Read Hadiyya Kobi'llishshi Kitaaba 27 Bible Online

Kobi'llishshi Kitaaba 27 - Hadiyya bible

Kobi'llishshi Kitaaba 27

¹Balli eeboo luwwa laqqoobee'i bikkina soodo ihoo luwwanne bakke'llitte.

²Keese mulli manni galaxxona bagaan ki suuminne ki gaga galaxxititte; keese mulli manchi birona bagaan ki gaga bittitte.

³Kinii shashsharii kee'mmaalla; ihukkaarem qawwi manchik quunqi lamiinsim loboka kee'mmaalla.

⁴Quunqi mongaa nadajjaa eebookko; ihukkaarem to'achchi quunqiinsi lophphookko.

⁵La'amaakkoo axeerimmi maaxamaakkoo iittiinsi e'llookko.

⁶Iitti manchi aphphisimmi eroomminatte; ihukkaarem diinakkichchi suunqimmi hawwojjinatte.

⁷Goddu manchina maraphphi damaamim xee'ooyyo; ihukkaarem sibaaru manchina qaraaroo luwwim xee'ookko.

⁸Ixxi mine fataku manchi do'nna uraa qee'l beyyo bararu ciikkichchisa hawwookko.

⁹Shitto'ii enje'oo aduruusii manna liiransoo'isam beshichchi sogitanim wodano liiransookko.

¹⁰Ki beshichcho te'im kiyyannika beshichcho xadditte; keesenne hawwi afoo ammane kiyyabbaayyika hara'mmato xa'mmititte; qee'llonne yoo abbaayyiinsi abbisonne yoo ollakkichchi e'llookko.

¹¹I beeto, qoor ikkilas an liiramoommo; eese gadoo keenina hundinam dabachcha uwweena xanoommo.

¹²Qoor manchi hawwi waaroo ammane moo'aa maaxamookko; ihukkaarem qoossimbee'i manchi hawwonne aaga lasonne saxxookko.

¹³La'oobee'i manchina lubbato aagu manchika eddechcha dabe; koyyiinchi manchinam lubbato aagu manchika amaxxa amade.

¹⁴Daranne sagara iimaa'aa ixxi beshichcho maasse'oo manchi duumukkaannisa xigamookko.

¹⁵Nunnuraanchi meentichcho xee'n ammane uroobee'i cophisa.

¹⁶Hafachcha uullisakkeenaa zayta anginne foocakka'a amadakkeenaa xanakkambee'isam ise woccambee'isam egedakkeena xanakkamoyyo.

¹⁷Xaar xaara qareesoo'isam manni manninne exxoo ammane losano siixxookko.

¹⁸Odakkichcho axisukkuuyyi egeroo manchi misha itookko; ixxi moollannika ijaajo egerookkokim lomba siidookko.

¹⁹Wo'i gagmoo'ixxisa illi kollo moo'isoo'isam manni wodanim gagmoo'ixxisa ihaa gaqqi woronne yoo haalata moo'isookko.

²⁰Lehii Si'oolii goddaammoo yoo bee'isam mannik illi moo'aa goddooyyo.

²¹Birii worqii giirinne keenamoo'isam mannikim eroommi manni uwwoo galatinne keenamookko.

²²Hurbaata mooyye'enne cuphinne tumakkamaannisam qawwa biccinne lehooqaxa gantita'nnim qawwoom ixxeensi laa'ooyyo.

²³Ki gereebbika hagara qoossitaa la'e; kiikkam fooraam diinate abooyye.

²⁴Mashka'oomim amaxxi heer heerina hee'ooyyo; adillanim qaranchiinsi qaranchanne afeebe'e qoxxaa hee'ooyyo.

²⁵Gogaalli hixe murakka'a aashaalli hix mutoohaaree duu'n hixim wixxoohaaree

²⁶ki gereebbi eddechchina ihoo odda uwwookko; ki fella'innem abuulli uulla aa'llootto.

²⁷Gatu qax fella'i odim kiina, ki abaroosinaa ki mi'n baxaaninaa awwaadoo ado uwwookko.