheena hasookko; uwwoo manchina hundim beshichcho.

⁷Buxichchi mancho ixxi abbaayyuwwim ihuta'n sabookko; hore'oomam ixxi besh ixxeensi gibookko; laseesukkuuyyi atoorasseena yakuta'nnim besha siidooyyo.

⁸Qoorooma ixxi gaqqan issu manchi ixxi foore iittaakkoohane; qoossimma erisa iittoo manchim goddaanchi ihookko.

⁹Qophphano naqqasoo manchi guzumo'amookko; qophphano wocoo manchim bi'ookko.

¹⁰Qawwi heellamaa hee'immi hasisooyyo; agishshi moollanna ijaajimmi hore'oomam hasisooyyo.

¹¹Manchonne qooroom hee'ulas quuqisoo woshsha iyyaqqoo'isa issookko; ixxo hawwodu manchina uraammoo yimmim ixxena lomba.

¹²Adi'llek quunqi hobbichchi muu'nnesa baddisoohane; ixxi illagenne hibba siidimmim hixe latisoo xee'nnesa.

¹³Qawwi beet annina kichchechcha; woshshaam arem uroobee'i xee'n cophphisa.

¹⁴Minee goddaa anno'iinsi siixxakkamo; ihukkaarem qoossimmi yoo are Waa'iinsi uwwantamo.

¹⁵Baxakkoo'n afuurimmi diriichcha eebookko; ceemmaalli manchikim godab sibaarookko.

¹⁶Waa'i ijaajo egeroo manchi ixxi gaqqi foore ege'llookko; ihukkaarem Waa'i sagara gadoo manchi bi'ookko.

¹⁷Buxichchina uwwoo manchi Waa'ina liqaayyisukkaannisa xigamookko; ixxi danaam baxikam bito Waa'i dabaraa miqookko.

¹⁸Daba'llimmi neeyyat hee'ukkuuyyi ki beeto axeere; axeetbeelas lehina higissaa uwwittaannisa xigamookko.

¹⁹Biijaalli manchi guzumo'amim hasisookko; uratinne higgita'nnim la'm kore eddoo'n gattooyyo.

²⁰Sogitano macceessilasii losanom losseena hassilasii lasaanchonne qoorooma siiddootto.

²¹Manni lobakat luwwa sawwookko; ihukkaarem Waa'i sawwit xale'i wo'mmookko;

²²Manniinsi egeramookkok amma'nnancha; qophphanaanchi manchiinsi buxichchi e'llookko.

²³Waa'a baddimmi heechchi googonne awwonsookko; Waa'a baddoo manchina mahim hoffe'oo'n usheexxaa hee'ookko; jor luwwim ixxonne afooyyo.

²⁴Ceemmaalli manchi wocitanne anga aagisookko; ihukkaarem suumenne duuqimma hoogookko.

²⁵Bolxoo mancho guzumo'llilas lachchi bee'ek eekka moo'aa qoor ihookko; qoossimmi yoo mancho axeettilas odim lachcha siixxookko.

²⁶Anna bogookkokii amam holloo beetii tuullee sholle'nnee eeboo beeto.

²⁷I beeto i sogitano macceessaa lasonne lachchi yoo sagariinsi huushamimma ure.

²⁸Qophpha'n naqaash hanqo'i oogatonne naacamookko; baaxiilaan kee'n suumim jor woshsha wocookko.

²⁹Naacantam keenina guzumo'i ceemmaalli kee'n afarinam jiraaf gudaakko.