Read Hadiyya Kobi'llishshi Kitaaba 25 Bible Online

Kobi'llishshi Kitaaba 25 - Hadiyya bible

Kobi'llishshi Kitaaba 25

¹Ku kobi'llishshuwwi odim Salamoon mulli kobi'llishshuwwa; kobi'llishshuwwam dabatta'a kitaabbo'ok Yihuxxi adil hee'u Hizqiyaas adilla'n minenne hee'llo'i baxaano.

²Waa'ik lombi woshsha maaximma; ihukkaarem adilluwwik lombi woshsha saarayyita'a fissimma.

³Adi'llek sawwit iima'nnisa qee'llaa uullisam xillaalli ihu bikkina saarayyakkeena xanakkamoyyo.

⁴Kin biriinsi ci'llu xura hoore; ee lasage xaara tumoo manchi axisookko.

⁵Adi'l illagiinsi baaxiilaan keeno qeesse; ixxi adillanim hanqanne qoxxaa uullookko.

⁶Adi'l illagenne ki gaga iimiimaa'llitte; kiinniinsi lophphoo kee'n beyyonnem ikkeena hassitte.

⁷Kiinniinsi lophphoohaannina beyyo uwwitona xa'mmantaa daanni illagenne tuuttoohaanniinsi «Waare, iim shiqihe» yakkota'n e'llookko.

⁸Kiinninne maqire yoo beshichchi tuussiisoohaare saxxitoohaanniinsi moo'llitti luwwa oogaxxi beyyonne naqqasseena gaaggaabbitte.

⁹Ki quuxonne ki beshichchinne fitantoo ammane ixxenne maqire yoo woshsha guulle bagaan mulli mannika maaxaqqi woshsha caakkissitte.

¹⁰Eehid ihubeelas maaxaqqi woshsha maaxxeena xantoobee'isa la'u manni hundim keese sholliisookko; dabatteena xantoobee'i jor summam uwwookko.

¹¹Ammaninne xabbaa'akka'a kurakko'i woshshi axisakka'a baxakko'i kin biranne lii'lle'aa firu worqisa mishisookko.

¹²Qoor manchi sogoo sogitan macceesoo manchina worqinne baxamu macci gutichchiinsi te'im danaam worqinne baxamaakkoo wereeggi mu'utiinsi lophphookko.

¹³Siggaalli wo'i hurbaata wixxaa'akkam agananne xeebo muroohaannisam amma'nnamaakkoo asse'amaanchi asse'u manchika tiiro usheexxisookko.

¹⁴Uwwoobee'i luwwam «Uwwoommo» yukkuuyyi bolxoo manchi xeenbee'i duuphphisaa hafachchisaa.

¹⁵Iyyaqqimminne gassaanchika sawwite dabarakkeena xanakkamo; maashaalli sagarim maag woshsha maashisookko.

¹⁶Lonsitaa ittilas goxxansoo bikkina marabo siiddoo ammane kiina ihoo qaxa ite.

¹⁷Keese ceemoobee'isaa saboobee'isaa ki beshichchi mine hundi ammane mattitte.

¹⁸Ixxi beshichchonne qophphano naqqasoo manchi bisa'isa, muqqisaa xiyyisaa hawwodookko.

¹⁹Hawwi ammane amma'nnamoobee'i manchonne bakke'immi heekke'u inqinne itimmisaa iiqamu lokkinne taakke'immisaa.

²⁰Kichche'aakkoo manchina kadimmi qiidanne eddechcha maxarimmisaa omaranne shokkiisoo qaraare issimmisaa.

²¹Ki diinakkichchi sibaarulas hurbaata itise; xeebe'ulasim wo'o agise.

²²Eehid issitlas tuullinne shokkoo'isa issitootto; Waa'im baxxitti er baxika bito miqookko.

²³Hanaa'n qarinne hafachchoo hafachchi xeena eeboohannisam hamoo manchik woshshi quuqisookko.

²⁴Woshshaam meentichchonne mat minenne hee'immiinsi biiranne hee'immi e'llookko.

²⁵Siggaalli wo'i xeebe'u manchika xeebo muroohaannisam qee'l uulliinsi waaroo mishiraachchi sagarim liiransoohane.

²⁶Baaxiilaanchi manchika woshsha aa'oo muccur manchi borqu bu'i wo'isa te'im bobu ba'l wo'isa.

²⁷Lobakat marabo itimmi danaamooyyo; ee'isam gaqqi sawwitinne lomba hasimmi lonsooyyo.

²⁸Ixxi gaga ijaajoobee'i manchi oot gindamu beero'isa.