Read Hadiyya Issaayyaas Kitaaba 2 Bible Online

Issaayyaas Kitaaba 2 - Hadiyya bible

Issaayyaas Kitaaba 2

¹Yihuxxi uulli bikkinaa Yerusaalee'm beero'i bikkinaa Amoox beet Issaayyaasinne ihaa Waa'i wocu sagar kane.

²Lasaanchi doollenne Waa'ik Keesammi Min yoo duun mulli duunnuwwiinsi hundiinsim lophphaa moo'amookko. Hoffi duunnuwwiinsi hundiinsim lophphookko; uulli minaadab hundim ixxi kollonne waattamo.

³Ee bikkina mulli minaadab «Seer Xiyooniinsi, Waa'i sagarim Yerusaaleemiinsi firookko; ee bikkina waallehe, Waa'i duunanne fillona; Yaaqoob Waa'i Keesammi Minem mallona. Ixxi doo'lla issinonam neese losisookko; neesem ixxi googonne malloommo» yitamo.

⁴Waa'i uulli minaadabanne oogatookko; dut kee'n lambe'iinsi woca bi'isookko. Ee bikkina ixxuwwi bisa'a maarashanne, bagadom jajjaranne dabattamo; Mat minaadab mulli minaadabanne ora ki'isooyyo; ee lasage o'l losano losookkokim hee'ooyyo.

⁵Yaaqoob ooso, waallehe! Waa'i caakkanne daba'llammona!

⁶Waa'a! Yaaqoob shumo'i ihu ki minaadaba hore'oomam uttaatto; oohim ixxuwwi eelliinchi firanne yoo manni kiiratinnee Filisxee'm manni genno'innee wo'mmito'i bikkinatte. Ki minaadabim mulli minaadabinne hamaaramaakko.

⁷Ixxuwwik uulli birinnee worqinnee wo'mmu bikkina amaxxi qaxiinsi hanaan ihaakko. Ixxuwwi uullannem farad wo'mmaakko; faraxxi gaare'ikim xig dutaakko.

⁸Ee'isam ixxuwwi uullanne qophpha'n waa'uwwi wo'mmaakkoohane; anginne baxxo'i misilluwwinam otossitamuulla.

⁹Ee bikkina manni hundannem tuullii sholle'nnii afookko. Moollanna, ixxuwwika baaxiilo haafititte.

¹⁰Waa'i quunqiinsii baddisoo ixxi hibbiinsii gattakkeena daawwa'uwwannee barennee maaxammehe.

¹¹Bolxitam keen sholle'llamo; birantam keen bi'llamo. Ee balla xale'i Waa'i lombinne iimiimookko.

¹²Gogoxxi Moollanni Waa'i bolxitam keenoo birantam keenoo sholliisoo balla qoodaakko.

¹³Ixxi Liibaanoos uulli qeeraa'l digibbuwwaa Baasaa'n uulli oda'uwwaa hundam bi'isookko.

¹⁴Lob duunnuwwaa hoffi duunnuwwaa,

¹⁵beero'i egerakkam qeeraa'l godo'uuwwaa o'l girbuwwaa hundam shiraashirookko.

¹⁶Lobakat mishisoo mu'utaa Tarsees wongiraa xuuxamoo'isa issookko.

¹⁷Mannik bolxoom bi'ookko; iimiim ihimmim gatookko; Waa'i bikkenne otossakkam luwwim hore'em bi'ookko; ee ammane lombinne xale'i Waa'i iimiim iimiimokko.

¹⁹Waa'i uulla huxiiseena waaroo ammane quunqiinsii baddisoo hibbiinsii xorimmina ki'nnaannonne daawwa'i woronnee uulli ba'l woronnee maaxanteena yakitamo.

²⁰Manni ee keenina otossiteena ixxuwwi anginne baxxo'i bi'llekaa worqi misilaa fuuxe'inaa garashshamminaa ubbussu'uuyyi mattamo.

²¹Uulla huxiiseena Waa'i ixxi quunqinnee ixxaanninne baddisoo hibbinne waaroo ammane eehanniinsi maaxanta'a xotteena ki'nnaannonne daawwa'annee ki'n beqeeqannee maaxantamo.

²²Fooshshi sanenne yoo lehoo manchonne bakke'immi gatona; ixxi mahinam awwaadooyyo.