Read Hadiyya Issaayyaas Kitaaba 21 Bible Online

Issaayyaas Kitaaba 21 - Hadiyya bible

Issaayyaas Kitaaba 21

¹Baabiloo'n bikkina wocamu Waa'i sagar kane. Woroo'n qariinsi ki'oo ambu'llam hundem luwwam fii'aa bi'isoo'isa baddisoo mat uulliinsi kee'mmaalli bichchi waarookko.

²Baddisoo kaalti iina moo'amaakko; lagookkok higisaa uwwookko; bogookkokim bogookko. Eelaa'm gogota, qassakkeena fillehe. Meedoo'n gogota, beero'uwwa kibbehe. Waa'i Baabiloo'n mashka'inne afu hawwo hundam bi'isookko.

³Ee bikkina i lamad xissukko; qattam meentichchosa xuuchchi amadukko; xissummi bikkina macceeseena xanummoyyo; muggummi bikkinam moo'eena xanummoyyo.

⁴Illi kululaa'oolla; baa'aa huxe'oommuulla. Uulli qaqqisaa hiimona mixummo. Neeyyata issummi luwwim muggisoohan ihukko.

⁵An moo'ummi kaaltannem maaddi gudaakko; koyyi afuuroo beyyim dahamaakko. Ixxuwwim ichchannee aggannee hee'llo'isam «Ki'nnuwwi o'l awwonsaano, agira shiinshitakka'a gudissehe» yoo ijaaj dangonnem higukko.

⁶Ee lasage Waa'i iina «Luwwi hundam qoto'aa moo'aa kiina kuroo mancho gudise.

⁷Faraxxi gaare'e, hallanne saa'llito'i keenoo gaameela'a jigissam keenoo moo'ona; qoossaa moo'ona» yukko.

⁸Oo qoto'aa mo'oo egeraanchim «I moollanna, an ee egechchi beyyonne ihaa hiimoo ballaa hundam egeroommuulla» yukko.

⁹Oono'o, mat manchi faraxxi gaare'inne waaraakko. Ixxim «Baabiloon ubukko; ubukko! Ixxuwwi otossitam waa'uwwi misilluwwim xaamaa ubukko» yukko.

¹⁰I minaadab Isra'eela, arasa oodo'onne ganakkamisa ki'nnuwwim ganantakka'a hee'llakko'o. Ihukkaarem kaba gogoxxi Moollanni ihu Isra'ee'l Waa'iinsi an macceesummi mishiraachchi sagara ki'nnuwwina kurummo.

¹¹Eedoo'm bikkina wocamu sagar kane. Mat manchi Seeyriinsi eese weeshaa «Qoto'aancho, uulli soodeena ihaatennihe? Uulli soodeena hinkaa'n amman gataate?» yukko.

¹²Qoto'aanchim «Uulli soodeena hincaakko; ee'isam hiimookko. Dabattakka'a xa'mmitakkeena hassakkolas daba'llitakka'a waattakka'a xa'mmehe» yaa dabarummo.

¹³Araphphi uulli bikkina kuramu hiraag kane. Iyyiishshi gaameela'innem Araphphi uulli udma'anne wiiddantakkam Daadaa'n minaadaba,

¹⁴xeebe'lla'a ki'nnuwwi beyyo waattam keen hundinam wo'o uwwehe. Ki'nnuwwi Teema'i minaadabim gibba'a ki'nnuwwi beyyo waattam keenina ittam luwwa uwwehe.

¹⁵Minaadab hundim ixxuwwanne xabbu bisa'iinsi, chokkoramu xiyyiinsii qooxxaalli oriinsii xoreena giboolla.

¹⁶Ee lasage Waa'i iina «Mexxo'i mat hiinchi woronne Qeedaar sulluwwik lombi bi'ookko.

¹⁷Xiyya chokkottam keen Qeedaaranne la'anto'oo geedduwwa. Ihukkaarem hofqax xale'i gattamo. Isra'eelina Moollanni ihummi an Waa'i kaka wocaammo» yukko.