Read Hadiyya Kobi'llishshi Kitaaba 4 Bible Online

Kobi'llishshi Kitaaba 4 - Hadiyya bible

Kobi'llishshi Kitaaba 4

¹I ooso ki'n annika sogitano macceessehe; erisa macceessakkolas qoossimma siixxitakkamo.

²An losisoommi losan eran ihu bikkina i losano uttakkotte.

³An iyyanni minenne iyyanninne maqirem hee'oommi hoffi beet hee'ummo; iyyummanam matem beet hee'ummo.

⁴Iyyannim iina «I sagara kiihaanninne wo'm wodaninne macceese; i ijaajom egere; foorinnem hee'llootto.

⁵Qooroomaa qoossimmaa siixxiteena qoxxe; i suumiinsi firoo sagara xadditte; ixxeensim qee'llititte.

⁶Qoorooma uttitte; ixxim keese egerookko; qoorooma iitte; hawwodoo luwwiinsem keese daphphaa'ookko.

⁷Qooroom hundiinsim hanaan ihu bikkina qoorooma siixxe; kiina yoo luwwa hundam miqisoota'nnim qoossimma siixxe.

⁸Qoorooma iitte; ixxim keese iimiimaa'ookko; xishshaa'llaa amaddittaare lomba uwwookko.

⁹Lombi laakka kiina uwwookko; mishisoo adilla'n mare'em ki horoorenne issookko» yaa losisam hee'ukko.

¹⁰I beeto, macceese; an kuroommi woshsham aa'e; ki umurim qeeraa'llookko.

¹¹Qooroo'm googo moo'isummo; xabbeen googonnem keese awwonsummo.

¹²Qooroominne taakke'llilas qoloo luwwi hee'ooyyo; odim geettita'nnim qolantooyyo.

¹³I losishsha qoxxissaa amade; kiina heechcha uwwoo bikkina fatakitoobee'isa egere.

¹⁴Baaxiilaan kee'n googonne aaggitte; jor manni googonnem taakke'llitte.

¹⁵Eehido'i googiinsi qee'lle bagaan taakke'llitte; eehido'i googiinsi daba'llitaa ki gaqqi googonne mare.

¹⁶Boqquwwi keen jor baxo baxxobeelas iinse'llamoyyo; manna qoltobeelasim diriittamoyyo.

¹⁷Baaxii'l hurbaata ittamo; damiga baxxa'atim woyi'n diqaasa aggamo.

¹⁸Ihukkaarem muccur kee'n googo soodaraa'l caakki wo'm balli afeebe'e edukkuuyyi maroohaannisa ihookko.

¹⁹Baaxiilaan kee'n goog odim gambabbi tuunsisa ihu bikkina qolantamo; mah qoluda'em laqqeena xantamoyyo.

²⁰I beeto, an kiina kuroommi woshsha qoossitaa macceese; i woshsham qoossitaa macceese.

²¹I sagara hundem ammanem sawwihe bagaan ki illagiinsi qeessititte; ki wodanonnem ege'lle.

²²Mashka'oomim ee losano qoossoo keenina heechchaa ixxuwwi orachchinam fayya'oomaa uwwookko.

²³Qoxxissaatta ki wodano ege'lle; mashka'oomim heechchi bu'i firookkok ixxeensette.

²⁴Jor woshshi ki suumiinsi firoone; qophphanoo qawwiishshaa kiinniinsi qeesse.

²⁵At moo'lloo'is xabbeen ihona; makkannee qeddannee daba'llitoobee'isa illage moo'e.

²⁶Ki lokki maroo googo xabbaa'llilas ki sawwit wo'mmookko.

²⁷Makki kollonnem qeddi kollonnem mattitte; ki lokkom jor kolliinsi dabare.