Read Hadiyya Kobi'llishshi Kitaaba 24 Bible Online

Kobi'llishshi Kitaaba 24 - Hadiyya bible

Kobi'llishshi Kitaaba 24

¹I beeto, jor mannanne to'achchititte; ixxuwwinam beshichchi ikkeena hassitte.

²Mashka'oomim ixxuwwi wodanonne hundi ammanem boqqooma sawwitamo; ixxuwwi suuminnem qawwiissamo.

³Qooroominne min baxamookko; qoossimminnem qoxxaa hee'ookko.

⁴Lachchi hee'ulas mi'n woronne bito xee'aalli mu'utii mishisoo mu'utii wo'mmookko.

⁵Qoor manchi malaayyaam manchiinsi e'llookko; lachchaam manchim wodaam manchiinsi e'llookko.

⁶Orina fitteena gaasitaa erisa sawwite gudise; lobakat sogoo manni hee'ulas kaachcha siiddootto.

⁷Qooroom qawwi manchiinsi lobakata qee'llaakkoohane; beero'onne manni wixxoo beyyonnem wocoo luwwi hee'ooyyo.

⁸Jora baxeena hasoo manchi «Hantaaraancho» yamamookko.

⁹Qawwi hundi ammanem sawwookkok baaxiilo baximma; bolxoo manchom manni shigigookko.

¹⁰Hawwi afoo balla qoxximma hooggilas ki malaayyi hoffane.

¹¹Lehina ushe'antam keeno gatise; durantona oogatakko'i keenom dabare.

¹²Ayyi la'ukko at «Ka woshshi bikkina an la'oommi luwwi bee'e» yiteena xantootto; ihukkaarem wodano saarayyoo Waa'i la'ooyyonnihe? Ki heechcha egeroo Waa'i la'ooyyonnihe? Annannichchinam baxukkisa miqooyyonnihe?

¹³I beeto, danaam ihu bikkina marabo ite; maraphphi damaamim xee'oohane.

¹⁴Qooroomim ki foorina eran ihukkisa la'e; qoorooma siiddita'n kiikki lasaqqi heechchi xabbaakkoohan ihookko; ki neeyyatim bi'ooyyo.

¹⁵Boqqi manchisa muccur manchi mi'n amaxxa boggeena duggitte; ixxi gattennem weerattitte.

¹⁶Muccur manchi lamar kore ubuta'nnim ki'ookko; ihukkaarem baaxiilaanonne bichchi afookko.

¹⁷Ki diinakkichchi ubuta'n liirantitte; qolamoo ammanem wodanonne lobakata liirantitte.

¹⁸Eebeelas Waa'a kichche'issootto; Waa'im ki diinakkichchonne isseena sawwu quunqa urookko.

¹⁹Baaxiilaan baxxam bax bikkina u'nnantitte; ixxuwwannem to'achchititte.

²⁰Baaxiilaanchina neeyyat bee'e; boqquwwi kee'n caakkim bi'ookko.

²¹I beeto, Waa'a badde; adilam lonse; ixxuwwina ijaajantambee'i keeninnem maqir ikkitte.

²²Mashka'oomim eehido'i mannanne hawwi qaqqisom afookko. Waa'iinsii adiliinsii waaroo bichcha ayyim la'ooyyo.

²³Qoolluwwi kanniinsi woroon yoo mulli qooroo'm sagara edda'a wocco'ookko. Oogato'onne golo'immi eraneyyo.

²⁴Baaxiilaancho «At muccura» yoo mancho manni duumookko; minaadabim sabookko.

²⁵Ihukkaarem baaxiilaancho hanqo'isinne guzumo'llam daannuwwi er sadoo lobakat maassoo siiddamo.

²⁶Hanqo'i dabachcha dabarimmimmi er beshichchi xummaaxxisa.

²⁷Gaassitaatim ki gaqqi uullanne ki heechchina hasisoo luwwa baxxaa gudise; eehanniinsi lasonnem ki mine baxe.

²⁸Moo'llibee'i luwwa naqqassitte; manni sadom bi'issitte.

²⁹Ayyenam «Ixxi eese issukkisam anim issoommo; baxu baxisam dabaroommo» yititte.

³⁰Ceemmaalli manchi abuulli worinnee qoossoobee'i manchi kaasu woyi'n kaashshi beyyinnee higummo.

³¹Oono'o, uttii bochchii wo'mmaakko; kininne ootamu ootim gindamaakko.

³²Moo'aa lasonne sawwummo; moo'ummi luwwiinsim losano aa'ummo.

³³Hofqaxam iinse'llaa diriittootto; iinse'lleenam ki anga qinxaa'llootto.

³⁴Ihukkaarem buxoom fangichchisa hawwim o'l mu'uta lade'u manchisa ihaa dangonnem waarookko.