Read Hadiyya Issaayyaas Kitaaba 13 Bible Online

Issaayyaas Kitaaba 13 - Hadiyya bible

Issaayyaas Kitaaba 13

¹Amoox beet Issaayyaasina Waa'i moo'isukkaare Baabiloo'n bikkina wocu hiraaqqi sagar kane.

²Matem luwwim mutoobee'i duu'n ludonne o'l baandira kaassehe; ki'nnuwwi sagara iimaa'llakka'a laallehe; gassaa'n goocinnem aaggona anginne qaqqassehe.

³I quunqa wonshitamisina iina keesanto'oo keeno ijaajaammo; i kaachchanne liirantam malaayyaammuwwam weeshaammo.

⁴Duunnuwwanne laarakkam laachcha macceessehe; oohim dut uulliinsi wixxaakkoo minaadaphphi dambaqa. Gogoxxi Moollanni Waa'i ixxi gogota orina gudisoolla.

⁵Ixxuwwim uulli tochchonne yoo qee'l uulluwwiinsi waatto'oohane; Waa'i uulla hundoomam bi'iseena ixxi quunqina mu'ut ihu gogota gudisaakko.

⁶Bichchi balli hincu bikkina wi'llehe. Hundam xanoo Waa'iinsi bichchi waarookko.

⁷Ee bikkina manni hundikim angi hoogookko; wodanim baa'ookko.

⁸Qattam meentichcho xuuchchi u'nnisoo'isam ixxuwwim baachchinne u'nnantamo; baa'lla'a ixxuwwina'i ixxuwwim moo'aqqantamo.

⁹Oono'o, Waa'ik balli hincaakko; Waa'ik quunqii bala'ii ihoo bikkina oo balli baddisoohane. Ee balla uullanne hee'oo baaxiilaan bi'oo bikkina uulli udma'i ihookko.

¹⁰Iima'n boollaanki ixxi gogotinne maqirem caakka uwwooyyo; eelliinchi ekkeen firukkuuyyim tuunsookko; aganchim caakka uwwooyyo.

¹¹Waa'i «Uulla jolli bikkina, boqquwwi keenom ixxuwwi baaxii'l bikkina guzumo'oommo; birantam keeno sholliisoommo; bolxitam kee'n mongam bi'isoommo.

¹²Bichchiinsi gatto'i keeno muccur worqiinsii Oofii'l uulli worqiinsii loboka haabaam issoommo.

¹³An gogoxxi Moollanni Waa'i i quunqi bala'a dilliisoommi balla iimannuwwa shaffeesoommo; uullim beyyiinsi heekke'oo'isa issoommo.

¹⁴«Hochchaaniinsi giboo kukkussichchisa te'im allaaraanchi bee'i gereebbi allaachchisa karakaadam hee'u minaadab ixxi minaadaphphi kolli daba'llookko; ixxi gaqqi uulli kollim gibookko.

¹⁵Qeefadamukkoka qasakkamo; amadamukkokam bisa'inne aphphisakka'a shakkamo.

¹⁶Ixxuwwika ciilluwwa ixxuwwi illagennem shakkamo; ixxuwwi minneewwa bogakkamo; ixxuwwi meentinnem mulli manni malaayyinne iinse'ookko.

¹⁷«Birina waaytambee'i, worqinam qawwiisantambee'i Meedoo'n minaadaba Baabiloo'n minaadabanne ki'isoommo.

¹⁸Ixxuwwik xiyyi harde'i ooso guullookko; ciilluwwinam mishshamoyyo; oosina qishixxitamoyyo.

¹⁹Baabiloo'n adillan mulli adillaniinsi hundiinsim lobakata mishisoohan hee'ukko; ixxi minaadabinam lombi hee'ukko. Ihukkaarem an Waa'i Baabiloona Soddo'mmisaa Gomo'llisaa himbiriiqa dabaroommo.

²⁰La'mmaagge eehe ayyim hee'ooyyo; udma'anne darba'llam Arabim dukkaana kaassamoyyo; allaaraanim diinate allaattamoyyo.

²¹Udma'i uulli moochchi daabbaroo beyyi ihookko; mooqqaqqi do'nna baxookko; guchche'ina heechchi beyyi ihookko; habusina kajji beyyi ihookko.

²²Got girbuwwanne, wengereellim wereeggisakko'oo adilla'n minneewwanne muunookko. Oono'o, ee'isinne Baabiloon bi'oo amman hincaakko» yukko.