Read Hadiyya Hayyo'i Kitaaba 3 Bible Online

Hayyo'i Kitaaba 3 - Hadiyya bible

Hayyo'i Kitaaba 3

¹Ka uullanne ihoo luwwi hundinam qoodamaakkoo doollii ammanii yoohane.

²Ee qoodo'isannem, qaranchina amman yookko; lehinam amman yookko; kaasimmina amman yookko; xoqolimminam amman yookko.

³Shimmina amman yookko; gatisimminam amman yookko. Baximmina amman yookko; gindimminam amman yookko.

⁴Wi'llimmina amman yookko; osachchinam amman yookko. Kichchechchina amman yookko; kadimminam amman yookko.

⁵Kina binnaa'immina amman yookko; kina wixxaa'imminam amman yookko. Qaaphphanchina amman yookko; annanni ihimminam amman yookko.

⁶Hasimmina amman yookko; uunjimminam amman yookko. Wixxaa'aka'a amadimmina amman yookko; binnaa'imminam amman yookko.

⁷Dereerimmina amman yookko; gobimminam amman yookko. Sa'imminam amman yookko; wocimminam amman yookko.

⁸Iittimmina amman yookko; sabimminam amman yookko. Oranchina amman yookko; xumminam amman yookko.

⁹Baxaanchi ixxi badallatiinsi edaa siidoo luwwi maha?

¹⁰Anim manni badaroo'isina Waa'i issaakkoo kee'mmaalli bax iyyo moo'ummo.

¹¹Waa'i luwwi hundinam ixxi ammanenne mishisoo'isa issaa baxaakko; odim heer heerina hee'oohaannoomam manchi beet wodanonne dissaakko. Ihukkaarem Waa'i issu luwwa luxxaanniinsi lasaanchi afeebe'e la'eena xanoo xanooyyo.

¹²Manchi beet foorinne hee'ukkuuyyi er baxo baximmiinsii liiramimmiinsii e'lloo luwwi bee'isa la'ummo

¹³Manchi beet yakaa badaraa siidu luwwa itaatii agaatii liiramimmi Waa'i manchina uwwu uwwancha.

¹⁴Waa'i baxu bax hundim heer heerinam hee'oohaannooma la'ummo; eehannonne edakkam luwwi te'm xa'isakkam luwwi bee'e. Waa'im eekka issukkok manni ixxo baddoo'isinatte.

¹⁵Kaba yoo luwwi gaassim hee'ukkane; ka lasage ihoo luwwim gaassim hee'ukkane. Waa'i higu luwwa daba'llaa ihoo'isa issookko.

¹⁶Odim an ka uullanne hanqo'i oogaxxaannonnee muccuroo'm bikkennee barche'e moo'ummo.

¹⁷Anim I wodanonne hundem luwwinaa baxinaa amman yoo bikkina Waa'i baaxiilaanonnem ihukko xummaanonne oogatoohan ihukkisa la'ummo.

¹⁸Odim manni fooraam diinatiinsi maham e'lloo bee'an ihukkisa la'oo'isina Waa'i keenookko yaa sawwummo.

¹⁹Hanqina manni oosikii fooraam diinaxxekii lasaanchi qood matome. Mat lehoo'isam mullekim lehookko; lamikim fooshshi haalat matome; ee bikkina lamim qishirichchi ikko'i bikkina manni fooraam diinatiinsi e'lloo luwwi bee'e.

²⁰Mannim ihukko fooraam diinat hundim mat beyyo mattamo; hundim buchchiinsi baxanto'i bikkina buchchannem daba'llitamo.

²¹Ee bikkina manni foorii iim firoo'isa mulli diinaxxi foorii uullanne aad aagoo'isa la'ookkok ayyette?

²²Manchi beetina uwwamu sharad kan ihu bikkina baxoo baxonne liiramoohaanniinsi bagaan mullek e'lloo luwwi bee'isa moo'ummo; lehaa lasonne ihoo luwwa ayyim la'eena xanooyyo.