Read Hadiyya Kobi'llishshi Kitaaba 9 Bible Online

Kobi'llishshi Kitaaba 9 - Hadiyya bible

Kobi'llishshi Kitaaba 9

¹Qooroom ixxi mine baxukko; lamarem utubbuwwam uullisukko.

²Baa'lmoora durukko; woyi'n diqaasam lubukko; itakkam maaddam gudisukko.

³Ixxeka baxaan meento asse'aa beero'aannonne qoffit beyyonne uullita'a

⁴«Ki'nnuwwi lachchi hanqatu keen hundim kid waallehe» yita'a weeshshamisa issukko; qawwi keeninam

⁵«Waallehe, gudisummi maadda ittehe; lubummi woyi'n diqaasam aggehe.

⁶Lachchi hoonga uttakka'a foorinne hee'llehe; qoossimmi yoo googonnem taakke'llehe» yookko.

⁷Bolxoo mancho sogookkok ixxi gagina game'llato eebaqqookko; baaxiilaanchi mancho sogookkokim sholle'nna siixxookko.

⁸Bolxoo mancho soggilas keese sabookko; ihukkaarem qoor mancho soggilas keese iittookko.

⁹Qoor mancho losise; qoorooma edaa siixxookko; muccur mancho losise lachcha edaa siixxookko.

¹⁰Qooroomina illag Waa'a baddimma; keesammam la'immim qoossimma.

¹¹I mashka'inne ki umur qeeraa'llookko; ki heechchi doollennem hiinchuwwi exxookko.

¹²Qoor ikkilas oo qooroom kiina haraa'mmookko; bolxitoohan ikkilas ki gaga hawwoddootto.

¹³Lachchoongi meentichcho wocaamotte; ise eedim ti'llito'ookkotane ikko'i bikkina maham laqqamoyyo.

¹⁴Isem is mi'nnaannonne goocanne afuuttamo; ise beero'aannonnem qoffit beyyonne barcumanne afuuttamo.

¹⁵Googinne higoo keenoo ixxuwwi googom xabbita'a mattam keenoo weeshsha'a

¹⁶«Ki'nnuwwi lachchi hanqatu keen i beyyo waallehe» yitamo; qawwuwwi keeninam

¹⁷«Game'akka'a agakkam wo'i xee'ookko; maaxakka'a itakkam hurbaatim liiransookko» yitamo.

¹⁸Ihukkaarem ixxuwwi is mine matto'i keen hundim leto'isaa kabadem is mine aaggam keen Si'oola dillitamisaa laqqamoyyo.