Read Hadiyya Kobi'llishshi Kitaaba 26 Bible Online

Kobi'llishshi Kitaaba 26 - Hadiyya bible

Kobi'llishshi Kitaaba 26

¹Barad billenne xeen odim hurbaat wixxaa'akkam agananne hasisoobee'aannisam qawwina lombi hasisooyyo.

²Ekkidii kidii bararoo cii'i hawwodeena xanoobee'aannisam kora'am duumakkam duunchi ayyennem afooyyo.

³Halangi farashshina hakkammi odim baquchchina hasisoo'isam qawwi manchi afarinam bicci hasisookko.

⁴At odim ixxesam ikkoobee'isa qawwi xa'mmoo xa'mmichchina ixxi qawwoo'mmisanne dabattitte.

⁵Qawwi manchi qoor ihukkoka labisoobee'isa qawwi xa'mmoo xa'mmichchina ixxi qawwoo'mmisinnem dabare.

⁶Qawwi manchonne asso asse'immi gaqqi lokko mu'llimminnee hawwo gagina eebaqqimminnee gudaancho.

⁷Qawwi manchi wocoo kobi'llishshi shiihu manchi dim lokkinne taakke'oohaannisa.

⁸Qawwina lomba uwwimmi kina yambarishanne karakka'a huushakkeena yakimmisa.

⁹Qawwi manchi wocoo kobi'llishshi dimbaanchi ixxi anganne kaaxxu utta fisseena yakoohaannisa.

¹⁰Qawwi mancho te'im googinne higoo dimbaancho diinate miqaa baxisoo manchi xiyya malinnem darabukkuuyyi manna madisoo o'l manchisa.

¹¹Wishichchi uwwe'u uwwa iteena daba'lloo'isam qawwi manchi qawwooma dabaransaa wocookko.

¹²Ixxi gaga manni hundiinsim qoora labisoohaanniinsi qawwi manchina neeyyat hee'ookko.

¹³Ceemmaalli manchi «Googonne hobbichchi yookko; baddisoo hobbichchim buranne daba'llamoolla» yaa wocookko.

¹⁴U'llummi xuf karakko'i usanne muquqoohaannisam ceemmaalli manchi ara'anne afaree godaboo daba'llamookko.

¹⁵Ceemmaalli manchi wocitanne anga aagisookko; ihukkaarem suumenne massaa duuqimmim ixxena ceensiisookko.

¹⁶Qooroominne dabachcha uwwitam lamar manchiinsi loboka ceemmaalli manchi ixxi gaga qoor issaa xigookko.

¹⁷Mulli manni wocanchi lambe'enne aagoo manchi googinne higoo wishichchika macce amadimmisa.

¹⁸Ixxi beshichcho qawwiisaa «Naacinatte issummok» yoo manchi shoo o'l mu'utinne lelloo machchaaraanchisa.

²⁰Haqqi beeddoo ammane giir xoo'oohaannisam hamo taakkiisoo manchi bee'ulas joranchi hee'ooyyo.

²¹Kiffe'i gii'l kashara haqqim giir lophphoo'isa issoo'isam woshshaam manchim joranchi lophphoo'isa issookko.

²²Hamo taakkiisoo manchik sagar xee'oo hurbaaxxisa mishisukkuuyyi godaphphi wor afeebe'e dillookko.

²³Ixxi wodanonne jolli hee'ukkisam suuminne maashaalli sagara wocoo manchi mishisoo xaa'l qalama hanenne labakko'i buchchi mu'uxxisa.

²⁴Masokkichchi ixxi suuminne danaam sagara wocookko; ihukkaarem ixxi wodanonne hantaaro sawwookko.

²⁵Ixxi wodan jollinne wo'mmaakkoohan ihu bikkina suuminne qawwiisaa er woshsha wocuta'nnim ixxo amma'nnititte.

²⁶Ixxi masoo'ooma qawwiishshinne maaxuta'nnim ixxek jolli dummichchi lambe'enne la'amookko.

²⁷Manni uboo'isina bare hinoo manchi ixxi gagim ubookko; mannanne kina onkoroollisoo manchonne ixxi hanennem daba'llaa kin ubookko.

²⁸Qophphanaanchi manchi hawwodeena hasu manna sabookko; qawwiishshi sagarim bichcha eebookko.