Read Hadiyya Hayyo'i Kitaaba 9 Bible Online

Hayyo'i Kitaaba 9 - Hadiyya bible

Hayyo'i Kitaaba 9

¹Mucculluwwikii qoolluwwikii baxxo'i bax Waa'i angannette ihukkisa saarayyoommisina ka hundam i wodanonne sawwummo; iitti te'im woc illagenne yoo ammanenne hee'oo'isa manchi beet ixxi illagenne yoo ammanenne ixxo mah egerooda'e la'ooyyo.

²Muccurikii jora baxichchikii, jorikii eraannikii muccurikii haashaarammikii kitima hincaa'oohaannikii kitima hincaa'oobee'aannikii hundikim saam mato; er manchina baaxiilaanchaanniinsi e'lloo saam bee'e hiditano baddoo manchim hide'oohaanniinsi annanni ihaa moo'amooyyo.

³Hundikim saam mato; ixxim ka uullanne ihoo ayyi luwwisam hore'em jora; mannim heechchi doollenne ixxuwwi tii'l jollinnee machchaallinnee wo'mmaa lasaanchonne lehookko.

⁴Lehaakkoo hobbichchiinsi foorinne yoo wishichchi e'llookko; ee'isam foorinne yoo manchi hundinam neeyyat yookko.

⁵Foorinne yo'i manni mat balla letamisa laqqamo; ihukkaarem leto'i keen maham laqqamoyyo; horem xadanto'oo keen ikko'i bikkina matem awwaadim bee'e.

⁶Ixxuwwik iittanchi, wocanchii to'achchii hundim ixxuwwinne maqirem lehaakko; ee bikkina ka uullanne ihoo luwwi hundannem la'mmeka baxamimmi lasaanchi afeebe'e ixxuwwina hee'ooyyo.

⁷Waa'i gaassaatim ihona yaakkoo bikkina at mattaa ki hurbaata liirantittuuyyi ite; woyi'n diqaasam aggaa xeebo mu'lle.

⁸Hundi ammanem qadaalli eddechcha edde'llaa ki horoorenne lii'llisoo luwwa laphphe.

⁹Waa'i kiina ka uullanne uwwu ka qishirichchi heechchanne iittitoo ki mi'n amanne liirame; ki badallatinaa ki hawwinaa hundinam miqamu bit ka qax ihu bikkina ka awwaad bee'i ki heechchi doollenne balli hundam liirame.

¹⁰At leh manni kolli mattoo ammane ee beyyonne baximmi, sawwimmi, lachchii qooroomii bee'i bikkina kiina yoo qax malaayyinne hundinnem qoxxitaa baxe.

¹¹Ka uullanne odim mulli luwwam moo'ummo; oohim geerako'i bikkina xoreexxo'o kaa'akambee'isa geedduwwim ora kaa'oobee'isa; qoolluwwi balli hurbaata lachchaammuwwim amaxxa siiddamoyyo; odim lachchaammuwwim lombiinsi lombanne higgamoyyo. Ihukkaarem hundi luwwinam amman yookko.

¹²Ihona bagaan annannichchi annannichchim ku jor saam hinki ammane amadooda'e la'ooyyo; Cii'ichchi bararaa kiyyo'onne amadamoo'isa, qurxumme'im sawwoo'nnim shikkanne aagoo'isa, ee'isam manchi beetim sawwoo'nnim dangonne afoo jor hawwonne aagookko.

¹³An ka uullanne moo'ummok mulli luwwim yookko; oohim qooroo'mmeka lophphaakkoo kobi'llatto.

¹⁴Hofqax mannim hee'oo mat gootto'i beero'i hee'ukko; mat malaayyaam adilim geejji girba axisaa ee beero'o qaseena ki'ukko.

¹⁵Ee beero'onne hee'oo mat qoor buxichchi manchi ee beero'o ixxi qooroominne gatisukko. Ihona bagaan ee buxichcho ayyim sawwukkoyyo.

¹⁶Qooroom malaayyiinsi lophphoo'isa wocaammo; ihukkaarem buxichchi qooroom gadamaakkoohane; ixxi wocoo woshsham ayyim macceesooyyo.

¹⁷Qawwi kee'n dummichchanne shuuroo adi'l sagariinsi qaphphaa wocoo qoor manchi woshshi e'llookko.

¹⁸O'l mu'utiinsi qooroom e'llookko; ihukkaarem mat baaxiilaanchi lobakat eroomma bi'isookko.