Read Hadiyya Issaayyaas Kitaaba 19 Bible Online

Issaayyaas Kitaaba 19 - Hadiyya bible

Issaayyaas Kitaaba 19

¹Gibxi uulli bikkina wocamu Waa'i sagar kane. Waa'i duubinne Gibxi uulla qaqqisaa waarookko. Gibxanne otossakkam waa'uwwim ixxi illagenne heekke'amookko. Gibxi minaadabim baa'aa huxe'ookko.

²Waa'i «Gibxi uulli manni ixxuwwina'i ixxuwwim guzumo'antamisa issoommo. Abbaayyi abbaayyonne olla'i olla'anne ee'isam mat beero'i mulli beero'onne mat adil mulli adilanne diina'oominne ki'aa oramookko.

³An Gibxi mannik sawwit bi'oo'isa issoommo. Ixxuwwi a'llancham gindoommo. Ee ammane ixxuwwi hara'mmatina ixxuwwi waa'uwwa, kiiraano, wiidda weeshsham keenoo gennaanoo xa'mmitamo.

⁴Gibxi minaadaba mogaalli adi'l anganne higisaa uwwoommo. Oo mogaalli adilim ijaajookko. An gogoxxi Moollanni Waa'i kaka wocaammo» yoolla.

⁵Abbaayyi daajji xa'ookko. Qaphphitinnem xoo'ookko.

⁶Daajjuwwi wo'i shamookko; boohe'uuwwi wo'im xa'ukkuuyyi gogookko. Shomboqo'ii leendii quubookko.

⁷Abbaayyi daajji gammalanne hee'oo kaashshi hundim gogookko; ee daajji gammalanne wixamu hurbaat hundim gogohaare hafachchi binnaa'ookko.

⁸Abbaayyi daajjiinsi qurxumme'e qaashinne amaddam keen kichche'llamo. Shikkinnee wongirinnee amaddam keenim wi'llitamo.

⁹Er fatirinne eddechcha daddam keen hundim neeyyato muttamo.

¹⁰Eddechcha daddam keenii angi bax lachchi yoo keenii hundim kichche'lla'a wi'llitamo.

¹¹Xoo'aa'n gassaan hore'em qawwuwwa. Qoolluwwi ikko'i Fari'oon suu'm mannik sogitan awwaad bee'ane. Adilinam ‹Neese qoolluwwa; ni shumo'im gaassi adilluwwi shumo'iinsette› yito'ok hinkidette?

¹²Adila, oo qoolluwwi ki gassaan hannonne yo'o? Gogoxxi Moollanni Waa'i Gibxanne isseena sawwu luwwa hino'o kiina la'isona.

¹³Xoo'aa'n gassaan qawwuwwa; Meemfoos gassaanim huushanto'ookko. Gibxi uullik la'anto'oo gassaan Gibxa huushisso'ookko.

¹⁴Ixxuwwi hamaarammi sogitano uwwitamisa issukkok Waa'a. Ee bikkina Gibxi hundemisinnem huushamaa ixxi gaqqi uwwim luxuunxisaa ubbuusoo dimbaanchisa tartarookko.

¹⁵Gibxina goddaanchom ihukko buxichchi, la'amaakkoo te'im la'amubee'ek ayyim maham isseena xanooyyo.

¹⁶Gibxi minaadab baa'aa meentisa ihoo balli waarookko; gogoxxi Moollanni Waa'i ixxuwwa guzumo'eena woda ki'isoo ammane baachchinne huxe'llamo.

¹⁷Yihuxxi minaadab Gibxi minaadabina baddisoohan ihookko; Yihuxxek summi weeshamoo ammanem dambaqqamo. Oohim gogoxxi Moollanni Waa'i ixxuwwa guzumo'eena qoodukkisa laqqo'i bikkinatte.

¹⁸Ee ammane Gibxi uulli beero'uwwiinsi ontonne hee'oo manni Ibro'isinne woccamo; ee beero'uwwi manni gogoxxi Moollanni Waa'i summinne hide'llamo. Ee beero'uwwiinsim mat «Eelliinchi Beero'o» yamamookko.

¹⁹Ee ammane Gibxanne Waa'ina kitima hincaa'akkam beyyi baxamookko. Ee uulli tochchonnem Waa'ina annanni ihaakkoo ki'n utub uullookko.

²⁰Oo keenim Gogoxxi Moollanni Waa'i Gibxi uullanne yoohan ihukkisina mare'ee naqaashaa ihookko. Ee uullanne hee'llam mannanne hawwi afoo ammane Waa'i hara'mmona uunxitam ammane Waa'i ixxuwwina agaagoo gatisaancho asse'ookko. Ixxim ixxuwwi diina'inne oramaa ixxuwwa gatisookko.

²¹Waa'i Gibxi uulli mannina ixxi gaga la'isookko. Ixxuwwim ee ammane ixxi hanqo'i Waa'i ihukkisa laqqa'a otossitamo. Kitimaa hurbaaxxi ludoo Waa'ina hincaa'llamo. Ixxenam uga'a aaggamo; aaggo'i uga'am uwwitamo.

²²Waa'i Gibxi minaadaba guzumo'ookko. Ihukkaarem dabaraa fayyiisookko; ixxi kollonnem daba'llitamo; ixxim ixxuwwi uunxato macceesaa fayyiisookko.

²³Ee ammane Gibxi uullinaa Aasoo'lli uullinaa lambe'enne lob bur firookko. Aasoo'l manni Gibxa mattamo; Gibxi mannim Aasoora mattamo. Lamem uulli mannim maqirem otossitamo.

²⁴Ee ammane Isra'ee'l uulli Gibxi uullinnee Aasoo'l uullinnee mat ihaa saxxi uulli ihookko; oo sasem uulli minaadabim heer uulli hundinam maassi ihookko.

²⁵Gogoxxi Moollanni Waa'im «Ki'nnuwwi Gibxanne hee'llakkam i minaadab, an qooccummi Aasoo'l minaadabii doo'llummi Isra'eelii masse'ammehe» yookko.