Read Hadiyya Kobi'llishshi Kitaaba 28 Bible Online

Kobi'llishshi Kitaaba 28 - Hadiyya bible

Kobi'llishshi Kitaaba 28

¹Baaxiilaanchi ayyim holloo'n gibookko; ihukkaarem muccur manchi hobbichchisa baddoo'n hee'ookko.

²Mat uulli minaadab boqqoo ammane gassaan dutookko; ihukkaarem lachchii qoossimmii yoo awwonsaan hee'ulas lobakat ammanina qoxxaalli minaadab ihookko.

³Buxa wor amadoo awwonsaanchi hurbaata bi'isoo malaayyaam xee'nnisa.

⁴Seera egettambee'i keen baaxiilaano galaxxitamo; ihukkaarem seera egettam keen baaxiilaaninne uullixantamo.

⁵Jor keen hanqo'i oogato'o qoossitamoyyo; ihukkaarem Waa'a hassam keen hanqo'i oogato'o hundam qoossitamo.

⁶Boqqi googonne maroo godaanchiinsi miiqakkam luwwi bee'i googonne maroo buxichchi e'llokko.

⁷Seera egeroo beet qoora; ihukkaarem awwaad bee'i mannina beshichchi ihoo beet anna tuussiisookko.

⁸Qaro'ina liqaayyisimminnee malaayyinne bogimminnee amaxxa wixxaa'oo manchi buxina qishixxoo mulli manchina wixxaa'ookko.

⁹Seera macceeseena hasoobee'i manchika uunxato Waa'i shigigookko.

¹⁰Xabbeen keeno jor googonne awwonsoo manchi ixxi hinu barenne ixxi gagim ubookko; ihukkaarem muccur keen er luwwa lago aa'llamo.

¹¹Goddaanchi manchi hundi ammanem ixxi gaga qoor issaa xigookko; ihukkaarem qoossimmi yoo buxichchi eekka saarayyaa la'ookko.

¹²Muccur keen kaachcha siiddam ammane lobakat liiranchi ihookko; ihukkaarem baaxiilaan keen daannooma amaddam ammane minaadab maaxamookko.

¹³Baaxiilo maaxoo manchi latooyyo; ihukkaarem baaxiilo biiraa yookkokii la'mmaagge baxoobee'isa urookkokii haafite siixxookko.

¹⁴Hundem ammanem Waa'a baddoo manchi maasse'amaakkoohane; ihukkaarem wodano duudisoo manchi hawwonne ubookko.

¹⁵Bux minaadabanne monginne gassoo gassaanchi muunoo hobbichchisaa sibaaru tibbekkichchisaa.

¹⁶Qoossimbee'i gassaanchi mogaalli ihookko; ihukkaarem damiginne waaroo amaxxa saboo gassaanchik umur qeeraa'llookko.

¹⁷Manna shaakkoo manchi ixxi umu'l doolli hundannem gibukkuuyyi hee'ookko bagaan ayyim ixxo hincaa'ooyyo.

¹⁸Miiqakkam luwwi bee'i manchonne jor afooyyo; ihukkaarem boqqi googonne maroo manchi dangonnem ubookko.

¹⁹Ixxi uulla erisa baxoo manchi hurbaata goddaa itookko; ihukkaarem awwaad bee'i keeno awwonookkok buxukkisam hee'ookko.

²⁰Amma'nnamaakkoo manchi lobakkata maasse'amookko; ihukkaarem goddaanchi iheena gaaggaaboo manchi guzumo'amoo'n gatooyyo.

²¹Golo'immi eraneyyo; ihukkaarem mat mat manni tim hurbaatinaa yaa mulleka hawwodookko.

²²Idiidoo manchi goddaanchi iheena gaaggaabookko; buxoom qaqqisaa waaroo'isam qoossooyyo.

²³Suuminne qawwiisoo manchiinsi axeeroo manchi lasonne galaxxamookko.

²⁴Anniinsii amaansii game'aa «Baaxiilo baxummoyyo» yoo manchi bi'isoo kee'n beshichcho.

²⁵Idiidoo manchi wocancha ki'isookko; ihukkaarem Waa'anne amma'nnamoo manchina makkookko.

²⁶Ixxi gaganne bakke'oo manchi qawwa; ihukkaarem qooroominne daba'llamoo manchi joriinsi gatookko.

²⁷Buxichchina uwwoo manchina hanqatooyyo; ihukkaarem buxichcho moo'ukkuuyyim moo'ubee'aannisa ihaa higoo manchi duumamaakkoohan ihookko.

²⁸Baaxiilaan keen daannooma amaddoohaare manni maaxamookko; ihukkaarem ixxuwwi bi'llammaare muccur keen fikkaannitamo.