Read Hadiyya Kobi'llishshi Kitaaba 30 Bible Online

Kobi'llishshi Kitaaba 30 - Hadiyya bible

Kobi'llishshi Kitaaba 30

¹Maasa'a yakkam uulli manchi Yaaqe'i beet Agur Iiti'eelinaa Ukaalinaa

²«An hanqo'isam manniinsi hundiinsim lachbee'i mancho; mannina yoo qoossimmim iina bee'ane.

³An qoorooma hore'em losummoyyo; Waa'i bikkinam la'oommi luwwi mahim bee'e.

⁴Iimane firaa dillukkok ayyette? Hafachcham anginne foocukkok ayyette? Wo'om eddechchanne guddaa amadukkokii uullikam tochcho qoxxisukkokii ayyette? Laqqoohan ihulas ixxeka summa kure? Ixxi beet sumdu ayyette?

⁵Waa'ik sagar hundim kurakkam luwbee'ane; ixxim bakke'llam keenina hundinam agira.

⁶Waa'i sagaranne ma'lluwwam edditte; eddilas keese axeerookko; qophphanaanchi ikkittisam caakkisookko» yukko.

⁷Waa'a! An kiinniinsi lam luwwa uunxoommo; leheembee'em uwwitoo'isina hasoommo.

⁸Manna qawwiisimmaa qophphano wocimmaa iinniinsi qeesse; buxoomaa goddaa uwwititte; ihukkaarem iina ammanina ihoo qax hurbaata uwwe.

⁹Mashka'oomim goddaa «Waa'i ayyette?» yaa keese lagoombee'isa; buxaammatim game'aa ki summinne qophphanonne hide'oombee'isa.

¹⁰Ixxi keese duumoobee'isaa hawwi keesenne afoobee'isaa awwaadaancho ixxi moollanni illagenne hamtitte.

¹¹Anna duumookkokii amam maasse'oobee'i qaranchii yookko.

¹²Ixxi gagina muccura labukkuuyyi haashaaranchiinsi annanni ihoo'n yoo qaranchi yookko.

¹³Bolxoominne wo'mmaa manna gadoo qaranchi yookko.

¹⁴Buxaa uulliinsi, hawwaanom manni lambe'iinsi bi'iseena inqi bisa'isa gaangeerim billawwisa qare'aakkoo qaranchi yookko.

¹⁵Urullichchina «Uwwe, uwwe» yitu'uuyyi laattam lam landi yo'o. Ee'isam goddoobee'ek sas luwwi yookko; soo'llekim ihookko yimma la'oobee'ane.

¹⁶Ixxuwwim «Waamma, alceenni meentichchi goosa, xeena goddoobee'i gogaalli uullaa ihookko yoo bee'i giiraa».

¹⁷Anna leencoohaannikaa amaka ijaajo gadoohaannikaa ille baalli woro'l qooraanti hinaa fissookko; goolluunsim itookko.

¹⁸Eese sas woshshi maalalsiisookko; soo'l woshsham hore'em qoosseena xanoommoyyo.

¹⁹Ixxuwwim «Gaaqichchi goog iimanenne hamashshichchi googim ki'n hanenne wongi'l goog wo'i hanenne manni goog danaam meentichchonne maqire».

²⁰Saa'aanchi meentichcho saa'lla'a lasage muccur mancho labba'a «Matem jollam baxummoyyo» yitamo.

²¹Sas woshshi mashka'inne uulli heekke'ookko; soo'l woshsham iyyeena xanooyyo.

²²Oo keenim agishshi adil ihoo ammanee ceemmaalli hurbaata goddoo ammanee.

²³Goonchi sabaakkoo meentichcho gooncho siiddam ammanee meentichchi agishsho moollama lago aa'llam ammanee.

²⁴Uullanne soor winxiriilichcha'i qooccanchuwwi yo'o; ixxuwwim erisa qoolluwwi keeno.

²⁵Cuum malaaybee'i qacaalla ihukkaarem itoo hurbaata billenne wixxaa'ookko.

²⁶Wexeex malaaybee'ane; ihukkaarem garoo beyyo ki'n farqaqanne baxookko.

²⁷Qawwaawwina adil bee'ane; ihukkaarem hundim ogoraamisa taakke'ookko.

²⁸Maanxogannichchi anginne amadamookko; ihukkaarem adilla'n minenne hee'ookko.

²⁹Danaam taakko taakke'llam sas qooccanchuwwi yo'o; soo'llek hore'em danaam taakko taakke'oohane.

³⁰Oo keenim «Diinatiinsi hundiinsim malaayyaamoo ayyem baddoobee'i hobbichcho;

³¹antabaa'i lambe'enne iggimminne taakke'oo argucho, fellakkichchi ambulaa minaadaphphi illagenne daphphaa'oo'n wocoo adilaa».

³²Ki qawwoom bolxitoo'isa issaakkoohaare te'im jor baxo baxxeena sawwitaattoohaare giphitaa sawwihe.

³³Ado gimmiishakkamaare buur firookko; sane cukkakkamaare xiig firookko; ee'isam quuqisimmi wocancha ki'isookko.