Read Hadiyya Hayyo'i Kitaaba 5 Bible Online

Hayyo'i Kitaaba 5 - Hadiyya bible

Hayyo'i Kitaaba 5

¹Waa'i mine aaggoo ammane ki lokko ege'lle; eehe'enne danaamo joriinsi annanni issita'a laqqambee'i qawwuwwi kitima hincaa'llamaanniinsi sogita'n sagara macceesimmina gudimmi lophphookko.

²Wocceena illage gaassitaa sawwihe; gaaggaabbaa Waa'ina ma'lluwwa uwwiteena uga'a aaggitte. Waa'ii iimanenne atii uullannetti ihukkisa sawwitaa woccoo woshshi hofqax ihona.

³Ma'lluwwina sawwitoo ammane eehanni bikkina haqaawwe'llootto; lobakata wocimminne huushantootto.

⁴Ee bikkina Waa'i qawwuwwanne liiramooyyo; Waa'ina ma'lluwwa uwwiteena uga'a aaggoo ammane dassoo'n uwwe.

⁵Ihukkaarem uga'a aaggaa uwwitoobee'an ihulas gaassitaa uga'a aaggibeeta'n kiina eran hee'ukko.

⁶Keese baaxiilonne aagisoobee'isa ki suum afukkisa wocona uwwititte; ka'isinne kaka wocummok la'oo'nnetteme yitaa Waa'i awwaadaanchi illagenne haafite issona uunximmiinsi gattootto. Eebeelas ki badallato bi'isona Waa'i quunqa ki anginnem weeccimmisa ihookko.

⁷Lobakat haqaawwii lobakata wocimmii awwaad bee'ane; ihukkaarem at Waa'a badde.

⁸Mat adil awwonsoo uullanne buxa barche'e issukkuuyyaa hanqam hoorukkuuyyaa moo'llaa maala'llititte; annannichchi gassaanchinam ixxeensi hanaan ihaakkoo gassaanchi yookko; odim hundiinsem hanaan ihaakkoo lob gassaanchi yookko.

⁹Uullik atoot exximmi hundinam erane; adilim ee atootiinsi awwaaxxookko.

¹⁰Bira iittoo manchi bira goddooyyo; ee'isam goddaanchi iheena hasoo manchi edaa siiduta'nnim ihaakkoo yooyyo; kukim awwaad bee'ane.

¹¹Amaxxi lophphoo ammane itoo keen lophphookko; eelas summina an goddaancho yooqaxxiinsi annichchoomina awwaadoo luwwi maha?

¹²Baxo iittoo manchi lobakatam ihukko hoffoka ituta'nnimii danaam diriiro diriiraa garookko; ihukkaarem goddaanchi ee ixxi amaxxi bikkina u'nnamimminne diriiro hoogookko.

¹³Ka uullanne mulli kichche'isoo jor luwwa odim moo'ummo; oohim ka uullanne wixxaa'u amaxxi annichchinam hawwo eebimma

¹⁴te'im ma'lluwwi mashka'inne oo amaxxi hundim beeddaa qachchina afoo'n gatimma.

¹⁵Manchi beet am godabiinsi leexa'i angam qaramukkisam leexa'i angam daba'llaa marookko; hinkaa'nna baxonne badaruta'nnim amadaa maroo luwwi mahim bee'e.

¹⁶Ka leexa'a qaramaa leexa'am daba'llaa marimmi lobakata kichche'isoo luwwa; ixxi yakitoom hundim hafachcha foocimmis ihulas uwwoo awwaad maha?

¹⁷Ixxi umuram guullookkok tuunsinne wo'mmaakkoo heechchanne, kichchechchanne, u'nnansoo sawwitenne, qacqacimminnee xissinnettee.

¹⁸Eehannah an moo'ummi er luwwi hee'uta'n manchi beet ka uullanne ixxena Waa'i uwwu gundi umu'l doollenne e'llookkok yakukkoka hundam itimminnee agimminnee liiramimma. Ixxena yoo sharad kan xale'e.

¹⁹Waa'i hundi manchinam amaxxaa goddaa uwwukkok badallaxxeka sharada itimminnee agimminnee liiramoo'isa issaatette; oohim Waa'i uwancha.

²⁰Waa'i ka hundannem woda'n liirammato uwwu bikkina umu'l qeeraa'lloominam ihukko gundimmina lobakata kichche'ooyyo.