Read Hadiyya Issaayyaas Kitaaba 23 Bible Online

Issaayyaas Kitaaba 23 - Hadiyya bible

Issaayyaas Kitaaba 23

¹Xiroos Bikkina kuramu hiraaqqi sagar kane. Tarsees markabbuwwa, wi'llehe. Xiiroos gindamaakko. Minneewwii markabbuwwi uulloo beyyuwwii hundim gindammaakko. Qophroosiinsi daba'llitakkam ammane macceessakkam woshshi eehane.

²Markabinne daddattam keen goddisso'oo dambalaq gammalanne hee'llakkam minaadabii Siidoo'n uulli daddaraanii kichchechchinne sai'i'llehe.

³Gibxi uulli hurbaat lob dambalaqinne waaraa Xiiroosina lobakat amaxxi iham hee'ukko; ee bikkina Xiiroos heer uullina meer ihukko.

⁴Siidoona, dambalaq girba tuure; dambalaq «An xuu'ummoyyo; qarummoyyo; goo'n oosoo landaa li'isummoyyo» yaakko.

⁵Xiroos bi'ukkisa macceesoo ammane Gibxi uulli minaadab u'nnamookko.

⁶Ki'nnuwwi dambalaq gammalanne hee'llakkam minaadaba, aayye yitakku'uuyyi wi'llehe. Tarseesam gibbehe.

⁷Ixxi minaadab qee'l uulla maaraa amadeena xanaa doollenne hundannem liiramaa hee'am hee'u beero'i ka'isa ihukkonnihe?

⁸Adilla'n mare'i issitam hee'llo'i beero'onne, gassaanoo heer uullanne summaammuwwa ikko'i daddaraan hee'u Xiiroosanne ku hundim qoodukkok ayyette?

⁹Kaka isseena sawwukkok Gogoxxi Waa'a; ixxi kaka qoodukkok ixxuwwi issito'i luwwanne bolximma uttamisa isseenaa lombaam manna sholliiseenattee.

¹⁰Tarsees minaadaba, ka lasage hoorookkok bee'i bikkina Abbaayyi daajji gamma'llisam ki'nnuwwi uullam abuullehe.

¹¹Waa'i dambalaqanne anga biddiqaa'aa adilluwwa muggisukko. Kana'aa'n girbuwwi gindamoo'isna ijaajukko.

¹²Ixxim «Siidoo'n beero'o, ki liiranchi doolli beeddaakko; ki minaadabim wor amadamaakko; Qophphiroosa gibbaa xoruta'nnim ee beyyonnem xumma siidooyyo» yaakko.

¹³Oono'o Baabiloo'n uulla moo'llehe; ee uulli manni awwaad bee'an ihaakko; Aasoo'l uulli manni ee uulla bii'l moochchi daabbaroo beyyi issaakko; girbuwwa gindansamaa uullooma hacci tuubamoo beyyi issamaa ixxuwwika qoto'akka'a egerakkam beyyuwwa baxamaakko.

¹⁴Ki'nnuwwi Tarsees uulli markabbuwwi ki'nnuwwi girbi gindamu bikkina aayye yi'llehe.

¹⁵Xiiroos mat adi'l umu'l doolli qaxa lamarayyi hiinchina xadamookko; oo hiinchuwwi higaa lasage buubbeesaanchi meentichchosa Xiiroosina kadakko'ookko.

¹⁶At xadantaattoo bubbeesaanche, diitta'a aphphissittuuyyi beero'o do'e; keese tiirakkona er mazmuura macceesise; lobakat mazmuuram zammare.

¹⁷Lamarayyem hiinchim higaa lasage Waa'i Xiiroosa moo'ookko. Ise gaassi haashaaranchi baxonne daba'lta'a heer uulli adilluwwinne hundinnem daddarinne saa'llamo.

¹⁸Daddarinne siiddam diinatim Waa'ina annanni ihaakkoohan ihookko. Is gagina mahim wixxooyyo; dissamooyyo. Siiddam luwwi hundim Waa'ina awwaaddam keenina hurbaatinaa er eddechchinaa fafaakkoohan ihookko.