Read Hadiyya Kobi'llishshi Kitaaba 22 Bible Online

Kobi'llishshi Kitaaba 22 - Hadiyya bible

Kobi'llishshi Kitaaba 22

¹Danaam summi lobakat goddiinsi e'llookko; manni illagenne nuura siidimmim biriinsii worqiinsii e'llookko.

²Goddaanchoo buxichchoo qooccukkok Waa'i ihu bikkina lamim ixxi illagenne gudaano.

³Qoor manchi hawwi waaroo'isa moo'aa maaxamookko; ihukkaarem qawwi manchi hawwi woronne aagaa hawwodamookko.

⁴Maashaalloomii Waa'a baddimmii godda, lombaa heechchaa uwwookko.

⁵Jor manni googonne uttii qaashii yookko; ihukkaarem ixxi foore ege'lloo manchi ee googiinsi qee'llookko.

⁶Oosina hinkid hee'immi hasisooda'e losise; ixxuwwi umu'l doolli hundannem ee losaniinsi annanni ikkamoyyo.

⁷Buxichchi goddaanchi manchina awwaadaanchi ihookko; liqaayyo aa'u manchi odim uwwu manchina agishshi ihookko.

⁸Hanqa oogatoobee'i manchonne hawwi afookko; ixxi quuqoo quunqim ixxo hannom afisooyyo.

⁹Ixxi hurbaata buxichchinne maqire baxxamoo bikkina biijaalli manchi maasse'amaakkoohan ihookko.

¹⁰Bolxoo mancho fissitaa hootlas joranchi bee'ookko; fitanchii game'llanchim hee'ooyyo.

¹¹Woda'n muccuroomaa er woshshaa iittoo manchi adi'l beshichchi ihookko.

¹²Waa'ik illi lachcha egerookko; ihukkaarem amma'nnatbee'i kee'n sawwite bi'isookko.

¹³Ceemmaalli manchi «Hobbichchi biiranne yoo bikkina biira firumlas shookko» yaa miniinsi firooyyo.

¹⁴Saa'aanchi meentichchi sagar xillaalli ba'llesa; Waa'i quuqu manchi isenne ubookko.

¹⁵Oos wodanonne qawwoom hee'ookko; ihukkaarem sogita'n bicci ixxuwwiinsi qeessookko.

¹⁶Hora wixxaa'eena buxichcho hawwodookkok te'im goddaanchina irifo'o uwwookkok buxookko.

¹⁷Ki macce dabattaa qoor mannika sagara macceese; ki wodanom i lachchi kollonne dabare.

¹⁸Ee keenom hundi ammanem tiittittaaree awwaaxxittaaree keese liiransookko.

¹⁹Kiikki amma'nnat Waa'annetti ihoo'isina oono'o, kaballa an kiina la'isaammo.

²⁰Keese xa'mmoohaannina hanqo'i dabachcha dabattoo'isinaa hanqo'i saga'llekam hanqooma laqqoo'isinaa sogitaninnee lachchinnee wo'mmaakkoo sad losano kitaabummoyyonnihe?

²²Bux ikko'i bikkina buxiinsi malaayyinne boggitte; hawwaanom oogaxxi beyyonne barche'e issititte.

²³Mashka'oomim Waa'i ixxuwwika hanqa gudisookko; malaayyinne bogoo keenom bogookko.

²⁴Quuqoo manchinne beshichchi ikkitte; nadadoo manchinnem maqire taakke'llitte.

²⁵Mashka'oomim ixxeka googo lossilas ki foorina qaash ihookko.

²⁶Mulli mannika badano miqqeena lubbato aaggitte.

²⁷Mashka'oomim miqimma hooggilas iinse'lloo ara'aa yoo amaxxaa hundam elleesakkamo.

²⁸Gaassi kiyyanno'i kaasso'i gaba'l mare'e xoqoltitte.

²⁹Baxo qooroominne baxoo mancho moo'llittonnihe? Eehido'i manchi kora'i manni illagennetti ihoo'n adi'l illagenne awwaadina uullookko.