Read Hadiyya Hayyo'i Kitaaba 7 Bible Online

Hayyo'i Kitaaba 7 - Hadiyya bible

Hayyo'i Kitaaba 7

¹Bit xee'aalli ihaakkoo danaam shitto'iinsi danaam summi e'llookko; qaranchi balliinsim leh balli e'llookko.

²Leh mannanne hundannem afoohan ihukkisa tiissiisoo bikkina bollochcho'i mine marimmiinsi wi'l mine marimmi e'llookko.

³Kichchechchi tiirina eran ihu bikkina osachchiinsi kichchechchi e'llookko.

⁴Qoor manchi wodan wi'l minennette; ihukkaarem qawwi manchi wodan liiranchi minennette.

⁵Qawwi kee'n kajja macceesimmiinsi qoor kee'n shaaqimma macceesimmi ee'llookko.

⁶Qawwuwwi kee'n osachchi fiimaadiinsi woroon yoo utti gii'l xoxanqisa ihu bikkina maham awwaadoobee'i luwwa.

⁷Barche'e issimmi qoor manchom qawwi issookko; ee'isam maqanxa aa'immi er haalata bi'isookko.

⁸Ayyi luwwikim asheero'iinsi goollo'i e'llookko. Amaadaanchiinsi loboka xa'nnoo manchi e'llookko.

⁹Quuqimmi qawwuwwi keen baado firoo goog ihu bikkina at quuqimmina gaaggaabbitte.

¹⁰At ka doolliinsi gaassi doollenne baxamu luwwi hundim hinkaa'nna lobakata e'lloohan hee'ukko? yitaa xa'mmititte. Mashka'oomim kido'i xa'mmichchi qoor manchiinsi firoohaneyyo.

¹¹Qoorooma gulummi'nnoo danaam ihu bikkina ka uullanne hee'oo manni hundim eekka hasimmi hasisookko.

¹²Qooroo'm daato'oom amaxxi daato'oo'mmisa; ee bikkina qooroom foore egeroo bikkina amaxxiinsi e'llookko.

¹³At hino'o Waa'i baxu baxo qoosse; ixxi boqqisukkoka ayyi haabeena xanookko?

¹⁴Luwwi hundim taaphanoo ammane liirame; hawwi afoo ammanem qoosse; hawwimii heellimii Waa'iinsetti ihu bikkina soodonne waaroo luwwa ayyim la'eena xanooyyo.

¹⁵Ka awwaad bee'i ihaakkoo i heechchi doollenne lam luwwi oohim boqqi ixxi jollinnem lobakat umura hee'ukkuuyyi, odim erok ixxi eroomminnem bi'ukkuuyyi moo'ummo.

¹⁶Ee bikkina qaqqisom bi'lloobee'isa hig qooraa lobakatam muccuraa ikkitte.

¹⁷Amman afoo'nnim letoobee'isa higimaancho joraa xiiqqammaanchoo ikkitte.

¹⁸Waa'a baddoo manchi hawwi hundiinsim fireena xanoo bikkina hawwiinsi ki gaga ege'lle.

¹⁹Mat beero'onne hee'llam tommi gassaaniinsi loboka qooroom qoor manchina qoxximma uwwookko.

²⁰Mahannem huushamoo'n hundi ammanem danaam luwwa baxoo er manchi heer uullanne siidamooyyo.

²¹Ki awwaadaanchim keese duumukkuuyyi macceesseena xantoo bikkina manni wocoo woshsha hundam guddaa macceesseena hassitte.

²²At ki gagoomim ikkita'n hundi ammanem mulli keeno duuntittuuyyi hee'lloo'isa xadditte.

²³Iina yoo qooroominne hundinnem ka hundam saarayyaa la'eena awwaaxxummo; lobakata qoor iheenam murte'aa hee'ummo. Ihukkaarem an xanoommaanniinsi hanaanette ihukko.

²⁴Hore'em xillaallaa kee'mmaallaa ihu bikkina qooroo'm woshsha saarayyaa la'eena xanookkok ayyette?

²⁵Ihukkaarem an hundem luwwam saarayyaa soroobimminne afimmina i gagooma uwwummo; I xa'mmichchuwwina dabachchi ihoo luwwaa qooroomaa siidoommisina, macceesimma hoongim hinkaa'nna kichche'isoohanee qawwoomaa ihukkisa saarayyaa la'eena murte'ummo.

²⁶An lehiinsi hanaan qaraaraalli ihaakkoo mulli luwwa siidummo; oohim meenti qaashshi ihukkisa. Mat meentichcho shikkisa ihaakkoo iittinne goona qaashshamo; lokko karakkam chimchi'mmisa ihaakkoo anginnem xaxamta'a amaddeena hassamo. Xale'i Waa'a baddoo manchi iseensi gibaa xoreena xanookko bagaan baaxiilaancho qaashsha'a amaddamo.

²⁷Qoorachchi manchim Oono'o, ee lasage saarayyaa siidummi mulli woshshi odim kane.

²⁸Oohim mulli dabachcha siideena hasaa hoogimma; mat kum goo'n lambe'enne xabbeen wodan yoohane yakkam mat gooncho siidummo. Ihukkaarem meentiinsi matom siideena xanummoyyo.

²⁹Saarayyaa afummi mulli luwwi odim Waa'i manna xabbee'n wodan yoo keen issaa qooccaakko. Ihukkaarem ixxuwwi hundem hantaarom qooccito'o yukko.