Read Hadiyya Issaayyaas Kitaaba 26 Bible Online

Issaayyaas Kitaaba 26 - Hadiyya bible

Issaayyaas Kitaaba 26

¹Ee ammane Yihuxxi uullanne kanniinsi woroon yoo mazmuura manni zammarookko. «Niina qoxxaalli beero'i yookko; Waa'i ee beero'i oottuwwaa girbuwwaa niina daphphixxi beyyi issaakko.

²Amma'nnatonne qoxxaakkoo muccur minaadab aagona ee beero'i gooccuwwa fooqaa'llehe.

³Moollanna! Keesenne qoxxita'a amma'nnantam keenina at hanqo'i xumma uwwitootto.

⁴Ni Moollanni Waa'i niina heer heerina daphphixxi beyyi ihu bikkina heer heerinam ixxonne amma'nnammehe.

⁵Ixxi birantam keeno sholliisaakko; summamaakkoo ixxuwwi beero'om gindansaakko; ee beero'i oottuwwam iiqansaa buchchi issaakko.

⁶Wor amadanta'a hee'llam keen hancaacantamo; ixxuwwi lokkinnem taakke'antamo.

⁷Muccur kee'nnek goog xabbeena. Moollanna, at muccur kee'nneka googo taaphansitootto.

⁸Moollanna, neese ki see'llisanne hee'nnummuuyyi keesenne neeyyato issinoommo; ni mixanim ki summa lonsimma.

⁹An hiimonne keese hasoommo; i sawwitennem mixoommo. Ki oogato'i uullanne ihoo ammane heer uulli minaadab hanqa la'ookko.

¹⁰Boqqi keenina at ki eroomma issittaarem ixxuwwi er luwwa issimma laqqamoyyo. Ka muccur kee'n uullanne hee'llo'ita'nnim ixxuwwi jora baximmiinsi daba'llitammoyyo; at loban ikkittisam qoossitamoyyo.

¹¹Waa'a, ki wod guzumo'eena ki'aakko; ihukkaarem ki diina'i laqqeena xanto'oyyo. At ki minaadabina hinkaa'nna to'achchitooda'e moo'lla'a tuuttona; ixxuwwina gudissitti giirim ixxuwwa itona.

¹²Waa'a, ni baxo hundam at baxxaatto; xummam niina uwwitootto.

¹³Ni Moollanni Waa'a, kiinniinsi mulli dut keen neese gassito'ookko; ihukkaarem niina Moollanni xale'i atette.

¹⁴Oo keen hundim leto'ookko; od daba'llita'ahim foorinne hee'llamoyyo. At guzumo'llittaare bi'llo'i bikkina od ki'llamoyyo; ixxuwwa tiirakkam luwwam bi'issaatto.

¹⁵Waa'a, minaadaba dutissaatto; minaadaba dutissaatto. Atim lomba siiddaatto; uullikam gabala haraassitaatto.

¹⁶Waa'a, ixxuwwi hawwi ammane keese hasso'o; ixxuwwanne quuqqittaarem uunxatinne keese hasso'o.

¹⁷Waa'a, xuuchchi amadu meentichcho u'nnanta'a neesem ki illagenne ee'isame.

¹⁸Xuuchchannee u'nnannee hee'nnummo; ihukkaarem qallummi luwwi bee'e. Ni uullinam kaachcha siidinsummoyyo; ni kolliinsi endummi luwwi mahim bee'e.

¹⁹Leto'i keen ki'lla'a fooraammuwwi ikkamo; waammanne hee'llakkam keen ki'llakka'a liiranchi mazmuura zammallehe. Belecce'oo qiibat uulla haareechchisoo'isa Waa'i leto'aanniinsi lobakat ammane ihaakkoo keeno ki'lla'a foorinne hee'llamisa issookko.

²⁰I minaadaba, ki'nnuwwi minminenne aaggakka'a gooccuwwa ki'nnuwwi hanenne xuphphehe. Waa'ik quunqi higeebe'e hofqax ammaninam maaxammehe.

²¹Uullanne hee'llam minaadaba ixxuwwi jolli bikkina guzumo'eena Waa'i iimanenne hee'oo beyyiinsi waarookko. Ee ammane uulli ixxi hanenne daadu xiiga la'isookko. Leto'i keenom maaxeena xanooyyo.