Read Hadiyya Hayyo'i Kitaaba 4 Bible Online

Hayyo'i Kitaaba 4 - Hadiyya bible

Hayyo'i Kitaaba 4

¹Odim ka uullanne mannanne issakkam barche'e moo'ummo. Barche'e issakko'i keenim ixxuwwina qishixxookkoka hoogga'a wi'llitam hee'llo'o; hasso'isa issimmi malaayyim ee gassaa'n angannette ihu bikkina ayyim agaagookok hee'ukkoyyo.

²Ee bikkina anim ka'isa ikku'uuyyi foorinne hee'llam keeniinsi gaassim leto'i keen e'llitamo yummo.

³Annannannem odim ka lamiinsim hore'em qarantobee'i keenii ka uullanne ihoo jolle moo'llobee'i keenii gada'aammuwwa.

⁴Odim manni mixu luwwa siideena qoxxaa baximmanne hinkaa'nna badattamda'e moo'ummo; eekkam issiookk ixxuwwi beshshuwwanne to'achchimmiinsi ki'ukkaanninnetti ihukkisa xassummo. Ku hundim odim awwaad bee'anee hafachcha foocimmina yakimmisaa.

⁵Anga xaaxaa afuuroo ceemmaalli manchi sibaarinne ixxi gaqqi orachchoomam itookko.

⁶Hafachcha foocimmisa issoo duuha'anne lobakata siidimmina badarimmiinsi horoore usheexxisakku'uuyyi baximminne hofqax luwwa siidimmi e'llookko.

⁷Odim ka uullanne yoo mulli awwaad bee'i luwwam moo'ummo.

⁸Mat mullam hee'oo manchi yookko; qachchi te'im abbaayyi ixxena bee'e; ihukkaarem ixxoom baxonne qondoodimmiinsi usheexxaa la'ooyyo; ixxi gag siixxu amaxxannem iina ihookko yimma la'ukkoyyo. Ixxim an baaroommok ayyenatte? I gagina liirancha hoogoommok mahinatte? yaa ixxi gaga xa'mmookko. Kuk hundim hore'oomam awwaad bee'anee kichchechchi heechchaa.

⁹Baxxo'i baxik mish danaam ihoo bikkina mat xale'i ihimmiinsi lam ihimmi e'llookko.

¹⁰Lamiinsi mat ubukaare mullek ki'isookko; ihukkaarem mullam hee'ookkok ubukkaare ki'soo hara'mmaanchi bee'i bikkina ixxena aayye!

¹¹Qiixxi ammanem lamim maqirem iinse'llota'n iibbookko; ihukkaarem mulla iinse'oo manchina hinkid iibbeena xanookko?

¹²Mat manchi mullam dabareena xanoobee'i hawwo lam manchi dabatteena xantamo; hara'mmashinne dadakko'i us qaqqisaa muramooyyo.

¹³Sogitano aa'oobee'i qawwi lommanchi adiliinsi qoor buxichchi woraadichchi e'llookko.

¹⁴Maham mat manchi buxichchi beetoo karamaa hee'ukkanee ihuta'nnim adil iheena xanookko.

¹⁵Mat ammane uulli minaadab hundim adila bikkaa adillano aa'oo woraadichcho awwontu'uuyyi moo'ummo.

¹⁶Ixxi adil ihaa gassoo doollenne ixxena ijaajamoo minaadab hore'em lobakata; ihukkaarem adillaniinsi dilloo ammane illageen baxu bax bikkina galaxxookkok mat manchim hee'ooyyo. Kukim hafachcha foocakkeena yakimmisa xigamoo awwaad bee'i luwwa.