Read Hadiyya Issaayyaas Kitaaba 25 Bible Online

Issaayyaas Kitaaba 25 - Hadiyya bible

Issaayyaas Kitaaba 25

¹Waa'a, at iina Moollanna; an keese iimiimaa'oommo; ki summam galaxxoommo. At lobokata maalalsiisoo luwwaa hinaxxi doolliinsi ki'issaa qoodditti luwwaa hundam hore'em amma'nnamaakkoo'isinne issitaatto.

²Beero'uwwi gindamaa udma'i ihoo'isa issitaatto; ee beero'uwwika girbuwwa gindansitaatto. Ni diina'ik adilla'n minneewwi bi'aakko; heer heerinam hore'em baxamooyyo.

³Malaayyaam uulli minaadab keese lonsookko; mogaalli uulli beero'uwwanne hee'oo keenim keese baddookko.

⁴At buxina, waaraaninaa hawwaaninaa ixxuwwina hawwi ammanenne girbi ikkaatto; ambu'llamiinsi gattam minee eelliinchi iibbiinsi hafixxitam beyyoo ikkaatto. Mogaalli keen gorte'e gafe'oo hagayyi wiisho'isaa

⁵udma'i uulli iibbisaa minaadaba hawwoddamo. Waa'a, ihukkaarem at duub uullika hafura siggisoo'isa ni diina'ika sha'llancha sa'issiissaatto; mogaalli kee'n laachcham sa'issiissaatto.

⁶Gogoxxi Moollanni Waa'i ka Xiyoo'n duunanne heer uulli minaadab hundinam lob maadda gudisookko. Ee maaddannem doo'llammi woyi'n diqaasaa er hurbaataa gudisookko.

⁷Ka duunannettem ihaa minaadab hundannem haf ihu du'm eddechcha heer uulli minaadabannem biddiqu ifiishshaancho ki'isookko.

⁸Hundam xanoo Waa'i leho heer heerinam bi'isookko. Manni hundikam indiidda shiinshookko. Ixxi minaadaphphi tuullam heer uulliinsi bi'isookko. Waa'i ixxi gagim kaka wocaakko.

⁹Ee balla minaadab hundim «Oono'o, ni Moollanni kane. Ixxonne amma'nninummo ixxim neese gatisukko. Waa'i kane, ixxonne amma'nninummo; neese gatisu bikkinam lobakata liirammona; hore'em lobakata liirammona!» yookko.

¹⁰Waa'ik angi ka duunanne usheexxookko. Ihukkaarem bura'a haranne kade'akkamisam Moo'aabim kade'amookko.

¹¹Wo'o waachchaa'nnisa ixxuwwika anga biddiqaa'llamo. Ihukkaarem ixxuwwi bolxoo'm mashka'inne Waa'i ixxuwwam sholliisoo bikkina ixxuwwi angi hoogookko.

¹²Moo'aaphphi uulli girbuwwa lob gimbuwwinne maqirem gindookko. Iiqansaahim dir issookko.