Read Hadiyya Issaayyaas Kitaaba 24 Bible Online

Issaayyaas Kitaaba 24 - Hadiyya bible

Issaayyaas Kitaaba 24

¹Oono'o, Waa'i heer uulla bi'isaa diihisookko; himbiriiqansaahim uullanne hee'oo minaadaba binnaa'ookko.

²Oohim minaadabanne ihookkok qeessanne, baxaanonne ihookkok baxisaanonne, moollamanne ihookkok is baxaanchonne, bitaa'aanonne ihookkok biteesaanonne, liqaayyisaanonne ihookkok liqaayyo aa'aanonne, badano miqisaanonne ihookkokim badano miqaanonne ihookko.

³Uulli mahim bee'i udma'i ihookko. Hore'em bi'ookko. Waa'i kaka wocaakko.

⁴Uulli gogookkoo giggirookkoo; heer uullim juujookkoo giggirookkoo. Uullanne la'anto'oo kee'nnek malaayyi hoogookko.

⁵Uullanne hee'oo minaadaphphi mashka'inne uulli haashaaramaakko. Minaadab Waa'ika seera gindaakko; ixxi ijaajom iiqaakko. Heer heerina hee'oo hidi'l sagaram gindaakko.

⁶Ee bikkina duunchi uulla bi'isookko; uulli minaadabim guzumo'amookko. Ee bikkina uulli minaadab shokkookko; hofqax mannim gatookko.

⁷Woyi'n kaashshi gogaakko; woyi'n diqaasim beeddaakko. Ee bikkina illageen liirantam hee'llo'i keen kaba kichche'llo'ookko.

⁸Xarbe'e ganku'uuyyi liiranchi hosaakko; liiranchinne kaddam kee'n sagar bi'aakko; mishisoo diitta'i sagarim bee'aakko.

⁹Woyi'n diqaasa agakku'uuyyi liiranchi hee'ooyyo. Dimbisoo aggim qaraaraalli ihookko.

¹⁰Gindamu beero'i diihookko; ayyi manchim aagoobee'isa min hundikim gooc xufamookko.

¹¹Woyi'n diqaas od hee'oobee'i bikkina wixxixxi beyyi hundannem laachchi ihookko; liiranchi heer heerinam bi'ookko. Lobakata liiranchim uullanne hee'ooyyo.

¹²Beero'oom hore'em gindamu bikkina gooccuwwi xaamaa ubaakko.

¹³Wee'llekaa woyi'nnekaa misha feerakka'a lasage murugoo'isa uullii uulli minaadabii murugookko.

¹⁴Bichchiinsi gatto'i keen liiranchinne ililitamo. Eelliinchi aagginne hee'llam keenim Waa'i loban ihukkisa kuttamo.

¹⁵Eelliinchi firinne hee'llam keenim Waa'ina lomba uwwitamo. Wo'inne kibbamaakkoo uullanne hee'llam keenim Isra'ee'l Moollanni Waa'ika summa lonsitamo.

¹⁶«Muccurina lombi ihona!» yoo mazmuur uulli tochchi hundiinsim macceesamookko. Ihukkaarem an lobakata nacaa jiirummi bikkina iina aayye! Laggam keen lagimmanne qoxxito'ookko; lagimmoomim baasaakko.

¹⁷Heer uulli minaadaba, macceessehe! Dambaq, barii qaashii ki'nnuwwa egeraakko.

¹⁸Dambaqiinsi gibookkok barenne ubookko. Bare caallaa xoreena yakoohim qaashanne amadamookko. Iima'n maskoottuwwi fooqaakko; uullikim shooho'i heekke'aakko.

¹⁹Uulli heekke'ookko, anamookkoo baxxansamookkoo.

²⁰Uulli dimbaanchisa tartarookko; hafachchi heekkeesoo godo'isam wonciwoncookko. Heer uullanne baaxii'l iyyi kee'mmoo bikkina ubookko; la'mmeka od ki'ooyyo.

²¹Ee ammane Waa'i iima'n malaayyaammuwwaa uulli adilluwwaa guzumo'ookko.

²²Barenne karanta'a hee'llam kee'nnisa mateeyyannem karantamo; karaxxi minim ixxuwwi hanenne xufamookko. Lobakat balliinsi lasagem ixxuwwanne oogatamookko.

²³Gogoxxi Moollanni Waa'i adil ihoo bikkina agan tuunsookko; eelliinchim caakka uwwooyyo. Ixxim Xiyoo'n duunannee Yerusaaleemannee ihaa gassookko. Minaadaphphi awwonsaanim ixxi lombe moo'ookko.