Read Hadiyya Issaayyaas Kitaaba 14 Bible Online

Issaayyaas Kitaaba 14 - Hadiyya bible

Issaayyaas Kitaaba 14

¹Waa'i ixxi minaadabina Isra'eelina odim qishixxookko; ixxi gaqqanem issaa doo'llookko; ixxuwwi gaqqi uullannem hee'isookko; waaraanim waattamo; ixxuwwinnem shiinnaatanta'a maqire hee'llamo.

²Dut mulli minaadaphphi adilluwwi Isra'ee'l minaadab Waa'i ixxuwwina uwwu uulla daba'llitona hara'mmitamo. Mulli minaadab ixxuwwina agiddaninne awwaaddamo; illageen Isra'eela qeefaddo'i keen kaba ixxuwwi anganne ubbamo; wor amaddo'i keenom ijaajjamo.

³Waa'i ki'nnuwwa u'nniinsi, hawwiinsii kee'mmaalli agiddaniinsii usheexxisoo ammane

⁴Baabiloo'n adilanne. «Oono'o, wor amadoo adil ubaakko! Ixxi ka lasage ayyem wor amadooyyo!

⁵Waa'i jor gassaa'nneka malaayyee daannoomaa bi'isaakko.

⁶Oo gassaan quunqinne minaadaba wor amaddu'uuyyi hee'llo'ookko; kaa'lla'a amaddo'i keenom lobakata u'nnissam hee'llo'o.

⁷Ihukkaarem kaba lasaanchonne uulli hundim xummaa usheexxatoo siidookko; hundim liiranchinne zammarookko.

⁸Liibaanoos hoomii digibii oo adil ubu bikkina liirantamo; mashka'oomim ka lasage ixxuwwa mureena meesaana ki'isookkok hee'ooyyo.

⁹«Baabiloo'n adila Si'ool aa'eena gudaakko; wiiddim ixxo weeshoolla; uullanne hee'llo'i malaayyaammuwwi ixxena anga ki'issamo; adilluwwi hee'llo'i keenim adilla'n barcumiinsi iimitamo.

¹⁰Ixxenam ‹Atim ni'isam hoongaanchi ikkittonnihe? Niinniinsim matisa ikkittonnihe?

¹¹Ki lombi diitta'i sagarinnem Si'oola dillaakko'o; kiinniinsi woroon oor dahamaakko; ki eddechchim daquur ihaakko› yitakku'uuyyi» naacantakkamo.

¹²At caakkissoo soodaraa'l boollaankichcho, hinkid iimaniinsi ubbitto! Uulli minaadaba sholliissam hee'llittok hinkid iimaniinsi ubbitto!

¹³At ki tiironne «Iimane firaa i adillano Waa'i boollaankiinsi hanaan issoommo; keesammi duunanne yoo wixxixxi beyyonne adillanonne afuuroommo.

¹⁴Duubiinsem hanaan firoommo; Hundam xanoo Waa'innem kobi'llamoommo» yitaa hee'llitto.

¹⁵Ihukkaarem Si'oolanne xillaalli barenne dillitootto.

¹⁶Keese moo'llam keen hundim maalaltu'uuyyi «Hanqinam uulla heekkeesukkok, uulli adilluwwam huxiisukkok,

¹⁷heer uulla diihisukkok, beero'uwwa gindansukkokii qeefadanto'i keen ixxuwwi uulla daba'llitambee'isa issookkokii ka manchonnihe?» yitamo.

¹⁸Adilluwwi lehoo ammane lombinne waammamookko.

¹⁹Ihukkaarem at waamma hooggaa lokkinne kade'amakkam haqqi buyyisa uunjantaatto. Ki leeshim oranne beeddu manni leeshinne ifiisamaakko; ee kee'n leeshinnem kinaam barenne uunjamaa hance'amaakko.

²⁰Mashka'oomim at ki uulla bi'issaa ki minaadaba guullitaatto; ee bikkina at mulli adilluwwisa waamma siiddoo gada'i hee'ooyyo; jor kee'nnek shumo'i hee'ooyyo.

²¹Ki'lla'a uulla lagaa'llambee'isaa heer uullam beero'uwwinne wonshitambee'isaa ixxuwwi anno'i baaxii'l bikkina goo'n ooso hundam durakkam beyyo gudissehe.

²²Gogoxxi Moollanni Waa'i «Baabiloona orinne bi'isoommo; ma'lluwwam gatisoommoyyo; shumo'ik mahim gatooyyo. An Waa'i kaka wocaammo.

²³Baabiloona leepho'i issoommi bikkina urulli fikkaannoo beyyi ihookko; maham gatisoo'n fii'oo fii'aanchinnem fii'oommo. An gogoxxi Moollanni Waa'i kaka wocaammo» yoolla.

²⁴Gogoxxi Moollanni Waa'i «Hanqinam i qoodo'i hundim wo'mmookko; an sawwummisannem ihookko.

²⁵Aasoo'l manna i uullanne iiqansoommo; i duunannem hancaacoommo; ixxuwwi gaanjaqqim i minaadabiinsi ki'ookko; iyyim ixxuwwi gudumiinsi dillookko.

²⁶Heer uullina an qoodummi qoodo'i kane. Adilluwwam guzumo'eena i wod ki'aakko» yaa hide'aakko.

²⁷Gogoxxi Moollanni Waa'i ka'isa qoodaakko; egedeena xanookok ayyette? Ixxi wodim guzumo'ina ki'aakko; dabareena xanookkokdu ayyette?

²⁸Adil Akaaz lehu hiincho wocamu Waa'ik sagar kane.

²⁹Filisxee'm minaadaba, oono'o, ki'nnuwwa aphphisu bicci iiqamaakko; ihukkaarem liirantakkotte. Mat hamashshichchi lehoo ammane ixxeensi baasoo mullek beyyonne qooccamookko; hamashshi quunqiinsim giiri'nnoo'i bararoo xarakkichchi qoccamookko.

³⁰Bux allaachchi beyyo siixxitamo; hawwaanim xumminne hee'llamo. Ihukkaarem ki'nnuwwika shumo'o sibaarinne guullookko; gatto'i keenim beedditamo.

³¹Ki'nnuwwi Filisxee'm beero'uwwi hundim hara'mmatina laallehe; hundim baa'llehe; hanaa'n qarinne di'llek duub waaroolla; oohim ayyim gibaa xoreena xanoobee'i gogota.

³²Filisxeemiinsi waattam asse'amaanina daballoommi dabachchi maha? Neesem «Waa'i Xiyoona dabaraa uullisaakko; hawwonne hee'u minaadabim eehe'enne daphphixxi beyyo siixxaakko» yinoommo.