Read Hadiyya Birimmi Kitaaba 2 Bible Online

Birimmi Kitaaba 2 - Hadiyya bible

Birimmi Kitaaba 2

¹An Saaroo'n uulli xiggeeraxxisaa cebbanne mutoo suuf fiixxisaa.

²I iitti mancho baajaammuwwi lambe'enne utti lambe'enne yoo suuf fiixxisatte.

³I iitti manchi mulli woraadduwwi lambe'enne doo'm haqqoronne lophphaa mishisoo appi'l mishisa. Anim lobakata liiramaa ixxi hafanne usheexxummo; xee'oo misham itaa liiramummo.

⁴Ixxi hurbaata itakkam mine eese aagisukko, ixxi iittom baandi'llisa eesenne iimiimaa'ukko.

⁵Ixxi iitti amadaa xissummi bikkina Zabiiba itissakku'uuyyi eese qoxxissehe; appi'l mishinnem eese liiransehe.

⁶Qeddi anginne bakkiisaakko; makki anginnem eese qaaphphaakko.

⁷Yerusaalee'm baajaammuwwa, iitti ixxi gagim ki'eebe'e mikmikaa'llakka'a ki'isansitakkambee'isa geeroo kukkussichchi summinnee udma'i uulli gaallichchi summinnee uunxoommo.

⁸I iitti manchi duunnuwwi haninnee beqelluwwi haninnee xophukkuuyyii geerukkuuyyii waaroo ammane sagar macceesamookko.

⁹I iitti manchi gaallichchika te'im kukkussichchika wotara labookko; oono'o, ixxi kaba ni mi'n ooxxi gadanonne uullaakko; maskootinne daaphphaa moo'oolla; hoffi afo'innem game'aa moo'oolla.

¹⁰I iitti manchi iina kid yaa wocukko. I iitti mancho, ki'e; i danaame, waare; maqirem mallona.

¹¹Oono'o, hagayyi higaakko; xeenim ga'nnimma uullisaakko.

¹²Fiit uullanne fiitimma asheeraakko; zammarakkam amman afaakko; handare'i sagarim uullanne macceesamoolla.

¹³Oda'i mishimma asheeraakko; woirinim fiitaakko; fiit enjim uullanne wo'mmaakko. Ee bikkina, iyyaayya, ki'e; i danaame, waare; maqirem mallona.

¹⁴At kolo'i baalli woronne maaxamu handarekkichchisatte. Hino'o, mataa'lle ki ille moo'ise; ki sagaram macceesise; ki sagar mishisoohane; illi kollom lobakata danaamotte.

¹⁵Ni woyin fiitaakko; ee bikkina niikka woyina bi'isoobee'isa wengereella, ee hoffi wengereellichcha'a qaashshakka'a amaddehe.

¹⁶I iitti manchi iihane; anim ixxane. Ixxi suuf fiixxi lambe'enne diinate allaarookko.

¹⁷Hii'm tuunsi beeddeebe'ee baqixxi hafachchim hafachcheebe'ee, i iitti mancho, gaallichchisa te'im kukkussichchi wota'llisa baalli yoo duunnuwwi haninne geettittuuyyi daba'lle.