Read Hadiyya Hayyo'i Kitaaba 2 Bible Online

Hayyo'i Kitaaba 2 - Hadiyya bible

Hayyo'i Kitaaba 2

¹Anim i wodanonne eran ihu luwwa la'eenaa i gagam liiranchinne keeneenaa sawwummo; ihukkaarem ookkim awwaad bee'an ihaa moo'ummo.

²Osachchi qawwooma; liiranchim awwaad bee'an ihukkisa qoossummo.

³Manchi beet ixxi heechchi doollenne ka uullanne baxoo er luwwi mada'e ihukkisa la'eembe'e i wodan qooroominne eese awwonusukkuuyyi i gaga woyi'n diqaasinne liiransoommisina i wodanonne qawwooma sawwummo.

⁴Odim eehanniinsi lophphaakkoo baxo baxummo; oohim minneewwa baxummo; woyi'n kaashsham kaasummo.

⁵Annanni annanni mish haqqina, fiittuwwinaa duubbi kaashshinaa beyyo gudisummo.

⁶Kaasummi haqqinam wo'o agiseena awwaadoo qoqqoba qoqqobummo.

⁷I minenne qaramaa hee'u agidduwwiinsi mulleka goonaa landi agidoo edaa bitaa'ummo; odim iinniinsi illageen Yerusaaleemanne hee'llo'i keenniinsi hundiinsim lophphoo fooraam diinate ho'llummo.

⁸I gaginam biraa worqaa adilla'n mi'nnekaa an gassoommi uullikaa amaxx hundam wixxaa'ummo; eese diraansoo goona, landaa ee'isam goona liiransoo lobakat meentom i gagina wixxaa'ummo.

⁹Anim iinniinsi illageen Yerusaaleemanne hee'llo'i keenniinsi hundiinsim lophphummo; i qooroomim iinninnem hee'ukko.

¹⁰I illi moo'ukkokaa i wodan mixukkokaa hoorummoyyo. I gag liirameena hasoo luwwam siixxeena hoorummoyyo; an yakaa baxummi luwwanne hundannem liiramimmi iina bikki hee'ukko.

¹¹I angi baxu baxoo yakitee hundam moo'ummo; odim oo hundim awwaad bee'anee hafachcham awwonimmisaa hee'ukko; ee bikkina eelliinchiinsi woroon siidakkam luwwi mahim bee'isa moo'ummo.

¹²Anim qoorooma, machchaallee qawwoomaa saarayyaa la'eena hasummo; illageen baxamukkaanniinsi mulleka mat adi'l lasonne waaroo mulli adil maha baxeena xanookko?

¹³Odim tuunsiinsi caakki e'lloo'isam qawwoomiinsi qooroom e'lloo'isa moo'ummo.

¹⁴Qoor manchik illi ixxi horoorennette; ihukkaarem qawwi manchi tuunsonne taakke'ookko; ihona bagaan lamikim lasaanchi sharad mat ihukkisa moo'ummo.

¹⁵Ee bikkina i wodanonne «Qawwanne afookkok eesennem afookko; eehannah kaa'nna qoor ihimmi iina maha awwaadookko?» yummo. Ee ammanennem i wodanonne «Kuhim awwaad bee'ane» yummo.

¹⁶Qoorim qawwisam heer heerinam tiiramoobee'i bikkina waaroo doollenne lamim xadantamo. Mashka'oomim qoorim qawwisam lehimmi hosoobee'ane

¹⁷Ee bikkina uullanne baxamoo bax hundim kichche'isoohan ihu bikkina heechcha shigigummo; oohim qishirchoo hafachcham awwonimmisaa.

¹⁸An ka uullanne badarummi luwwi hundim iinniinsi lasonne waaroo manchan ihoo bikkina luwwi hundam an shigigummo.

¹⁹I lasonne waarookkok qoor manchida'e qawwi manchida'e la'isooyyo. Ihona bagaan an i qooroominne badaraa wixxaa'ummaannonne hundannem annichchi ihookko; oohim awwaad bee'ane.

²⁰Ee bikkina uullanne badarummi luwwanne hundannem an neeyyato muraammo.

²¹Manchi beet qooroominne, lachchinnee malaayyinnee badaraa lasonne badarubee'i mullaannina uraa marookko. Ookki odim awwaad bee'anee kee'mmaalli hawwodanchaa.

²²Eehan ihulas uullanne badaru badachchinaa tii'l kichchechchinaa manchi beet siidoo luwwi maha?

²³Hee'oo doolli hundannem ixxi bax hawwoo kichchechchaa ihu bikkina ixxi tiirim hiimo diriirooyyo; oohim awwaad bee'ane.

²⁴Manchi beetina itoohaanniinsi, agoohaanniinsii ixxi badachchannem liiramoohaaniinsii bagaan ixxena e'lloo luwwi bee'e; oohim odim Waa'i angiinsi uwwamukkisa moo'ummo.

²⁵Waa'i doo'l ihubeelas ayyi iteenaa liirameenaa xanoo?

²⁶Waa'i xale'i ixxo liiransoo manchina qoorooma, lachchaa liiranchaa uwwookko; ihukkaarem baaxiilaanchina wixxaa'oo badallato uwwookko. Ee bikkina ee ixxi wixxaa'u amaxxa hundam Waa'a liiransoo mulli manchina uraa marookko. Oo hundim awwaad bee'ane hafachcham awwonimmisaa.