Read Hadiyya Hayyo'i Kitaaba 6 Bible Online

Hayyo'i Kitaaba 6 - Hadiyya bible

Hayyo'i Kitaaba 6

¹Ka uullanne mannanne hundannem afoo hore'em jor luwwa moo'ummo.

²Waa'i manchi beetina ka uulli amaxxa, goddaa lombee hundam uwwookko; ixxena hasisoo luwwiinsi maham hoffiisooyyo. Ihukkaarem ixxena uwwoo amaxxi hundannem liiramooyyo; hore'oomam ixxi badaraa wixxaa'ukkaannonne mulli manni itookko; kukim awwaad bee'anee lobakata kichche'isoohanee.

³Ee'isam mat manchi xibbi ooso qaruta'nnii qeeraa'l umura siixxaa lobakat doolle hee'uta'nnii gaga liiranseena hasisoo luwwika sharada siidoo'n gataa er waamma siixxubeelas ixxi heechchi awwaad bee'ane; eehido'i manchiinsi am godabonnem lehaa qaramu kar e'llookko yummo.

⁴Ee karik qaranchi awwaad bee'ane; ixxi xadamaa gatoo tuunsonne aagookko. Ixxi summim tuunsinne ifiisamookko.

⁵Ixxi eelliinchi caakka moo'oo'n te'im heechchi bikkina maham la'oo'n matemaaggem usheexxaakko.

⁶Manchi beet lam kum hiincho hee'ukkaarem liiramubeelas ee kariinsi mahinne e'llookko.

⁷Manchi beet ihaakko yimma la'ubee'aarem baxonne badarookkok itoo luwwa siixxeenatte.

⁸Eehannah qoor manchi qawwiinsi mahinne e'lloo? Buxichidu ixxi heechcha awwonseena xanimmi ixxena maha awwaadoo?

⁹Mixaninne xeebe'immiinsi yoo luwwanne galaxxakka'a hee'immi e'llookko; kukim awwaad bee'anee hafachcha amadakkeena yakimmaa.

¹⁰Ka uullanne yoo luwwi hundim gaassim summ uwwamaakkoohane; manchi beetim ayyedda'i ihukkis la'amaakkoohane; ixxeensi hanaan ihukkaanninne uullixxameena xanooyyo.

¹¹Woshshi lophphoo ammane huushanchi lophphookko; ee bikkina wocimmi lobakat maha awwaado?

¹²Qishirichchi ihaa hafisa higoo doollenne manchi beetina awwaadoo luwwa la'oo ayyette? Te'im manchi beet lehaa lasage ka uullanne mah ihoolda'e ixxena ayyi kureena xanookko?