Read Hadiyya Kobi'llishshi Kitaaba 21 Bible Online

Kobi'llishshi Kitaaba 21 - Hadiyya bible

Kobi'llishshi Kitaaba 21

¹Adi'llek wodan daadoo wo'isa Waa'i angannette; Waa'im hasu kollonne dabarookko.

²Manchi maroo goog hundim ixxi illagenne xabbeena labookko; ihukkaarem Waa'i mannika sawwite keenookko.

³Kitimiinsi loboka muccuroomii xabbeen baxo baximmii Waa'a liiransookko.

⁴Boqquwwi kee'n mare'i bolxoomaa ixxuwwina yoo luwwanne bakkechchaa; oohim baaxiilo.

⁵Qoxxaa baxoo manchik sawwit goddaanchi issookko; ihukkaarem gaaggaabimmi buxoonsookko.

⁶Qophphaninne wixxoo amaxxi binnaa bi'oo umbu'llisaa lehonne afisoo qaashisaa.

⁷Baaxiilaan keen er luwwa issiteena iittitambee'i bikkina ixxuwwi boqqoomim ixxuwwa bi'isookko.

⁸Baaxiilaan kee'nnek goog boqqa; ihukkaarem muccur kee'n bax xabbeena.

⁹Woshshaam meentichchonne mat minenne hee'immiinsi biiranne hee'immi e'llookko.

¹⁰Baaxiilaan keen hundi ammanem jor baxo baximma iittitamo; ayyenam qishixxitamoyyo.

¹¹Bolxoo manchi guzumo'amoo ammane lachchi bee'i manchi lachcha siixxookko; qoor manchina losano uwwakkam ammane lonsaa lachchaam ihookko.

¹²Muccur Waa'i baaxiilaan kee'n minenne baxamoo bax hundam moo'ookko; baaxiilaan keenom bi'isookko.

¹³Bux kee'nneka laachcha macceeseena hasoobee'i manchi ixxi gagim laaroo ammane hara'mmookkoka siidooyyo.

¹⁴Maaxakka'a uwwakkam luwwi quunqa billisookko; kikkilonne maaxakka'a uwwakkam maqanxim lobakat quunqa siggisookko.

¹⁵Hanqo'i oogat muccur keeno liiransookko; ihukkaarem baaxiilaan keeno dambaqisookko.

¹⁶Qoossimmi googiinsi huushamoo mancho leh egerookko.

¹⁷Heellamimma iittoo manchi buxookko; woyi'n diqaasaa zaytaa iittoo manchi goddaanchi ihooyyo.

¹⁸Baaxiilaan keen muccur keenonne afoo hawwo aa'llamo; amma'nnat bee'i keenim xabbeen keenonne afoo hawwo aa'llamo.

¹⁹Woshshaam nunnuraanchi meentichchonne maqire afuurimmiinsi udma'i uullanne hee'immi e'llookko.

²⁰Qoor manchi lobakat amaxxaa bito xee'aalli luwwaa ixxi minenne wixxaa'ookko; ihukkaarem qoossimbee'i manchi yoo luwwa hundam abdaadookko.

²¹Muccuroomaa biijoomaa hasoo manchi heechcha, lombaa goddaa siixxookko.

²²Qoor gaaxxi awwonsaanchi malaayyaam o'l gogotinne egessiisakko'oo beero'o kaa'aa aagookko; amma'nnamakko'i girbuwwam gindansookko.

²³Ixxi suumee allaboo jora wocoobee'isa ege'lloo manchi ixxi gaga hawwiinsi ege'llookko.

²⁴Bolxookkokii ixxena yoo luwwanne bakke'oo manchii birammaancho yamamookko; baxoo bax hundim bolxoominne wo'mmaakkoohane.

²⁵Ixxi angiinne baxeena hasoobee'i bikkina ceemmaalli manchi ixxi mixaninnem lehookko.

²⁶Baaxiilaanchi manchi hundi ammanem lobakat luwwa mixookko; ihukkaarem muccur manchi maham idiidoo'n uwwookko.

²⁷Baaxiilaan keen hincaa'llam kitim Waa'i beyyonne sabamaakkoohane; annannannem jor sawwitinne ki'lla'a hincaa'llam kitima erisa sabookko.

²⁸Qophpha'n naqaash bi'ookko; ihukkaarem erisa macceesaa wocoo manchik sagar wo'mmookko.

²⁹Baaxiilaanchi manchi «An huushamummoyyo» yaa woshshanne gogookko; ihukkaarem hanqo'i manchi maroo googo qoossookko.

³⁰Manchi beet ixxi qooroominne, qoossimminnee sogitaninnee Waa'inne uullixameena xanooyyo.

³¹Farashsho o'l ballina gudisakkeena xanakkamo; ihukkaarem kaachcha uwwookkok Waa'a.