Read Hadiyya Kobi'llishshi Kitaaba 7 Bible Online

Kobi'llishshi Kitaaba 7 - Hadiyya bible

Kobi'llishshi Kitaaba 7

¹I beeto, iikka sagara egere; i ijaajom xadditte

²I ijaajo egere; foorinne hee'llootto; an losisoommi losanom ki ilbeetichchisa ege'lle.

³Ki maxxaarannem kare; ki woda'n illichchonnem kitaaphphe.

⁴Qoorooma kiyyaayyasa; qoossimmam ki iitti manchisa issitaa moo'e.

⁵Ixxuwwim saa'aanchi meentichchoonsii mulli manchi arem qawwiisseena woccam wociinsii keese egerookko.

⁶Balliinsi mat balla i mi'n maskootinne bii'l kolli moo'ummo.

⁷Lachchi bee'i manni lambe'enne harde'i ooso moo'ummo; ixxuwwi lambe'ennem tiir bee'i mat woraadichcho moo'ummo.

⁸Ixxim mat meentichchi mi'n gadaninne yoo googinne aa'aa higam hee'ukko; is mi'n kolli hooraatim maram hee'ukko.

⁹Oo ammanim uulli maaro'aa eelliinchi aageena hincaakkoo amman hee'ukko; hii'm tuunsim waaram hee'ukko.

¹⁰Ee lasage mat meentichcho saa'aan meenti edde'oo eddechcha edde'lla'a manna huushisseena quuxoo yita'a fitta'a ee beetinne edanto'o.

¹¹Isem iggaallattee mayyakki bee'i meentichchottee hee'llo'o; ise minenne afuurimma liirantambee'i bikkina hundi ammanem do'imma iittitamo.

¹²Googguwwanne, lobakat manni wixxoo beyyuwwannee lamejjuwwannee hundannem egettamo.

¹³Ee woraadichchom amadda'a suunqito'o; tuulla uunjita'atim

¹⁴«An kitima hincaa'immi hasisoohan hee'ukko. Ee bikkina kaballa an sagara aagummi uga'a hincaa'aammo.

¹⁵Ee bikkinam kiinninne exxeenaa keese haseenaa firaammo; keesem siixxaammo.

¹⁶I ara'annem Gibxi uulliinsi eebakko'oo mishisoo eddechcha dahaammo.

¹⁷Ixxonnem karbe'e, almuuna, qarafaa yakkam enje'oo luwwinne baxamaakkoo shitto'oo kifaammo.

¹⁸Waare, hiimo hundoomam iittinne xeebo mu'llinona; qaaphphammaatim liirammona.

¹⁹Mashka'oomim i mi'n anni minenne bee'e; qee'l uulla maraakko.

²⁰Gonoonanne lobakat kin bira amadaakkoo bikkina lam saanti afeebe'e daba'llooyyo» yito'o.

²¹Eehid yita'a lellishshu'uuyyi huushamoo'isa issito'o; danaamo woccu'uuyyam qawwiisso'o.

²²Mirgo'i durakkona ushe'amoohaannisa gaallichchim gaaggaabaa maraa qaashanne aagoohaannisa ixxim gaaggaabaa ise laseesaa marukko.

²³Ciikkichchi kiyyo'onne aageena gaaggaaboohaannisa ixxi foor bichchina maroo'isa la'oobee'i bikkina xiyyi afare diqeebee'e la'ukkoyyo.

²⁴I beeto, macceese; an kiina kuroommi woshsha erisa macceese.

²⁵Ki wodan ee meentichchi kollonne maroone; is googonne mattaatim huushantitte.

²⁶Qassa'a ubbuusso'i keen lobakata; is mashka'inne lehu kee'nnekim xig duta.

²⁷Is mi'n goog Si'oo'l kolli hooraa massoohane; gundannem lehonne afisoohane.