Read Hadiyya Birimmi Kitaaba 1 Bible Online

Birimmi Kitaaba 1 - Hadiyya bible

Birimmi Kitaaba 1

¹Salamoon mazmuulluwwiinsi hundiinsim lophphaa mishisoo mazmuura.

²Ki Iitti woyi'n diqaasiinsi lophphaa eran ihu bikkina ki suum eese suunqona.

³At laphphitootti shitto'i danaamisa enje'oohane; ki summa weeshimmi shitto'o wiximmisa. Baajaam landi keese iittookkok ee bikkinatte.

⁴I anga amaddaa hixixaa'e; maqirem geellona. Adil eese ixxi mine aagisukko. Neesem keesenne liirammoommo; lobakatam liirammommo; woyi'n diqaasiinsi loboka ki iitto lonsinoommo. Ee bikkina baajaammuwwi hundim keese lobakata iittookko.

⁵Ki'nnuwwi Yerusaalee'm baajaammuwwa, macceessehe! An heemachchatte; ihukkaarem danaamotte; i heemachchoom Qeedaa'l uulli dukkaa'nnisa. Ihukkaarem i dan Salamoon adilla'n mi'n dummuwwisa.

⁶Eese heemachchisukkok eelliinchi iibba; an heemachchatte ihummi bikkina gaddakkotte; iyyummi oos iinninne wocanto'i bikkina woyi'n kaashshi haqqi beyyo egeraanchi issito'o. Ee bikkina i gaqqi woyi'n kaashshi haqqi beyyo egereena amman hee'ukkoyyo.

⁷I iitti mancho, huno'o, iina kure. Ki gereebba allaattoottok hannonnette? Sammi gud eelliinchi ammane hafixxamoo'isa issitoottok hannonnette? Keese hasummuuyyi ki beshika gereebbi allaachcha awwonummuuyyi ille gunguu'llita'a binni binnitam meentichchosa ihoommok mahinatte?

⁸At meenti hundiinsim lophphaa mishissoo danaame! Beyyo laqqoobee'an ihulas gereebba konte'e awwontaa mare; ki fella'i wotallam allaaraa'n dukkaannuwwi gadanonne feessiise.

⁹I iitti manche; Faari'oon faraxxi gaare'uwwa hixixaa'oo faraxxi lambe'enne hee'oo danaam gannichcho labboolla.

¹⁰Ki xaba'n dan bito xee'aalli ki'nnisa; ki gaanjim inqu'u yakkam kininne wereeggaakkoohane.

¹¹Ihukkaarem neese bi'l gurmbi yoo worqa kiina wereeggina baxinsoommo.

¹²Adil gundi ara'anne daabaayyaa yoohaannonne i shitto'i enji minenne wo'mmaa qibibukko.

¹³I iitti manchi i anuunnuwwi lambe'enne usheexxoo karbe'e yakkam enje'oo luwwisa.

¹⁴I iiti manchi Engaadanne yoo woyi'n kaashshi beyyonne mutu udma'i uulli enje'oo fiitisa.

¹⁵I iitti manche, at hinkaa'nna danaamotte, odim hinkaa'nna mishissoottotane. Ki illi handare'aanni'nnoohane.

¹⁶I iitti mancho, atim lobakata danaamona'e; lobakatam liiransitoohanena'e. Niikki ara'im latu hixisa mishisoohane.

¹⁷Ni mi'n utub digiphphi haqqa; mi'n iiman dadamukkokim hoominnette.