Read Hadiyya Kobi'llishshi Kitaaba 6 Bible Online

Kobi'llishshi Kitaaba 6 - Hadiyya bible

Kobi'llishshi Kitaaba 6

¹I beeto, ki ollakkichchina lubbato aaglas mulli manchi bikkinam anga aphphissaa hide'llilas

²woccitti sagarinnem qaashantilas ki suumiinsi firu woshshinnem amadantilas

³i beeto, aagtitti lubbatiinsi ki gaga gatixxiteena hassilas lubbato aagtitti manchi beyyo qaqqissaa mattaa eddaa eddaa xa'mme; mashka'oomim at ki ollakkichchi anganne ubbaatto.

⁴Eekka issitoo'n iinse'llitte; usheexxatim kiina hee'oone.

⁵Kukkussichchi hochchaanchi angiinsi, ciikkichchim kiyyo'inne amadoohaanni angiinsi xoraa gatoohaannisa atim ki gaga gatixxe.

⁶Ate, ceemmaalli manch, cuunchiinsi losano masse; cuunchisam qoor manchi ihe.

⁷Cuunchina awwonsaanchi, ijaajaanchii daannii bee'e.

⁸Ihukkaarem itoo hurbaata billenne wixxaa'ookko; hurbaata wixxaa'akkam ammanenne itoo luwwa wixxaa'ookko.

⁹At ceemmaalli manchi diriittoottok hinki balli afeebe'e? Diriichchiinsem baqitoottok hinki balla?

¹⁰«Hofqaxam iinse'oommo; hofqaxam diriiroommo; i anga bakke'aa hofqaxam usheexxoommo» yitaa

¹¹iinsonne hee'llonam buxoom fangichchisa, hawwi odim bisa'a lamadonne lade'u manchisa dangonne ki beyyo waarookko.

¹²Awwaadbee'ekii mogaalli manchii beyyi hundam do'llu'uuyyi qophphano woccamo.

¹³Ixxim qawwiiseena illinne qaqqasookko; lokkinnem mare'e uwwookko; maxxarinnem moo'isookko.

¹⁴Boqqoom wodanonne yoo bikkina hundi ammanem hantaaro sawwookko. Manni lambe'ennem wocancha fissookko.

¹⁵Ee bikkina bichchi dangonne ixxonne afookko; dangonnem iiqamookko; fayye'immi neeyyatim hee'ooyyo.

¹⁶Waa'i ha'yyoobee'i loh luwwi yookko; hore'em ixxi shigigookkok lamar ihukkuuyyi oo keenim

¹⁷bolxoominne moo'oo ille, qophphano wocoo allabo, muccur manni xiiga dunoo anga,

¹⁸jor sawwite sawwoo wodano, jor bax kollonne geeroo lokko,

¹⁹qophpha'n naqaashaa abbaayyuwwi lambe'enne wocancha qooccoo manchoo Waa'i erisa sabookko.

²⁰I beeto, kiyyannika ijaajo egere; kiyyumma losissam losanom uttitte.

²¹Hundi ammanem ki wodanonne disse; ki gaanjennem kare.

²²Oo keenim mattoo goog hundannem awwonsookko; iinse'lloohaarem egerookko; baqitoohaarem atoorassookko.

²³Oo ijaajjuwwi shahisa, losanim caakkisa caakkisookko; sogitanim heechchi googonne awwonsookko.

²⁴Jor meentichchoonsii manni moolli are qawwiisseena woccam woshshiinsii ege'llitoo'isa issookko.

²⁵Iseka dano ki wodanonne mixxitte; isek illinne qaqqasimmim keese qeefadoone.

²⁶Saa'aanchi meentichchok bit mat xeffo'i qorosho'i qaxa; ihukkaarem mulli manchi meentichchonne saa'immi fooroomam bi'isookko.

²⁷Koofanne giira qaaphphaa eddechchi shokkoo'n gatookkok ayyette?

²⁸Gii'l kasharanne taakke'ukkuuyyi lokki shokkoobee'edu ayyette?

²⁹Manni moolli arenne iinse'oo manchim eehidette; ise tafookkok hundim guzumo'amoo'n gatooyyo.

³⁰Gamaanchi sibaaru ammane hurbaata game'uta'n mannina maalalsiisoohaneyyo.

³¹Amadamuta'nnim lam lamar suume miqookko; minenne yoo luwwi hundam miqookko.

³²Ihukkaarem meentinne maqire saa'ookkok tiir hanqataakkoohane; ixxi gaqqi foorem bi'ixxookko.

³³Aphphisanchii sholle'nnii ixxonne afookko; hundem ammanem sholle'nninne hee'ookko.

³⁴To'achchi mi'n annichchika quunqa ki'isookko; baado firoo ammanem qishixxooyyo.

³⁵Guzumo'o miqakkota'nnim ixxi aa'ooyyo; lobakat luwwa uwwitota'nnim araaramooyyo.