Read Hadiyya Kobi'llishshi Kitaaba 8 Bible Online

Kobi'llishshi Kitaaba 8 - Hadiyya bible

Kobi'llishshi Kitaaba 8

¹Macceessehe; qooroom weeshoolla; qoossimmim sagara iimaa'aa macceesisoolla.

²Gooqqi gadanonne yoo duunnuwwannee gooqqi lamejjuwwannee uullookko.

³Beero'o aaggakkam gooccuwwi gadanonne sagara iimaa'aa

⁴«Manna, an ki'nnuwwa hundam weeshaammo; uullanne yoo manna hundam weeshaammo.

⁵Ki'nnuwwi lachchi bee'i keen lachcha bitaa'llakkeena lossehe; qawwuwwi keenim qoossimma ki'nnuwwi wodanonne dissehe.

⁶Awwaadoo woshsha wocoommi bikkina macceessehe; An xabbeen woshsha woceena i suume fooqaa'aammo.

⁷I suum hanqa wocookko; anim qophphano ha'yyoommoyyo.

⁸I suumiinsi firoo sagar hundim hanqa; matem boqqoomii huushansoo luwwii bee'ane.

⁹I woshshi qoossimmi yoo manni hundinam caakka; lachchi yoo manninam xabbeena.

¹⁰Biriinsi loboka i sogitano aa'llehe; muccur worqiinsem loboka lachcha doo'llehe.»

¹¹«Mashka'oomim an qooroom kashar inqu'iinsi lophphoommi bikkina Ki'nnuwwi mixxakkam luwwi hundim iinninne gudooyyo.

¹²Eesenne qooroomanne qoossimmi yookko; lachchii xabbeen sawwitii iihane.

¹³Jor luwwa sabimmi Waa'a baddimma; an bolximmaa tobbe'immaa, odim jor googoo qophpha'n sagaraa ha'yyoommoyyo.

¹⁴Sogitanii er qooroomii iinniinsi siidamookko; qoossimmii malaayyii i keeno.

¹⁵Adilluwwi danaamisa gassitamisinaa daannuwwim gassitam er seera fissitamisnaa hara'mmoommok anette.

¹⁶Gassaanii oogataanii minaadaba awwonsitamok an hara'mmoommaarette.

¹⁷An eese iittitam keeno iittoommo; eese erisa hassam keenim siixxitamo.

¹⁸Goddii lombii i beyyonne yookko; lobakat horii makkii iinniinsi uwwamookko.

¹⁹Iinniinsi siiddakkam mishim muccur worqiinsii doo'llamaakkoo kin biriinsii e'llookko.

²⁰An muccuroo'm googonnee hanqo'i googonnee taakke'oommo.

²¹Eese iittitam keenina godda uwwoommo; ixxuwwi minem amaxxinne wonshoommo.

²²Waa'i eese hundem luwwiinsim gaassaa qooccukko; gaassiinsim ixxi baxina luxxan issukko.

²³Uulli qooccamoo'nnim illageen heer heeriinsim gaassaa doo'llamummo.

²⁴Cambalaq qooccamoo'nnii wo'i bu'uwwim fooqoo'nnii illageen an qaramummo.

²⁵Duunnuwwiinsi illageen hoffi duunnuwwiinsim gaassaa qaramummo.

²⁶Waa'i uullaa uullanne yoo luwwaa hundam qoocceena illageen te'im uullanne yoo buchcha qoocceena illageenim qaramummo.

²⁷Waa'i iimane biddiqaa'u ammane cambalaq hanennem iima'n lugumo kaasu ammane an ee beyyonne maqirem hee'ummo.

²⁸Duuba iimanenne hee'oo'isa issu ammane cambalaq bu'uwwam fooqaa'u ammane

²⁹dambalaqinam tochchi hee'oo'isa issu ammane wo'im ixxi ijaajiinsi higoobee'isa uulli lugu'mmeka gabala axisu ammane

³⁰an ee ammane ixxi beyyonne luxxi baxaanchi hee'ummo; ballina ballina ixxo liiransam hee'ummo; ixxi illagennem hundi ammanem liiramam hee'ummo.

³¹An Waa'i qooccu uullanne liiramoommo; manni shumo'onnem lobakata liiramoommo.»

³²«Kabadem i ooso macceessehe; i googo egettam keen masse'anto'oo keeno.

³³I losano macceessehe; qoolluwwi ikkehe bagaan innaannitakkotte.

³⁴I woshsha macceesookkok maasse'amaakkoohane; I mi'n goocanne ballina ballina qoxxaa hee'ookkok I mi'n goocannem eese egerookkok maasse'amaakkoohane.

³⁵Eese siixxukkok heechcha siixxookko; Waa'iinsim nuura siixxookko.

³⁶Ihukkaarem eese siixxubee'ek ixxi gaga hawwodookko; eese sabbam keen hundim leho iittitamo» yaa laaroolla.