Read Hadiyya Kobi'llishshi Kitaaba 5 Bible Online

Kobi'llishshi Kitaaba 5 - Hadiyya bible

Kobi'llishshi Kitaaba 5

¹I beeto, i qoorooma erisa macceese; ki maccem i losanonne dabare.

²Eehid issitlas danaam haalat kiina hee'ookko; at woccoo woshshim keesenne lachchi yoo'isa moo'isookko.

³Saa'aanchi meentichchi suumiinsi maraphphi damaam taktakookkoka labookko; woccam woshshim buuriinsi loboka lii'llaalla.

⁴Ihukkaarem isek lasaanchi geneeno'i'nnoo'i qaraaraalla; lam qar bisa'i qaxam qare'aalla.

⁵Isek goog lehonne afisoohane; taakke'llam googim Si'oo'l kolli massoohane.

⁶Ise kora'am ekkidii kidii ikkamo bagaan heechchi googonne mattamoyyo; bi'llo'isam laqqamoyyo.

⁷Kabadem i beeto, macceese; kiina kuroommi woshshiinsim qee'llititte.

⁸Saa'aanchi meentichchoonsi qee'lle; is mi'n goocannem ihuta'n hincititte.

⁹Eehid ihubeelas ki lomba mulli manni massookko; harde'oomannem mogaalli manni anganne letootto.

¹⁰Ki amaxxa allaggi manni elleesookko; badattitti luwwi hundim mulli mannina ihookko.

¹¹Ki heechchi lasaanchonnem ki maarii ki mannoomii beeddoo ammane wi'llitootto.

¹²Atim «Losano aa'oombee'ekii manni axeeroohaare saboommokii mahinatte?

¹³I losisaa'n sagara macceesummoyyo; ixxuwwi sogitanom aa'ummoyyo.

¹⁴Ee bikkina manni wixxaakkoo dummichchanne bichchina hincummo» yitootto.

¹⁵Ki gaqqi bariinsii bu'iinsii firoo wo'o aggaa xeebo mu'llito'isa ki mi'n amana amma'nnanchinnee xale'i ise iittimminnee xeebo mu'lle.

¹⁶Ki wo'i bu'i kora'i biiranne, ki daajjim manni wixxoo beyyonne hundannem daadoo'isa issititte.

¹⁷Xale'i kiina awwaadona bagaan kiinninne maqire yoo koyyi manni baxxamoone.

¹⁸Kiikki bu'i maasse'amaakkoohan ihona; ki harde'oo'm meentichchonne maqirem liirame.

¹⁹Moo'akkeena quluxisoo gaallichchisaa mishsoo kukkussichchisaa ki mi'n amak dan hundi ammanem keese liiransona; isekim iitti ki xeebo murona.

²⁰I beeto, saa'aanchi meentichcho mahina iittitoolla? Mulli manchi meentichchom mahina qaaphphitoolla?

²¹Waa'i manni baxoo baxo hundam moo'ookko; maroo beyyi hundam moo'ookko.

²²Jor mancho ixxi gaqqi baaxiilim qaash ihaa amadookko; baaxii'l usinnem karamookko.

²³Ixxim qaxiinsi hanaan ihaakkoo qawwoominne taakke'oo bikkina googo huushamookko; ixxi gaga ege'llimma hoogimminnem lehookko.