Read Hadiyya Issaayyaas Kitaaba 11 Bible Online

Issaayyaas Kitaaba 11 - Hadiyya bible

Issaayyaas Kitaaba 11

¹Issayyi lugumiinsi lat firookko; niggiinsem mat caaf misha mishookko.

²Waa'ik Ayyaan ixxonne ihookko; qooroo'mmekii qoossimmikii Ayyaan, sogimmikii malaayyikii Ayyaan, lachchikii Waa'a baddimmikii Ayyaan ixxonne usheexxookko.

³Waa'a baddimmanne liiramookko; xale'i moo'ukkisinne te'im macceesukkisinne oogatooyyo.

⁴Ihukkaarem buxina hanqinne oogatookko; hara'mmatbee'i kee'nnekam hanqa egerookko. Ixxi sagarinne minaadaba guzumo'amookko; jor keenim bi'ookko.

⁵Muccuroom lamaxxi saqqa amma'nnamaakkoohaannoomim midaaxxi sabbat ihookko.

⁶Oro'ii gereebbii mateeyyanne hee'ookko; kabeerim fella'i wotallinne gii'mmookko. Waataanni hobbi geexxuwwinne maqire hosookko; hoffi oosim allaarookko.

⁷Lar tibbe'inne allaa'llookko; wo'llii wotallii mateeyyanne gii'mmookko; hobbi baalluwwisa bura'a itookko.

⁸Anuuna iicoo ciil qubaam hamashshi ba'l gadanonne lellookko; anuuna uru ciilim woraqaallichchi barenne anga aagisookko.

⁹Waa'aannonne keesammi duunanne hawwodoo te'im jor luwwi hore'em hee'ooyyo. Dambalaq wo'inne wo'mmoo'isa uulli Waa'a la'imminne wo'mmaakkoohan ihookko.

¹⁰Ee ammane Issayyi shumo'i mannina mare'i ihaa uullookko; minaadab ixxo hasookko; lat firookko; ixxi heechchi beyyim lombi yoohan ihookko.

¹¹Ee ammane Waa'i odim ixxi minaadabiinsi gatu keeno Asooriinsi, Gibxiinsi, Phaaxiroosiinsi, Tophphe'iinsi, Eelaamiinsi, Baabilooniinsii Haamaatiinsii ee'isam dambalaq tochchiinsii wo'inne kibbamu uulliinsii dabaraa worookko.

¹²Ee ammane Waa'i uulli hundannem binnita'a hee'llam Isra'ee'llekaa Yihuxxi minaadabaa uulli tochchi hundiinsim wixxaa'aa worukkisa uulli minaadab hundinam la'isoo mare'e iimaa'aa kaasookko.

¹³Ee lasage Isra'ee'l minaadab Yihuxxi minaadabanne yoo to'achchancha urookko; Yihuxxi minaadabim Isra'ee'l minaadabinne yoo diina'oomaa joranchaa urookko.

¹⁴Lamem minaadabim mat ikka'a eelliinchi aaggi Filisxee'm uulli mannanne ki'llamo; eelliinchi firanne yo'i minaadaphphekam amaxxa boggamo. Edoo'mmekaa Moo'aaphphi minaadabaa kaa'llamo; Amoo'n minaadabim ixxuwwina ijaajantamo.

¹⁵Waa'i gokkisoo hafachchinne Gibxi dambalaqika tochchuwwa gokkisookko; Efiraaxiis daajjem aphphisaa lamar hoffi dajjuwwanne baxxansoo bikkina manni caamma'innem fireena xanookko.

¹⁶Waa'i gaassi anno'i Gibxiinsi fitto'i ammane issukkisam kabadem bichchiinsi gatto'i Isra'ee'l minaadabam Aasooriinsi fittam googo taaphansookko.