Read Hadiyya Birimmi Kitaaba 4 Bible Online

Birimmi Kitaaba 4 - Hadiyya bible

Birimmi Kitaaba 4

¹I iitti manche, at hinkido'i danaamotte! Oono'o, at hore'em mishissoottotane. Ki illi gunguu'llitoo shaashshi afo'inne moo'akkamaare handare'aanni'nnoohane. Ki horoor Gala'aaxxi duuniinsi dilloo fella'i allaachchisa.

²Inqi ixxuwwi lambe'enne lijji mahim hee'oo'n lam lamo qaroo odda hoorakka'a wo'inne aanshakko'i qadaalli gereebbi allaachchisa.

³Ki suum kashar haarri fati'llisa mishisoohane; manninne woccoo ammane lobakata mishisoohane. Lamem xabanim ille gunguu'llitoo shaashshi afo'inne moo'akkamaare lam beyyonne baxxansamu oroomaa'n mishisa.

⁴Ki gaanji geedduwwi kum agilluwwii o'l mu'uttuwwii calcalaa moo'amoo o'l girbina baxamu kin ootamu Daawiit qasha labookko.

⁵Kiikki lamem anuunim qaf ihaa qaramaakkoo fuutto'i fiixxi lambe'enne allaa'lloo kukkussi wotalla labookko.

⁶Uulli soodeebe'ee tuunsim higeebe'ee karbe'i yoo duunaa aduruus yoo duunaa maraa usheexxoommo.

⁷I iitti manche, at hundemisam danaamotte; kurakkam luchchi mahim bee'etane.

⁸I idaayyichche, Liibaanoos duuniinsi i beyyo waare; Liibaanoosiinsi i beyyo waare; Amaa'n duuniinsi dille; hobbii kabeerii hee'oo Saniir duuniinsii Armooni'ee'm duuniinsii dillitaa waare.

⁹Iyyaayya, i idaayyichche, ki illi moo'oo'isii gaanji worqii iikka tiiro agaakko.

¹⁰Iyyaayya, i idaayyichche, ki iitti hinkaa'nna liiransoohane; ki iitti woyi'n diqaasiinsi lophphaa liiransoohane; ki shitto'i enji ayyi shitto'iinsim lophphoohane.

¹¹I idaayyichche, ki suuminne maraphphi damaam daadoohane; ki woc iina adoo marabo; ki eddechchi enjim Liibaanoos uulli shitto'isa.

¹²Iyyaayya, i idaayyichche, at iina ootamaakkoo duubbi kaashshi beyyisa, xufamaakkoo bu'isaa koobamaakkoo wo'isattee.

¹³At xee'oo mishinne wo'mmaakkoo oroomaana yakkam mish beyyisatte.

¹⁴Odim naardoos, seego'i, ixaanii qarafii ee'isam aduruusisa enje'oo enji yoo annanni annanni haqqi hee'ookkotane. Ee'isam karbe'i, geeneeno'i fiitii annanni annanni enjii mutookkotane.

¹⁵At duubbi kaashshi worinne daadoo bu'isatte; heechchi wo'i firoo barette; Liibaanoos duu'n luguminne daadoo daajjisatte.

¹⁶Hanaa'n qa'l hafachcha, baqihe; woroo'n qa'l hafachcha, kid waare; i duubbi kaashshi beyyonnem hafachche; hafachchim er enjinne wo'mmaakkoohan ihona. I iitti manchim duubbi kaashshi beyyo waarona; doo'llamaakkoo misham itona.