Read Hadiyya Kobi'llishshi Kitaaba 20 Bible Online

Kobi'llishshi Kitaaba 20 - Hadiyya bible

Kobi'llishshi Kitaaba 20

¹Woyi'n diqaas awwaad bee'i manchi issookko; dimbisoo aggim wocamakkamisa issookko; eehannonne huushamoo manchim qoorayyo.

²Adi'llek quunqi hobbichchi muu'nnesa; ixxo quuqisoo manchim ixxi gaga hawwonne aagisookko.

³Fitiinsi gibimmi manna lonsookko; ihukkaarem qawwi manchi hundi ammanem wocameena gaaggaabookko.

⁴Ceemmaalli manchi uulla ammaninne baxooyyo; ee bikkina hurbaata wixxaa'akkam agananne uunxeena firookko; ihukkaarem maham siidooyyo.

⁵Sogitan manni wodanonne xillaalli barenne yoo wo'isa; ihukkaarem qoossimmi yoo manchi inkii'llookko.

⁶Manni hundim ixxi gaqqi eroommi bikkina wocookko; ihukkaarem amma'nnamaakkoo mancho ayyi siideena xanookko?

⁷Muccur manchi miiqakkam luwwi bee'eka hee'ookko; ixxi oosim ixxeensi lasonne maasse'anto'oo keen ikkamo.

⁸Adil oogaxxi barcumanne afuuroo ammane jor baxo hundam ixxi illinne annannissaa la'ookko.

⁹«I wodano muccuroominne egeraammo; eesennem baaxiil bee'e» yoo manchi ayyette?

¹⁰Waa'i qophpha'n keennaanchchoo hanqo'an ihubee'i qunnaa lamom shigigookko.

¹¹Ciilichchi muccuraa xabbeenaa ihukkis baxoo baxinne la'amookko.

¹²Macceesoo maccee moo'oo illee lamom Waa'i qooccukko.

¹³Buxxoobee'isa diriichcha iittititte; ihukkaarem qoxxitaa baxxilas kiina ihoo hurbaata siiddootto.

¹⁴Meeriinsi mat mu'uta bitaa'oo manchi «Awwaadoobee'ane» yaa bushisookko; ihukkaarem bito aa'aa lasonne «Bushaallisa aa'aammo» yaa biramookko.

¹⁵Lachchinne wo'mmaakkoo woshshi worqiinsee kashar inqu'iinsee lophphookko.

¹⁶Koyyiinchi manchina lubbatamu manchika eddechcha dabe; la'oobee'i manchinam lubbatamu mancho gagoomam amade.

¹⁷Baaxiilinne siidamoo luwwi xee'oo hurbaaxxesa liiransookko; ihukkaarem eehanniinsi lasonne suumenne shashsha'llisa ihookko.

¹⁸Er sogitano aa'llilas ki sawwit xabbookko; ee bikkina er sogitano aa'lloo'n o'l beyyo mattitte.

¹⁹Hamoo manchi maaxakko'i woshsha caakkisookko; ee bikkina lobakata wocoo manchiinsi qee'lle.

²⁰Anna te'im ama duumoo manchik caakki gambabbi tuunsonne xoo'ookko.

²¹Kichchannem qaqqisaa wixxoo amaxxi losaanchonne maasse'amooyyo.

²²Kiina jora baxu manchina dabattaa jora baxxitte; Waa'anne amma'nname; ixxim kiina agaagookko.

²³Waa'i lam hagar keennaancho shigigookko; qophpha'n qunnannem liiramooyyo.

²⁴Manni taakke'oo googo Waa'i awwonsookko; eehaare manni ixxi googo hinkid la'eena xanookko?

²⁵Lasonne gaabbitoobee'isa Waa'ina uga'a aaggeena gaassitaa qoossitaa sawwihe.

²⁶Qoor adil boqquwwi keeno annannissaa la'ookko; qishixxat bee'ekam guzumo'ookko.

²⁷Mannik woro'l sawwit Waa'i illagenne caakki ihu bikkina woro'l mannoomato hundam saarayyookko.

²⁸Biijoomii amma'nnamaakkoohaannoomii adila egerookko; ixxi adillanim haqqinne qoxxaa hee'ookko.

²⁹Harde'i kee'n lombi ixxuwwi woda; abo'im lommannina nuura.

³⁰Omassoo guzumo'i jolliinsi dabarookko; qaqinne ganimmim woro'l mannoomato muccussookko.