Read Hadiyya Issaayyaas Kitaaba 17 Bible Online

Issaayyaas Kitaaba 17 - Hadiyya bible

Issaayyaas Kitaaba 17

¹Damaasqo'i bikkina Waa'i «Damaasqo'i kanniinsi eehid beero'i ihaa hee'immi bikkenne gindamaa diihookko.

²Sooriy beero'uwwi manni bee'i diih ihookko; gereebbii larii beyyonne allaa'llookko; holloohim hee'ooyyo.

³Isra'ee'l girbi bee'an ihookko; Damaasqo'im adil bee'an ihookko. Bichchiinsi gatu Sooriy manni Isra'ee'l minaadaphphisam sholle'ookko. An gogoxxi Moollanni Waa'i kaka wocaammo» yoolla.

⁴«Isra'ee'llek lombi sholle'nnanne goddim buxoomanne daba'lloo amman waarookko.

⁵Isra'eel hurbaata murakka'a farshimma wixxaa'akka'a lasage murugaa gatoo maasisa ihookko. Hurbaata wixxaa'akka'a lasage leexa'oo Raafaayi'm cebbisam ihookko.

⁶Ihukkaarem weera heekkeesakkam ammane lam te'im sas mish gatoo'isam soor te'im onti mishim mat caafanne hee'oo'isa Isra'eeliinsi hofqaxim gatookko. An Isra'ee'l Moollanni Waa'i kaka wocaammo» yoolla.

⁷Oo amman afoohaare minaadab hara'mmatina Isra'ee'l keesammi ihu ixxuwwi Qooccaanchi kollonne daba'llookko.

⁸Ee lasage anginne baxxo'i kiti'm beyyonne amma'nnanchi gatookko; ee'isam Asheer misilannee aduruusa wiriissiteena anginne baxxo'i kiti'm beyyuwwannee amma'nnancha uttamo.

⁹Oo amman afoohaare Isra'ee'l oosiinsi Hiiwe'ikii Amoore'i mannii gibbo'aare ixxuwwi beero'uwwi diihukkisam girbamaakkoo ki'nnuwwi beero'uwwim diihookko.

¹⁰Ki'nnuwwa gatisu Waa'a xaddakko'ookko; ki'nnuwwina daphphixxi kin ihukkokam tiittakko'oyyo. Ee bikkina er kaashsha kaassakko'aaree annanni sire'em wixxakko'aaree

¹¹oohim ee kaassakko'i ballam mutoo'isaa wixxakko'i ballam fiitoo'isaa issitakko'aarem atootoom hawwi ballaa qaraarbee'i jabbi ballaa awwaad bee'an ihookko.

¹²Dambalaqanne hambu'llam gugoo'isa gugoo dut minaadabina, malaayyaam womoo'llisam gugoo minaadabina aayye!

¹³Uulli minaadab malaayyaam womoo'llisa gugukkaarem Waa'i axeeroo ammane duunanne hafachchi binnaa'oo bura'isaa hambu'llaminne binnoo di'llisaa binnitamo.

¹⁴Oono'o, uulli hiimoohaare dambaq ihookko; ihukkaarem uulli soodukkuuyyi ayyim hee'ooyyo. Neese boggam kee'nnekii hawwissam kee'nnekii saam eehane.