Read Hadiyya Kobi'llishshi Kitaaba 3 Bible Online

Kobi'llishshi Kitaaba 3 - Hadiyya bible

Kobi'llishshi Kitaaba 3

¹I beeto, i seera xadditte; ki wodanim i ijaajo egerona.

²I seer lobakat doolluwwa, qeeraa'l umuraa xummaa edaa uwwookko.

³Amma'nnantaattoohaannoomii hanqii kiinniinsi qee'lloone; ki gaanjenne ka'lle; ki woda'n illichchonnem kitaaphphe.

⁴Eekka issitittaare Waa'i illagennee manni illagennee danaam nuuraa sadoo siiddootto.

⁵Ki wodaninne hundinnem Waa'anne amma'nne; ki lachchannem bakke'llitte.

⁶Ki googonne hundannem Waa'a la'e; ixxim ki googo xabbaa'ookko.

⁷Ki gaginnem «An qoora» yititte; Waa'a badde; jor baxiinsi qee'lle.

⁸Eehid ikkittaare ki orachchina fayya'ooma uwwookko; ki miqem qoxxisookko.

⁹Kiina yoo horinnee ki uullanne mishu hurbaaxxeka ludo uwwimminnee ki waa'a lonse.

¹⁰Eehid issittaare ki gootar hurbaatinne wo'mmookko; woyi'n misha ciinsitoo barennem diqaas wo'mmaa gatookko.

¹¹ I beeto, Waa'i keese sogoo ammane gadditte; axeeroo ammanem qaraaraalli ikkitte.

¹²Anni iittoo beeto shaaqoo'isam Waa'im iittoo mancho shaaqookko.

¹³Qoorooma siixxu manchii qoossimmam ixxi diinat issu manchii maasse'amaakkoohane.

¹⁴Ee bikkina qooroom biriinsi lophphoo tirfa siidisookko; worqiinsi e'lloo awwaadom uwwookko.

¹⁵Inqu yakkam bito xee'aalli luwwiinsim lophphookko; at siiddeena mixxoo luwwi hundim qooroominne gudeena xanooyyo.

¹⁶Qooroom qeeraa'l umura uwwookko; amaxxaa lombam edaa uwwookko.

¹⁷Hee'llootti heechcha hundam liiranchinnee xumminnee hee'lloo'isa issookko.

¹⁸Qoorooma amaxxito'i keen hanqo'i heechcha siixxitamo; qoorooma ixxuwwi gaqqan issito'i keen hundim massaammuwwa.

¹⁹Waa'i ixxi qooroominne uulla qooccukko; ixxi lachchinnem iimane qoxxisukko.

²⁰Waa'i ixxi qooroominne uulliinsi wo'o fissukko; duubim uullina xeena uwwoo'isa issukko.

²¹I beeto, qooroomii qoossimmii kiinniinsi qee'lloone; ixxuwwam qoxxissaa amaxxe.

²²Ki foorinam heechcha uwwookko; ki gaanjinam wereeggi ihookko.

²³Ee ammane mattootti googo hundam baddimmi bee'eka amma'nnantaa mattootto; ki lokkim qolamooyyo.

²⁴Iinse'lloo ammane badditooyyo; hiimooma hundoomam xee'oo diriichcha diriittootto.

²⁵Dangonne afoo hawwoo baaxiilaanonne waaroo bichchaa badditooyyo.

²⁶At Waa'anne amma'nnitoo bikkina ki lokkim qaashi woronne amadamoobee'isa egerookko.

²⁷Hawwu manchina hara'mmiteena ki malaayyi xanukkuuyyi eroomma issimma uttitte.

²⁸Hawwu ki ollakkichchina hara'mmiteena xantittuuyyi «Soodo daba'lle; soodo uwwoommo» yititte.

²⁹Ki ollakkichchi keesenne amma'nnamaa hee'ukkuuyyi ixxonne jor baxo baxxeena sawwititte.

³⁰Keese hawwodubee'i manchinne kora'am kasaxxantitte.

³¹Damigoo manchonne to'achchititte; baxoo jollam awwontitte.

³²Waa'i jora baxoo keeno ha'yyooyyo; ihukkaarem wodano xabbeen keeno erisa iittookko.

³³Waa'i jora baxoo kee'n minenne duuncha eebookko; ihukkaarem xummaan kee'n mine maase'ookko.

³⁴Waa'i gadoo keeno gadookko; ihukkaarem maashaalli keenina nuura uwwookko.

³⁵Qoolluwwi keen lomba a'llitamo; ihukkaarem qawwuwwi keen sholle'nna edde'llamo.