Read Hadiyya Kobi'llishshi Kitaaba 29 Bible Online

Kobi'llishshi Kitaaba 29 - Hadiyya bible

Kobi'llishshi Kitaaba 29

¹Lobakat ammane axeerakka'a daba'lloobee'i manchi dangonne iiqamookko; hore'em fayye'ooyyo.

²Er manni gassina doo'llamoo ammane minaadab liiramookko; ihukkaarem boqquwwi keen gassina doo'llammoo ammane minaadab u'nnamookko.

³Qoorooma iittoo manchi anna liiransookko; ihukkaarem saa'aan meento awwonookkok ixxi amaxxa guullookko.

⁴Adil hanqi egeramoo'isa issoo ammane minaadab gaaga'ookko; ihukkaarem manniinsi maqanxa aa'eena hasookkok gindookko.

⁵Ixxi beshichcho suuminne qawwiisoo manchi ixxi gaqqi lokkina qaasha qaashookko.

⁶Jor manchik boqqoom ixxenam qaash ihookko; ihukkaarem muccur manchi liiranchinne zammarookko.

⁷Muccur manchi buxika hanqa egerookko; ihukkaarem baaxiilaanchi manchi ixxuwwi bikkina sawwooyyo.

⁸Bolxitam keen hee'llam beero'onne jorancha fissitamo; ihukkaarem qoolluwwi quunqa siggissamo.

⁹Qoor manchi qawwinne fitamoo ammane qawwi manchi quuqookko te'im osarookko; usheexxatim hee'ooyyo.

¹⁰Manna shiteena hassam keen miiqakkam luwwi bee'i mancho sabbamo; ixxuwwim ee mancho shiteena hassamo.

¹¹Qawwi manchi woro'l quunqa hundam fissookko; ihukkaarem qoor manchi woronne maaxaa cawwookko.

¹²Mat awwonsaanchi qophphano macceesaa aa'ulas ixxi gassaan hundim damigaan ikkamo.

¹³Waa'i buxichchinaa buxichcho barche'e issoohaanninaa laminam gudaanchonne illina caakka uwwaakko.

¹⁴Buxichchina hanqa oogatoo adil qeeraa'l doolle gassookko.

¹⁵Sogimmii ganimmii oosina qoorooma uwwookko; ihukkaarem ijaajakka'a li'isakkobee'i qachchi ama tuussiisookko.

¹⁶Baaxiilaan gassitam ammane boqqoom lophphookko; ihukkaarem muccur keen ee kee'nneka ubimma moo'llamo.

¹⁷Ki beeto ijaajjilas kiina usheexxatoo xummaa uwwookko; ki wodanim liiramookko.

¹⁸Kaalti bee'ulas minaadab ti'llaakkoohan ihookko; ihukkaarem Seera egerookkok masse'amaakkoohane.

¹⁹Mat awwaadaancho sagarinne shaaqimmi xale'i dabarooyyo; la'uta'nnim daba'llooyyo.

²⁰Sawwoo'n gaaggaabaa wocoo manchiinsi qoossoobee'i qawwina neeyyat yookko.

²¹Mat manchi ixxi mi'n baxaancho oosoommaninnem heellisaa li'isulas lasaanchonne ixxena yoo luwwa hundam a'lleena heele'ookko.

²²Quuqoo manchi wocancha ki'isookko; qaqqiso quuqoo manchim lobakat baaxiilo baxookko.

²³Mancho ixxi bolxoomim sholliisookko; ihukkaarem ixxi gaga hoffiisoo manchi lomba siidookko.

²⁴Gamaanchina beshichchi ixxi gaginam diinakkichcho; hidiisakkota'nnim hanqa wocooyyo.

²⁵Manna baddimmi hawwonne ubbuusookko; ihukkaarem Waa'anne bakke'ookkok xumminne hee'ookko.

²⁶Lobakat manni gassaa'n hara'mmato hasookko; ihukkaarem manni hanqo'i oogato'o siidookkok Waa'iinsette.

²⁷Muccur manchi baaxiilaancho shigigookko; baaxiilaanchim xabbeen googonne taakke'oo mancho shigigookko.