Read Hadiyya Issaayyaas Kitaaba 22 Bible Online

Issaayyaas Kitaaba 22 - Hadiyya bible

Issaayyaas Kitaaba 22

¹Kaalti baalle yakkam beyyi bikkina wocamu hiraag kane. Ki'nnuwwi hundim fooqanne fittakko'ok mah hawwisukkaarette?

²Dambaqinnee laachchinnee wo'mmitaattoo beero'onne, dimbita'a googguwwanne ubbo'i keen bisa'inne shakko'oo te'im oranne leto'oo keenoyyo.

³Ee beero'i awwonsaan hundim matem xiyyam tokkossoo'nnim gibbu'uuyyi qeefadanto'o.

⁴Leto'i i minaadaphphi bikkina qaraaraallisa wi'lloommuulli ihu bikkina eese wocissakkotte; soggakkotteme.

⁵Kuk kaalti baallenne u'nnanne, kaa'anchannee hambalaachchi ammanee ihaakko; oo hundim neesenne ihoo'isina issukkok gogoxxi Moollanni Waa'a. Ni beero'i qashshuwwi gindamaa ubaakko. Hara'mmatina laarakkam laachchim duu'n lud afeebe'e macceesamoolla.

⁶Eelaa'm gaadaanim faradonne saa'llita'a xiyyaa tokkaashshe'ee amadda'a waatto'o. Qiir gaadaanim agira gudisso'ookko.

⁷Yihuxxi hixaam cebbuwwanne faraxxi gaare'uuwwi wo'mmaakko. Faradonne saa'llito'i gaadaan Yerusaalee'm ooxxi gooc illagenne uullito'ookko.

⁸Yihuxxi uulli girbuwwi hundim gindamaakko. Ee ammane o'l mu'uta dissakkam minenne hee'u mu'uta fissitakko'ookko.

⁹Daawiit beero'onne gindamaa tuubamu hacci lophphukkisa moo'llakko'ookko. Woroo'n delbannem wo'o wonshitakko'ookko.

¹⁰Yerusaaleemanne yoo minneewwa hundam doo'llakka'a xiggakko'ookko. Beero'i qasha dabattakka'a oottakkeena mat mat minneewwa ginditakko'ookko.

¹¹Gaassi delbi beyyiinsi dilloo wo'o dabattakkeena beero'i woronne wo'o qoqqobbakko'o. Ihukkaarem ee hundam gaassaa baxukkok Waa'i ihukkisa qoossitakko'oyyo.

¹²Ee ammane gogoxxi Moollanni Waa'i horoore hogoossitakkahii xiddi eddechcha edde'llakkahii kichchi'llakkonaa wi'llitakkonaa weeshaa hee'ukko.

¹³Ihukkaarem ki'nnuwwi ee woshsha aa'imma sabbakka'a uguda gudissakko'o. Ittakkam gereebbaa mirgo'uwwaa duttakko'o. Woyi'n diqaasam aggakka'a «Soodo leneena xannoommi bikkina kaballa intonaa angonaa» yitakko'o.

¹⁴Gogoxxi Moollanni Waa'i «Ixxuwwi foorinne hee'llam doollenne ku hawwojji hanqoomam shiinshamooyyo. An gogoxxi Moollanni Waa'i kaka wocaammo» yaa iina kuraakko.

¹⁵Gogoxxi Moollanni ihu Waa'i adilla'n minenne gassaanchi ihu Sheebinaan beyyo mattaa

¹⁶«Sheebina, kabeyyonne maha issitoolla? Ki gagina waamma gudissoo'isina, duunanne at waammantoo beyyo gudissoo'isinaa ki leesh waammamoo kina cabbattoo'isa issukkok ayyette?

¹⁷At ki gaga ‹An wodaam mancho› yiteena xantootto. Ihukkaarem Waa'i keese gafe'aa ubbuusookko.

¹⁸Xorbe'isam huushaa haraar uullanne uunjookko. At bakke'lloo ki faraxxi gaare'uuwwi gadanonne letootto. Ki moollanni mininam sholle'n ikkootto.

¹⁹At baxxoo baxiinsi yaayyantootto; daannoomiinsim shaarantootto.

²⁰«Ee balla iina awwaadaanchi Hilqiy beeto Eeliyaaqeema weeshsoommo.

²¹At edde'llam hee'llit lombi eddechcha ixxena eddeesoommo. At lade'llam hee'llitti sabbatam ixxena ladiisoommo. Daannoomam kiinniinsi hooraa ixxena uwwoommo. Ixxi Yihudannee Yerusaaleemannee hee'llam minaadabina anni ihookko.

²²Daawiit mi'n fooqaa'aanchom ixxena uwwoommo. Ixxi xufookkoka fooqa'ookkok bee'e. Ixxi fooqaa'ukkokam xufookkok bee'e.

²³Anim ixxo amma'nnamaakkoo beyyonne xiribbisa kaasoommo. Ixxi anni mininam lombi adillan ihookko.

²⁴«Ihukkaarem ixxi qarmannii qee'llonne hee'oo shumo'ii hundim ixxena kee'mmaalli iyyisa ihookko; mi'n mu'uta hundam xirbanne saqalakkamisa ixxuwwi hundim ixxonne calcalitamo.

²⁵Ihukkaarem oo hundem luwwim ihoo ammane oo qoxxaalli mu'uta saqalakkam xiribbi xoqolamaa ubookko. Ee xiribbanne saqalamaa hee'u mu'ut hundichchim iiqamaa ubookko» yukko. Kaka wocukkok Waa'a.