Read Hadiyya Birimmi Kitaaba 5 Bible Online

Birimmi Kitaaba 5 - Hadiyya bible

Birimmi Kitaaba 5

¹Iyyaayya, idaayyichche, an i duubbi kaashshi beyyo aagummo; i karbe'ee enje'oo fiitaa feerummo; i maraphphi kaashsham damaaminne itummo; i woyi'n diqaasaa adom agummo. I qarmanna, iittika xeebo mu'llitakkeebe'i afeebe'e ittehee aggehee.

²An iinse'aammo, ihukkaarem i tiir baqaakko. I iitti manchi «Iyyaayya, i idaayyichche, miiqakkam luwwi bee'i handarekkichche, hay ka gooca fooqaa'e. I horoor xeeninne aashaakko; horoo'l oddim baqixxi yiritinne aashaakko» yukkuuyyi gooca qoccookkoka macceesummo.

³I eddechcha sheelaxxaammo. Eehannah odim dabaraa edde'onannihe? I lokkom aanshaqqaammo. Eehannah hinkid dabaraa xussoommo.

⁴I iitti manchi ixxi anga afo'inne aagisukko; i godabim ixxi bikkina iyyimma hoogukko.

⁵Ee bikkina ixxena gooca fooqaa'eena iimummo. U'llummi xufa fooqaa'eena amadummisam i angiinsi karbe'i taktakukko; angi maxxaarinnem daadukko.

⁶Anim i iitti manchina gooca fooqaa'ummo; ihukkaarem ixxi daba'llaa maraa hee'ukko. An ixxi sagara macceeseena lobakata mixaa hee'ummo. Lobakata hasummo, ihukkaarem siideena xanummoyyo. Weeshummo; ihukkaarem mah dabachcham dabarukkoyyo.

⁷Beero'i woronne daba'llantu'uuyyi egettam manni eese siidda'a ganta'a madisso'o. Beero'i ooxxi goocam egettam waardiyyuwwi iikka weyyakka sheelatta'a massito'o.

⁸Ki'nnuwwi Yerusaalee'm baajaammuwwi i iitti manchomdu siiddakko'an ihulas an ixxi iittinne xissumman ihukkisa ixxena kullehe.

⁹At meenti hundiinsem lophphitaa danaame, ki iitti manchi hanqoomam mulli keeniinsi annannihe? Ixxi bikkina kaa'nna neese hidiissoottok ixxi mulli keeniinsi annanni ihoo luwwi maruchcho?

¹⁰I iitti manchi lobakata liiransoohanee mishisoohanee; tommi kum goo'n oos lambe'enne ixxo labookkok bee'e.

¹¹Ixxi horoor quunqisamaakkoo worqa labookko; horoo'l saraatim laaluuncaa waawure'nnoo heemachchaa.

¹²Illi daajji gadanonne hee'oo adinne aanshakko'o laboo handare'isa mishisoohane.

¹³Xaba'nnek dan er enji yoo annanni annanni enji hee'oo duubbi kaashshi beyyisa. Ixxek suum enji mishisoo karbe'e daassoo fiitisa.

¹⁴Angi gurumbi yoo worqi biccisa mishisoohane; orachchi sanpheera yakkam bito xee'aalli kininne wereeggu daane'i inqisa.

¹⁵Lokki worqanne shooho'amu ibinabarada yakkam qadaalli ki'n utubbuwwa labookko. Hagar Liibaanoos uulli haqqinne wereeggu Liibaanoos uulli duu'nnisa.

¹⁶Ixxek suum maraphphisa xee'oohane; ixxi gagoomim mishisoohane. Ki'nnuwwi Yerusaalee'm baajaammuwwa, oono'o, i iitti manchii i beshichchii eekka laboohane.