Read Hadiyya Hayyo'i Kitaaba 10 Bible Online

Hayyo'i Kitaaba 10 - Hadiyya bible

Hayyo'i Kitaaba 10

¹Lehu biimbe'i axisakko'i enje'oo zayixxi shitto'o bobsoo'isa hofqax qawwoom qooroomaa lombaa bi'sookko.

²Qoor manchik wodan makki kollonne mashkollookko; ihukkaarem qawwi manchi wodan qeddi kollonne mashkollookko.

³Qawwi taakke'oo goog hundannem sawwitbee'e taakke'ookko; manni hundinam ixxi qawwooma la'isookko.

⁴Ki daanni keesenne quuqoo ammane ki bax beyyo fatakititte mashka'oomim sa'itaa egettittaare lobakat bi'ishshim yoota'n haafite siiddeena xantootto.

⁵Ka uullanne moo'ummi mulli jollim yookko; oohim ka uulli gassaan baxoo huushammato.

⁶Ceemmaalli keen lob beyyonne afuuttu'uuyyi goddaan hoffi beyyonne afuutto'o.

⁷Agid faradonne saa'llita'a ihukkaarem Moollanno'i agixxisa lokkinne matu'uuyyi moo'ummo.

⁸Bare hinookkok ixxi gagim ee barenne ubeena xanookko; qasha gindookkokam hamashshi qaseena xanookko.

⁹Kina anookkok anu kininnem ixxi gaga hawwodookko; haqqa anookkokim anu haqqinnem mada aa'ookko.

¹⁰Xaar juujoohaare qareesakkobeelas lobakat malaayye fissiisookko; ihukkaarem qooroominne baximmi er misha siidimmina hara'mmookko.

¹¹Gennaanchi hamashshichchi qasaa lasage gennukkaare ixxi gagina siixxoo luwwi bee'e.

¹²Qoor manchi ixxi qooroominne lomba siixxookko; ihukkaarem qawwi manchi ixxi suu'm wocinnem bi'ookko.

¹³Qawwi woc qawwoominne asheeramaa lobakat machchaallinne goollamookko.

¹⁴Qawwi woshsha lonsookko. Manchi lehaa lasage ixxena mah ihoolda'e kureena xanookkok ayyim bee'e.

¹⁵Qawwi baxoo bax ixxi gaga hoogisoo bikkina beero'o marakkam googo qoossooyyo.

¹⁶Ooshshichchi adilii daram maadda ittu'uuyyi dimbitam gassaanii yoo uullina aayye.

¹⁷Wolabbaninne li'aakkoo adilii dimbimminatti ihoo'n xale'i malaayyee qoxximmaa siidimmina ihaakkoo ammane ittamii aggam gassaanii yoo uulli maasse'amaakkoohane.

¹⁸Manchi ixxi garoo mine qoxxisimma uraa innaannulas mi'n iiman laphookkoo cophookkomee.

¹⁹Itakkam hurbaatinnee woyi'n diqaasinnee makkii liiranchii siidamookko; ihona bagaan oo hundim diinat bee'e siidamooyyo.

²⁰Macceesookkok bee'e yitaa maaxaqqannettem ihuta'n adila hamititte; ara'anne iinse'llaatim goddaancho game'llititte; maaxaqanne wocci woshsha macceessam keen ladaam cii'ichchisa baratta'a kutteena xantamo.