Read Hadiyya Hayyo'i Kitaaba 8 Bible Online

Hayyo'i Kitaaba 8 - Hadiyya bible

Hayyo'i Kitaaba 8

¹Qoor mancho labookkok ayyette? Woshshika tirato la'oo'oo ayyette? Qooroom mannika illi kollo caakkisookko. Kee'mmu illi kollom dabassookko.

²Adilina ijaajamoommo yitaa hide'imminne Waa'ina sagara aaggitti bikkina adilina amma'nnantaattoohan ihe.

³Adil ixxena mishisu luwwi hundam isseena xanoo bikkina jor woshsha amaddaa ixxi illagenne uullititte.

⁴Adil hundem luwwam isseena malaayyi yoo bikkina mahina kaka baxxitto? Yaa xa'mookok ayyette.

⁵Ixxi jaajo egettittaare hawwodantooyyo; ku hundim ihoo ammanee duuha'aa annanni issaa la'ookkok xale'i qoor mancho.

⁶Luwwi hundam issimmina hanqo'i ammanii wo'mmaakkoo duuha'ii hee'ookko; ihukkaarem ka hundam saarayyaa la'oo'isina manchi beetina uwwamu lachchi wo'mmayyo.

⁷Iheena yoo luwwa la'oobee'i bikkina kuk ihookko yaa kureena xanookok ayyette?

⁸Ayyi manchim foor firoobee'isa hooreena te'im lehoo balla dabareena xanooyyo; qasanchi lambe'ennem ayyim lasinne gibeena xanoobee'isam jollim jora baxichcho fatakooyyo.

⁹Ka uullanne ihoo luwwa saarayyaa xassummo; mat manchi mulleka hawwodeena daannooma siidookkok mahinatte?

¹⁰Ee'isam baaxiilaan keen lombinne waammamtu'uuyyi moo'ummo; Waammi lasage ihukkaarem ixxuwwi jolla issito'i ee beero'i manni wixxita'a ixxuwwa diraansitu'uuyyi moo'ummo. Oohim awwaad bee'ane.

¹¹Jor baxoo keenonne qaqqiso oogatakkobee'i bikkina manni oosik wodan jora baximmina qoxxookko.

¹²Oohim baaxiilaan xibbaagge baaxiilo baxxota'nnim qeeraa'l umura siidda'a hee'llamo. Ihukkaarem Waa'a badditam keeninaa ixxom lonsitam keeninaa hundem luwwim makkoo'isa la'oommo.

¹³Ihukkaarem baaxiilaanina ma'lluwwim makkooyyo; Waa'a badditambee'i bikkina ixxuwwi umur hafisa higookko.

¹⁴Ka uullanne ihoo awwaad bee'i luwwi yookko. Mat mat ammane er manni jor keenina hasisoo guzumo'o aa'llammo; jor manni odim er mannina hasisoo luwwa siiddamo. Oo hundim awwaad bee'ane yummo.

¹⁵Ee bikkina manchi beet ka uullanne hee'ukkuuyyi uwwamu gada'i itimma, agimmaa ixxi gaga liiransimmaa ihukkisa la'ummo. Waa'i ka uullanne uwwu doollenne manni hundim baxaa siidu amaxxinne liiramookko.

¹⁶Qoor manchi iheenaa ka uullanne ihoo luwwa hundam saarayyaa la'eenaa yakummisinne manchi beet ballaa hiimoo usheexato hoogaa hee'oo'isa qoossummo.

¹⁷Manchi beet lobakata saarayyimminne Waa'i issoo luwwi hundam la'eena xanoobee'isa qoossummo; manchi beet lobakat luwwa saarayyaa la'eena yakukkaarem maham siideena xanooyyo. Eeyya qoor manni iggimminne kaka lanqoommo yeena xanookko. Ihona bagaan laqqam luwwi bee'e.