Read Hadiyya Birimmi Kitaaba 8 Bible Online

Birimmi Kitaaba 8 - Hadiyya bible

Birimmi Kitaaba 8

¹Maha ihoo, at iyyummi anuuna iicu iyyummi beetisa ikkita'n. An googonne kiinninne exxaa keese suunqumta'n ayyi manchim eese gadam hee'ukkoyyo.

²Iyyummi minem keese aagisam hee'ummo; atim eese eekke'enne iitti bikkina losissam hee'llitto. Oroomaa'n mishinne xee'u er woyi'n diqaasam agisam hee'ummo.

³Ixxi qeddi anginne bakkisookko; makki anginnem qaaphphookko.

⁴Ki'nnuwwi Yerusaalee'm baajaammuwwa, iitti ixxi gaginnem ki'eebe'i afeebe'e mikmikaa'llakka'a ki'isansitakkambee'isa hadara yoommo.

⁵Is iitti mancho bakke'lla'a udma'i uulliinsi waattamote tute ayyette? Eraa kiyyumma keese siitto'i xuu'lla'ahim qatto'i appi'l yakkam haqqichchi lugumiinsi baqaa'ummo.

⁶Hundi amma'n iittinne ki wodanonne eese koobo'isa koobe; ki angannem koobeo'isa xale'i eese amade. Iitti lehi'nnoo'i qoxxaalla; to'achchim waammi'nnoo'i mogaalla; ixxek gii'l laban Waa'i laba'nnisa.

⁷Wo'i lophphimmi iittika giira bi'iseena xanooyyo; dirisam ihukkaare aanshaa masseena xanooyyo. Manni ixxena hee'oo amaxxi hundinnem iitto bitaa'eena yakuta'n manni ixxonne naacamookko.

⁸Anuunam fissitoo'n yo'i gootto'i aayya niina yo'o; eebaqqanchina xa'mmakkota'n ka niyyaayyana neese maha issineena xannam hee'nnummo?

⁹Ise qash ikko'ita'n egerimmina kin bi'l godo'o banxam hee'nnummo. Ise ooxxi gooc ikko'oota'n Liibaanoos uulli haqqi saanqinne baxamaakkoo xufa banxam hee'nnummo.

¹⁰Oono'o, an qashatte; i anuunim qoto'akka'a egerakkam beyyisa; an i iitti manchinne maqire ihoommi ammane ixxi xummaa liiranchaa siidookko.

¹¹Salamoonina Ba'aalhaamoonanne woyi'n kaashshi beyyi hee'ukko. Ee woyi'n beyyom baxaanina kera'a uwwukko; oo baxaan annannichchim mat mat kum bira ixxena eebbam hee'llo'o.

¹²Iina i gaqqi woyi'n kaashshi beyyi yookko; Salamoona, at mat kum bira woyi'n kaashshi beyyi baxaanim lam xibbi bira massitakkeena xantakkamo.

¹³Taa i idaayyichche, duubbi kaashshi beyyonnette ikkaa i besh kiikka sagara macceesseena hassam bikkina hino'o, iina ki sagara macceesise.

¹⁴I iitti mancho, qaqqissaa i beyyo waare; enji mutoo duunnuwwanne chubbi chubboo kukkussichcho te'im gaallichchi wotara kobi'lle.