Read Hadiyya Issaayyaas Kitaaba 1 Bible Online

Issaayyaas Kitaaba 1 - Hadiyya bible

Issaayyaas Kitaaba 1

¹Ooziy, Iyyoo'ataam, Akaazii Hizqiyaasii Yihudanne adilluwwi hee'llo'i doollenne Amoox beet Issaayyaasinne ihaa Yihuxxi bikkinaa Yerusaalee'm bikkinaa Waa'i wocu sagar kane.

²Iimane, macceese; uullim macceese. Waa'i «An ooso qaraa li'isummo. Ihukkaarem ixxuwwi eesenne bangujjito'o.

³Mirgo'i annichcho la'ookko; hallichchim ixxi moollannika gola la'ookko. Ihukkaarem Isra'eel la'ukkoyyo; i minaadab hore'em qoossukkoyyo» yoolla.

⁴Ki'nnuwwi baaxiilaan keeno; hawwojji tuubamaakkoo minaadaba! Jora baxoo kee'n qarancha! Ki'nnuwwik heechchi bi'aakkoohane; Waa'a uttakka'ahii Isra'ee'l keesammam gaddakkahii ixxonne afare dabattakko'ookko.

⁵Boqqoomanne boqqooma eddakku'uuyyi odim guzumo'ancha hassakkamok mahinatte? Ki'nnuwwik horoor xissinne, wodanim hoonginne wo'mmaakko.

⁶Ee bikkina lokki xura'iinsi ki'isaa horoo'l saraat afeebe'e ki'nnuwwi orachchonne fayya'oom bee'e; ki'nnuwwik orachchi omarinne, dashshinnee marinnee wo'mmaakko. Oohim xooqukkoyyo, fayye'ukkoyyo te'im zaytinne cukkamukkoyyo.

⁷Oono'o, ki'nnuwwi uulli udma'i ihaakko; beero'uwwim giirinne shokkaakko; abuulli uulli ki'nnuwwi illi moo'ukkuuyyim diina'an ihookko; hundam luwwam bi'isaa udma'i issookko.

⁸Xiyoo'n landichcho woyi'n kaashshi woronne yoo godo'isa, dabaquu'l woronne yoo dondisaa kibbamu beero'isaa ikko'ookko.

⁹Gogoxxi Moollanni Waa'i neese baraara gatisubeeta'n Soddo'mmisa inkaa hee'nnummo; Gomo'llisam bi'nnaa hee'nnummo.

¹⁰Ki'nnuwwi Soddo'm gassaano, Waa'ika sagara macceessehe; Gomo'l minaadaba, ni Moollannika losano macceessehe.

¹¹Waa'i «Ki'nnuwwik kiti'm dut iina maha issookko? Kabad afeebe'e iina shokkiissakka'a hincaa'llakko'i gereechchi ambu'l kitimii lijji di'irii iina ihaakko; labee'nnek, gereechchi geexikii fellakkichchi ambu'llekii xiig eese liiransooyyo.

¹²I illagenne hincitakka'a i Keesammi Mi'n wixxixxi beyyo hance'llakkona xa'mmukkok ayyette?

¹³Kido'i awwaad bee'i kitima ka lasage hincaa'llakkotte; wiriissitakkam aduruus i illagenne shigigaa'oohane; ki'nnuwwik aga'n aaggi, usheexxaxxi balluwwii keesammi dummichchuwwii baaxiilinne wo'mmaakkoohan ihu bikkina an iittummoyyo.

¹⁴Aga'n aaggikaa qoodamaakkoo ugudduwwaa an sabaammo; oo keen iina kee'mmaalli iyyisa ihu bikkina iyyaqqeena xanummoyyo.

¹⁵«Uunxatina ki'nnuwwika anga i kolli biddiqaa'llakko'aarem an ki'nnuwwi kolli moo'oommoyyo; ki'nnuwwi manni xiiga duntakko'oo bikkina uunxato lonsitakko'aarem macceesoommoyyo.

¹⁶Ee bikkina ki'nnuwwi gaga aanshaqqitakka'a muccullehe; ki'nnuwwi baxxakkam jor baxo i illagiinsi qeessehe; hawwodimmam ullehe.

¹⁷Eroka issimma lossehe; hanqi bi'oobee'isa issehe; wor amadantokeenina hara'mmehe; adaraar oosika hanqa egellehe; busar meenti laachcha macceessehe» yukko.

¹⁸Waa'i «Waallehe, gadixxamona; ki'nnuwwik baaxiil muulli kashar ihuta'n fuutto'isa qadaallookko; xiiqqisa kashar ihuta'nnim baraxxisa qadaallookko.

¹⁹Eeyya yitakkolasii iina ijaajantakkolasii uulli maasso ittakkamo.

²⁰Ihukkaarem sabbakka'a iina boqqitakkolas bisa'i itookko. An Waa'i kaka wocaammo» yukko.

²¹Amma'nnamaakkoo beero'i sa'aanchi meentichchosa ihukkok hinkidette? Illageen hanqo'i oogat yoohanee xummaan hee'oo beyyoo hee'ukko. Ihukkaarem kaba manna shoo keen wo'mmaakkoo beyyi ihukko.

²²Ki bir ci'llukko; doo'llammi woyi'n diqaasim wo'inne caraqukko.

²³Ki awwonsaan boqquwwaa gamaanina beshshuwwaa ikko'o. Hundim maqanxa iittitamo; a'llakkam luwwinam geerantamo. Adaraar oosika hanqa egettamoyyo; busar meentika meto'o macceessamoyyo.

²⁴Ee bikkina Isra'ee'l malaayyaam Waa'i gogoxxi Moollanni «I diina'anne i quunqa dilliisoommo; iinninne uullixxantam keeniinsim baado miqisoommo.

²⁵Kee'mmaalli quunqinnem guzumo'oommo; ci'lliinsi muccussoommo; ki haashaarancham bi'isoommo.

²⁶Illagee'nnaanni'nnoo'i oogataanoo sogaanoo kiina ki'isoommo; ee lasage ‹Hanqi siidamoo amma'nnamaakkoo beero'o› yamantootto» yukko.

²⁷Waa'i hanqo'an ihu bikkina Xiyoona oogatimminne gatisookko; Xiyoonanne hee'oo keeniinsim baaxiilo biiraa yoo keeno gatisookko.

²⁸Ihukkaarem boqquwwii baaxiilaanii matikka'a liitantamo; Waa'a uttam keen bi'llamo.

²⁹Iittitakkam hujuphphi haqquwwanne tuuttakkamo; doo'llitakko'i duubbi kaashshi beyyuwwannem sholle'llakkamo.

³⁰Lasaanchonne buyyi giggiru odakkichchisaa wo'i bee'i kaashshi beyyisaa ikkakkamo.

³¹Giir bubboo ammane bura'i shokkoo'isa «Neese malaayyaammuwwa» yitam manni bi'llamo; shokkisa ixxuwwanne waaroo bichcha uullisookkok bee'e.