Read Hadiyya Hayyo'i Kitaaba 1 Bible Online

Hayyo'i Kitaaba 1 - Hadiyya bible

Hayyo'i Kitaaba 1

¹Yerusaaleemanne adil ihaa hee'u Daawiitik hayyo'i beet wocu woshshi kane.

²Oo hayyo'im luwwi hundim awwaad bee'ane; awwaad bee'immiinsim awwaad bee'ane; horem awwaad bee'ane.

³Manchi beet ka uullanne badaroo badachchi hundiinsim siidoo luwwi maruchcho?

⁴Mat qaranchi beeddoohaare mulli qaranchi waarookko; ihukkaarem ku uulli doolli hundinam hee'ookko.

⁵Eelliinchi firaa aagookko; odim firoo kollonne afeena qare'ookko.

⁶Hafachchi hanaa'n qarannem woroo'n qarannem hafachchookko; do'aa do'aa odim woddaa'i kollonnem daba'llookko.

⁷Daajjuwwi hundim dambalaq kollonne daadookko; ihukkaarem dambalaqoom hore'em wo'mmooyyo; wo'oom daba'llaa woddaa'i ki'u kollonnem marookko.

⁸Luwwi hundim mishisooyyo; mishisoobee'an ihukkisam manni sagarinne caakkisaa kureena xanooyyo; illim moo'aa goddooyyo; maccim macceesaa iina ihookko yaa xanooyyo.

⁹Gaassi ihu luwwi odim ihookko; kaba ihoo luwwi hundim gaassim ihukkane; ee bikkina heer uullanne hundannem haareechchi luwwi mahim bee'e.

¹⁰Ayyi manchim ‹Kuk haareechchi luwwa!› yuta'n oo luwwi neese qarammeena illageenim hee'ukkan ihaa siidamookko.

¹¹Gaassi hee'u luwwi hundinam sawwixxi mare'e ihoo luwwi bee'e; odim lasonne hee'oo luwwikim ee lasagenne waaroo qaranchina sawwixxi mare'e ihoo luwwi siidamooyyo.

¹²An hayyo'i manchi Yerusaaleemanne Isra'ee'l minaadabina adil hee'ummo.

¹³Ka uullanne issamu luwwi hundam qooroominne saarayyeenaa soroobeenaa murte'ummo; Waa'i ka kee'mmaalli iyyo manni badaroo'isina uwwukko.

¹⁴Ka uullanne baxamu luwwi hundam moo'ummo; ihukkaarem hundem luwwim awwaad bee'anee hafachcham awwonimmaa.

¹⁵Boqqi luwwi xabbeena xanooyyo; bee'i luwwim xigamooyyo.

¹⁶Anim i wodanonne «Iinniinsi illageen Yerusaaleemanne hee'u manni hundiinsim loboka qooraammo; i wodanim lobakat qooroomaa lachchaa la'aakko» yummo.

¹⁷Ee bikkina lobakat qoorooma, machchaallee qawwoomaa annanni issaa la'eena i tiironne murte'oommo; ee lasage oohim hafachcha awwonimmi ihukkisa xassummo.

¹⁸Qooroom lophphu qaxanne kichchechchim lophphookko; lachchi lophphoohaarem u'n exxookko.