Read Hadiyya Issaayyaas Kitaaba 10 Bible Online

Issaayyaas Kitaaba 10 - Hadiyya bible

Issaayyaas Kitaaba 10

¹I minaadaba wor amadoo hanqibee'i seera fissitam keenina aayye!

²Bux keen hanqa siiddambee'isa issitam keenina, wor amadanto'i i minaadaphpheka hanqa bi'issam keeninaa busar meentikaa adaraar oosikaa amaxxa boggam keeninaa aayye!

³Ee damiginne Waa'i ki'nnuwwa guzumo'oo ammanee bichchi qee'l uulliinsi waaroo ammanee maha ikkakkamo? Hara'mmatindu ayyi beyyo mattakkamo? Ki'nnuwwi amaxdu hannonne maaxxakkamo?

⁴Qeefadanchiinsii lehiinsii hinkid gattakkeena xantakkamo? Oo hundim ihaa Waa'ik quunqi billukkoyyome; ixxi angim guzumo'eena biddiqukkisame.

⁵Waa'i «I quunqina biccisa i axeellatinam mugisa ikkitti Aasoora, kiina aayye!

⁶Amaxxa bogaahii qeefaddahii minaadabooma gooqqi ha'llisa kade'llona eese quuqisu minaadabanne Aasoo'l minaadaba asse'oommo» yukko.

⁷Ihukkaarem ixxuwwik qoodo'i ee'isayyo. Oo sawwitim ixxuwwanne bee'e. Ixxuwwi sawwito'ok dut minaadaba guulliteenatti hee'ukko.

⁸Ee bikkina ixxuwwi adil «Iikki gaaxxi awwonsaan hundim adilluwwayyonnihe?

⁹Kaalnoona, Karkaamiisha, Haamaataa Arfaadaa ee'isam Samaare'ee Damaasqo'oo kaa'aammo.

¹⁰Yerusaalee'mmaanniinsii Samaare'aanniinsii lophphoo waa'uwwi yoo adilluwwa kanniinsi illageenim kaa'aammo.

¹¹Samaare'ennee Samaare'i waa'uwwannee issummisam Yerusaaleemannee otossakkam Yerusaalee'm waa'uwwannee ee'isa issoommoyyonnihe?» yaa sharookko.

¹²Ihukkaarem Waa'i «Yerusaaleemannee Xiyoo'n duunannee issoommoka guullaa lasage ixxi bolxoo'm bikkinaa biranchi bikkinaa Aasoo'l adilluwwi adila guzumo'oommo» yukko.

¹³Mashka'oomim ixxi «Ka hundam issummok an gagame; an malaayyaamo, lachchaamoo qooraa. Adilluwwika gabala gindummo; ixxuwwi amaxxam bogummo. Ee adilluwwi uullanne hee'u minaadaba hundam geedoommaninne sholliisummo.

¹⁴Uulli minaadab hundim i illagenne cii'i do'nnis hee'ukko; quunqa wixxaa'akkamaannisa ixxuwwika amaxxa hundam wixxaa'aa massummo. Eekka issummi ammane cii'i laxxi qaxam mikmikukkok bee'e; suumem fooqaa'aa laarukok hee'ukkoyyo» yaa sharaakko.

¹⁵Heed haqqa mureena amadu manchiinsi lophphoohonnihe? Magaazdu muroo manchiinsi lophphoohonnihe? Biccim ixxo amadu manchonne malaayye moo'iseena xanooyyo.

¹⁶Ee bikkina gogoxxi Moollanni Waa'i ee geejjuwwi gaadaanonne ciissoo jabbo asse'ookko; ixxuwwannem gii'llisa shokkiisoo iibba fatakookko.

¹⁷Isra'ee'l minaadabina caakki ihukkok ixxi gagim ixxuwwina giir ihookko; Isra'ee'l keesammi ixxi gagim matem ballanne uttaa qarxaffaa gatisoo'n hundam itaa guulloo gii'l laba'nnisa ihookko.

¹⁸Jabbi mancho nacisaa shoo'isam ciimbamaakkoo doomaa abuulli beyyoo fooree maaram guullaa bi'isookko.

¹⁹Doo'm woronne gatoo haqqim xigonne hoffan ihu bikkina ciilam ihuta'n xigeena xanookko.

²⁰Ee ammane bichchiinsi gatto'i Isra'eel ixxuwwa hawwoddo'i Aasoo'l minaadabanne amma'nnantamoyyo; ee bikkenne Isra'ee'l keesammanne, Waa'anne hanqo'isinne amma'nnantamo.

²¹Bichchiinsi gatto'i hofqax Isra'eelim malaayyaam ihu ixxuwwi Waa'i kollonne hanqo'isinne daba'llitamo.

²²Isra'eela, ki minaadaphphek xig uulli shashsha'l qax ihukkaarem xale'i gattoqax daba'llitamo. Hanqinne wo'mmaakkoo bichchi qoodamaakko.

²³Gogoxxi Moollanni Waa'i qoodamaa beeddaakkoo luwwa uullanne issookko.

²⁴Ee bikkina gogoxxi Moollanni Waa'i «Xiyoonanne hee'llakkam i minaadabina, Gibxi manni wor amaddo'isam ki'nnuwwa wor amadda'a gassito'i Aasoo'l minaadaba badditakkotte.

²⁵Ki'nnuwwanne quuqummi i quunqe hofqax ammaniinsi lasage uullisoommo; ee lasage ixxuwwa bi'isoommo» yoolla.

²⁶Gogoxxi Moollanni Waa'i Ooreeb qoxxaalli kinanne Miidiyaa'm manna aphphisukkisam ixxuwwam jiraafinne aphphisookko. Gibxanne issukkisam ixxi biccinne dambalaqa aphphisookko.

²⁷Ee ammane ixxuwwik iyyi ki'nnuwwi gudumiinsi, gaanjaqqim axiinsi ki'ookko. Geejjitakkam bikkinam oo gaanjaqqi iiqamookko.

²⁸Diina'i gogot Aay beero'onne aagookko; Miigrooninne higukkuuyyim amadaa hee'u mu'uta Miikmaasanne dissookko.

²⁹Daba'llamakkam beyyo higga'a Geeba'anne gatto'o. Raama'i beero'i mannim muggito'o; adil Saa'ool beero'onne Giibi'anne hee'llam keen hundim gibbo'o.

³⁰Gaalii'm minaadaba, laallehe! Laayish minaadaba, macceessehe! Anaatooxxi minaadabim dabachcha uwwehe.

³¹Maadmeenaahannee Geebiimannee hee'oo minaadab ixxuwwi gaga gatixxiteena gibbamuulla.

³²Kaballa diina'i Noob beero'onnette ihukkuuyyi Yerusaalee'm beero'i ihu Xiyoo'n duunanne ixxi woda baddiseena heekkeesansoolla.

³³Oono'o, gogoxxi Moollanni Waa'i haqqichchiinsi muramu caafisa iiqukkuuyyi dilliisookko; ixxuwwiinsi birantam keenii hore'em bolxitam keenii sholle'llo'ookko.

³⁴Doo'm woriinsi haqqa heedinne murakkamaare uboo'isa ixxuwwam Waa'i muransookko. Doo'llammi Liibaanoos haqqi muramaa uboo'isa ixxuwwim wodaam Waa'i anginne ubbamo.