Read Hadiyya Kobi'llishshi Kitaaba 23 Bible Online

Kobi'llishshi Kitaaba 23 - Hadiyya bible

Kobi'llishshi Kitaaba 23

¹Gassaanchinne maqire itteena afuuttoo ammane kiinninne yookkok ayyedda'e ihukkisa qoossitaa la'e.

²Erisa sibaattaattoolasim lobakata itimmiinsi ki gaga ege'lle.

³Ayyi la'ukko keese keeneena uwwaakkoohan iheena xanoo bikkina xee'oo hurbaatam ihuta'n gollitoobee'isa ki gaga ege'llitaa ite.

⁴Goddaanchi ikkeena badattitte; eehido'i gagina gollimmiinsi qee'lliteena qoor ihe.

⁵Mashka'oomim eehido'i goddi moo'llittuuyyim bi'ookko; iima'n kolli xabbaa bararoo gaaqichchisam lado mutisaa bararookko.

⁶Idiidoo manchika hurbaata ittitte; ixxi hincaa'oo xee'oo hurbaatim kiina quluxisoone.

⁷Mashka'oomim hurbaatooma uttona hasu bikkina «Ite age» yookko bagaan wodaninneyyo.

⁸Ittittoka uwwe'llootto; ixxo bittaa woccitti woshshi qishirichchi ihookko.

⁹Qooroominne wo'mmaakkoo ki sogitano gadoo bikkina qawwi manchinne awwaadoo woshsha woccitte.

¹⁰Gaassi gaba'lleka mare'e gindititte; annii amaa bee'i oosikam uulla hoottitte.

¹¹Mashka'oomim Waa'i ixxuwwina wodaam agaagaanchi ihu bikkina kiinninne fitamookko.

¹²Ki wodano sogitanina ki maccem lachchi yoo sagara macceesoo'isina fooqaa'e.

¹³Ooso guzumo'imma uttitte; qaqinne ganimmi shooyyo.

¹⁴Qaqinne gantootto; ihukkaarem ixxuwwi foore lehiinsi gatissootto.

¹⁵I beeto, at qoor ikkilas an erisa liiramoommo.

¹⁶Ki suumim hanqo'i woshsha wocoota'n i woro'l mannoomat hundim lobakata liiramookko.

¹⁷At baaxiilaan keenonne to'achchititte; ihukkaarem hundi ammanem Waa'a baddimminne hee'e.

¹⁸Eehid ikkilas soodina kiina hanqo'i lubbat yookko; ki neeyyatim kora'a bi'ooyyo.

¹⁹I beeto macceese; qooram ihe. Ki wodanom hanqo'i googonne awwonse.

²⁰Lobakat woyi'n diqaasa agoo keeninnee iteena golloo keeninnee maqire hossitte.

²¹Mashka'oomim dimbaanii gollaanii buxxamo; diriichchi lophphimmim dereeramaakkoo suusa eddeesisookko.

²²Keese qaru kiyyannika sogitano macceese; kiyyummam lomma'nnitam ammane gadditte.

²³Hanqa bitaa'e bagaan biteessitte; qoorooma, sogitanoo qoossimmaa ki gaqqan isse.

²⁴Muccur beetik anni lobakata liiramookko; qoor beeto qaru annim erisa liiramookko.

²⁵Kiyyannii kiyyummaa keesenne liirantona; keese qatto'i kiyyummam keesenne lobakata liirantona.

²⁶I beeto erisa macceese; i heechchim kiina kobi'llishshi ihona.

²⁷Saa'aanchi meentichcho xillaalli ba'llisa; buubbeesaanchi meentichchom xuqqi bar'nno'otane.

²⁸Gafannisa makka egetta'a manni lambe'enne salmaachchoo keeno dutissamo.

²⁹Aayye yimmi ayyenatte? Kichchechchi ayyenatte? Joranchi ayyenatte? Laachchi ayyenatte? Mashka'i bee'em omarimmi ayyenatte? Ille kasharimmi ayyenatte?

³⁰Woyi'n diqaasa agukkuuyyi dasoo keeninayyonnihe? Hamaaramaakkoo qoxxaalli agga laseessam keeninayyonnihe?

³¹Ee bikkina maham kasharaa birille'enne belelleesuta'nnimii agakkam ammane xee'uta'nnimii woyi'n diqaas kolli moo'llitte.

³²Mashka'oomim lasaanchonne hamashichchisa qasookko; woraqaallichchisam shoo qaraare keesenne tuhookko.

³³Ki illinam haareechchi luwwi moo'amukkoka labookko; ki tiironnem boqqoominne woccooyyo.

³⁴Atim hanbu'llam heekkeesoo dambalaq woronne yoontokaa hafachchi heekkeesoo wongi'l utuphphi ludonne iinse'llittokaa labissootto.

³⁵Ee'isam «Aphphisakko'aare hawwodamummoyyo; ganakko'aarem xissukkoyyo; eehannah mulli agga edaa ageena baqoommok hinki ammane?» yitootto.