Read Hadiyya Hayyo'i Kitaaba 11 Bible Online

Hayyo'i Kitaaba 11 - Hadiyya bible

Hayyo'i Kitaaba 11

¹Lobakat amma'n lasage dabattaa siiddoo bikkina at ittoo hurbaata wo'onne ubbuuse.

²Waaroo doollenne ka uullanne hinkido'i jolli ihooda'e laqqoobee'i bikkina kiina yoo amaxxa lamar te'im sadeenti beyyonne baxxansitaa disse.

³Duub lobakat wo'o amadaa lasage xeen uullanne ga'nnookko; haqqi woroo'n qarannem ihukko hanaa'n qaranne ubulas ee ubu beyyonnem dufaa hee'ookko.

⁴Hafachcha egerookkok wixooyyo; duuba moo'ookkokim murooyyo.

⁵Hafachchi hafachchoo'isaa manni foorim am godabonne hinkid asheeroda'ee laqqoobee'isam luwwi hundam qooccu Waa'i ixxi baxo hinkid baxooda'e laqqeena xantooyyo.

⁶Wixxittok hundim mutooda'e mutooyda'e,, hinki wix duuha'i e'llooda'ee annanni issitaa laqqoobee'i bikkina daram ihukko maaro'o sire'e wiximma uttitte.

⁷Caakki danaamo; eelliincho moo'immi illina mishisookko.

⁸Manchi beet lobakat umura foorinne hee'ulas umu'l doollenne ka uullanne ihoo luwwi hundim awwaad bee'an ihukkisaa lobakat tuunsim egeroo'isaa xadoone.

⁹Ate woraadichcho! Ki woraadda'n doollenne ki wodan liiramona; ki wodan mixukkokaa ki illim moo'ukkokaa hundam isse. Ihukkaarem issitti luwwi hundi bikkinam Waa'i keesenne oogatoo'isa la'e.

¹⁰Woraaddanii harde'oo'm qoxallanii qaqqisom higoo bikkina kichchechchaa u'nnaa ki wodaniinsi hoore.